¹ Unganidzanai pamwepo, unganidzanai, O dzinza risikatsveruki; ² musati mwadzingirwa kuretu kudai ngemazungu anotorwa ngedutu, pasati pauyapo padera penyu ushungu hunotyisa hwaMambo Mwari, pasati pauyapo padera penyu zuva roushungu hwaMambo Mwari. ³ Tsvakai Mambo Mwari, imwimwi mweshe mwakapfaa venyika, vanoita kupanga kwake; tsvakai kururama, tsvakai kupfaa; pamweni mungafishwa ngezuva roushungu hwaMambo Mwari. ⁴ Ngokuti Gaza rinozosiiwa, neAshikeroni rinozoita dongo; vanozodzinga vanhu vaAshidhodhi masikati, neEkironi rinozobvitwa. ⁵ Ihehe kwevari vagari vokuhumbikumbi yoruandhle, dzinza revaKherethi! Izwi raMambo Mwari rinorwisana nemwi, O Khenani, nyika yevaFiristia; ndinozokuparadza, metsa pasisina unosaramwo. ⁶ Newe, O humbikumbi yoruandhle, inozoita mbusho, michacha yevaushi nezvibaya zvezvifuyo. ⁷ Humbikumbi inozoita nhaka yevakasara vemhuri yaJudha, apo pevanozoushira zvifuyo zvavo padera payo, nomumhatso dzeAshikeroni vanozoatamwo madeekoni. Ngokuti Mambo Mwari, Mwari wavo, unozovahambira, nokuvaunzazve kubva kuubatwa hwavo. ⁸ Ndazwa kureiwa kwaMoabhi, nokutuka kwevana vaAmoni, kwevakaita vanhu vangu, nokudzikudza kwavo ngendaa yenyika yavo. ⁹ Ndizvo kudai ngezvendinopona,” unoronza Mambo Mwari wehondo, Mwari waIsuraeri, “Moabhi inozodai ngeSodhoma, nevaAmoni kudai ngeGomora, nyika yeminzwa nemirindi yemunyu, nokuita dongo mhera nariini. Vakasara vevanhu vangu vanozovapamba, nevanopona vedzinza rangu vanozogara nhaka yavo.” ¹⁰ Izvi zvinozoita chikoaniswa chavo ngendaa yokudzikudza kwavo, ngokuti vakareya nokudzikurisa kuvanhu vaMambo Mwari wehondo. ¹¹ Mambo Mwari unozotyisa kakurutu kwevari; ngokuti unozopedza zvimwari zveshe zvenyika; nekwaari zvinozogwadama pashi, chimwe ngachimwe pandau yacho, mahumbikumbi eshe nezviwi zveshe zvevemadzinza. ¹² Nemwiwo, vaEthiopia, munozourawa ngeshoti yangu. ¹³ Naye unozotambanudza nyara yake kurwa nevari dera, nokuparadza Asiria; naye unozoita kuti Ninevhe riite dongo, nokuoma kudai ngehlengwe. ¹⁴ Zvifuyo zvinozoata pashi mukati mwaro, nemhuka dzeshe dzomushango; zveshe hurekure nenungu zvinozogara padera pesika dzemisiwo yaro; izwi raro rinozorira mumafasitera; kuparadzwa kunozoapo mumadimba aro, ngokuti wakabudisa pamhene zvakatsetswa zvemisidhari. ¹⁵ Iri ndiro dhorobha raidakara rechigara ngokungwaririka risikatyi chiro, iro raironza mumwoyo mwaro kuti, “Ndini, akuna umwenizve ngepabanze pangu!” Rakazoita dongo ngenjiranyi, nendau yezvinoata zvikara! Weshe unopinda ngepasinde paro unozoridza murudzi nokumirudza chibhakera.