¹ Izwi raMambo Mwari iro rakauya kunaZefania mukororo waKhushi, mukororo waGedharia, mukororo waAmaria, mukororo waHezekia, mumazuva aJosia mukororo waAmoni, mambo waJudha. ² “Ndinozotsvaira yaamho zveshe kubva pahope yenyika,” unoronza Mambo Mwari. ³ “Ndinozotsvaira kupedza vanhu nezvikara; ndinozotsvaira kupedza shiri dzomudenga nehove dzomuruandhle. Ndinozoita kuti vakashata vapumhunwe; ndinozogura vanhu kubva kuhope yenyika,” unoronza Mambo Mwari. ⁴ Ndinozotambanudza nyara yangu kurwisa Judha, nokurwisa veshe vagari veJerusarema; ndinozogura vakasara vaBhaari kubva kuiyi ndau, nezina revapristi vokuhura pamwepo nevapristi vavo; ⁵ avo vanokotama pashi kudira hondo yomudenga vari pazvachungu zvemhatso; naavo vanokotama pashi, vechipika kunaMambo Mwari, asi vanopikazve ndiMarikhamu; ⁶ avo vakahwirira sure kubva mukuteera Mambo Mwari, avo vasikazi kutsvaka Mambo Mwari, nokuti kubvunzisisa ndiye. ⁷ Nyarara pamberi paMambo Mwari, Mwari! Ngokuti zuva raMambo Mwari riri pasinde; Mambo Mwari wanasirira mubairo, wachenesa vakakokwa vake.. ⁸ Pazuva romubairo waMambo Mwari, ndinozoorora makota nevana vamambo, navo veshe vanopfeka zvokupfuka zvipara. ⁹ Pairo zuva ndinozoorora veshe vanodarika padera pedimba, avo vanozadza mhatso yomukuru wavo ngokugebenga nokuchengedzera. ¹⁰ Pazuva iro,” unoronza Mambo Mwari, “Kunozoapo bope rokuchema kubva kuMusiwo Hove, kuboorera kubva kurutii rwechipiri, kupwanyiwa kukurutu kubva kuzvimitunhu. ¹¹ Vagari veMortha, boorerai, ngokuti vatengesi veshe vapera; veshe avo vaipima sirivha vakaurawa. ¹² Panguva iyo ndinozotsvakisisa Jerusarema ngezvibani, neni ndinozoorora vanhu vakagara pamasese avo, avo vanoti mumwoyo mwavo, ‘Mambo Mwari aazoshandi zvakanaka, nokuti zvakashata! ¹³ Upfumi hwavo hunozopambwa, nemhatso dzavo dzinozoita matongo. Kunyazwi vanoaka mhatso, avazogarimwo; kunyazwi vanosima minda yemivhini, avazomwi vhini rayo. ¹⁴ Zuva guru raMambo Mwari riri pasinde, riri pasinde yaamho, naro rinokasira kakurutu; kuzwika kwezuva raMambo Mwari kunovava, ngwazi inochema kakurutu. ¹⁵ Iro zuva rinozoita zuva roushungu, zuva rokutambudzika nokusvipa mwoyo, zuva rokuparadzwa nokuangiridzwa, zuva rechidima chakasvipa, zuva remakore nechidima chikurutu, ¹⁶ zuva rokuridzwa kwegwama nokuridza mhere yehondo nokurwisana nemadhorobha anorusvingo, nendau dzehondo dzakakwirira. ¹⁷ Ndinozounza kutambudzika kwakadaro padera pevanhu, kuti vahambe kudai ngemapofu; ngokuti vakashaisha kunaMambo Mwari, ngazi yavo inozodururwa kudai ngebukuta, nenyama yavo kudai ngemadisa. ¹⁸ Sirivha yavo nokuti mukore wavo zvinozotama simba rokuvanunurira ngezuva roushungu hwaMambo Mwari; nyika yeshe inozopedzwa ngomuriro wendurumwa yake; ngokuti unozopedza yaamho, magumo anotyisa eavo veshe vagari vomunyika.