¹ Mambo Mwari ngenjiranyi wafukidza mwanasikana Zioni ngegore roushungu hwake! Wakandira pashi panyika kubva mudenga unaku hwaIsuraeri; aazi kukarakadza ngechitambarariro chetsoka dzake muzuva roushungu hwake. ² Mambo Mwari wakaparadza asikakunguriri ugaro hweshe hwaJakobe, muushungu hwake wakandira pashi marukumbati emwanasikana waJudha; wadzasa pashi pamavhu mukutsverudza umambo nevatongi vahwo. ³ Wagura runyanga rwaIsuraeri muushungu hunotyisa; wakapfinyisa nyara yake yokumudyo kubva kwevari pamberi pemagaa; wapisha munaJakobe kudai ngomuriro unemirazvu, uwo unopisha zveshe zvakatendenedza. ⁴ Wakwanya uta hwake kudai ngegaa, nenyara yake yokumudyo yakamirudzwa kudai ngegaa; wauraya veshe avo vadakadzi vemadziso edu mutende remwanasikana weZioni; wadurura ushungu hwake kudai ngomuriro. ⁵ Mambo Mwari waita kudai ngegaa; waparadza Isuraeri, waparadza ngome dzake dzeshe, wapwanya kuita matongo marukumbati ake, akawanza kubonda nechiriro mumwanasikana waJudha. ⁶ Waputsira pashi matumba ake kudai ngomunda; waparadza ndau yake yemishongano; Mambo Mwari waparadza muZioni mishongano yemadhiri nemaSabatha nomuushungu hwake hunotyisa washoora mambo nevapristi. ⁷ Mambo Mwari waramba arita rake, akanyenya ndau yake yakachena; wapira munyara dzemagaa marukumbati engome dzaro; vaita bope mumhatso yaMambo Mwari, kudai ngezuva redhiri rakaemeswa. ⁸ Mambo Mwari waemesa kuti aparadze nokuita matongo rukumbati rwemwanasikana weZioni; watambanudza tambo, aazi kupfinyisa nyara yake kubva mukuparadza; waita kuti thawa norukumbati zvicheme; zvapera simba pamwepo. ⁹ Misiwo yaro yanzvaira mumavhu; waparadza nokugura mipiningidzo yaro; mambo waro nevatongi varo vaapakati pevemadzinza; akuchina mipango; vaprofeti varo avachaoni chioniso chinobva kunaMambo Mwari. ¹⁰ Vakuru vomwanasikana weZioni vanogara pamavhu mukunyarara; vakandira bukuta pamasoro avo nokupfeka machira emasaka; mhandwe dzeJerusarema dzinokotamisa masoro adzo pamavhu. ¹¹ Madziso angu apera ngendaa yemasodzi; mweya wangu unotambudzika; mwoyo wangu unodururwa pamavhu, ngendaa yokuparadzwa kwevanhu vangu, ngokuti vana nechiya vanodemera mumapato edhorobha. ¹² Vanochema kumadzimai avo vechiti, “Zviripari zvokudya nevhini? Apo vanodemera kudai ngevakaremadzwa mumapato edhorobha, apo mweya yavo yaidururwa pamaditi paanamai vavo. ¹³ Chiinyi chendingakona kupupura ndiwe? Chiinyi chendingakutodzanisa nacho, O mwanasikana weJerusarema? Ndingakona kukuedzanisa nenyi, kuti ndikuembedzere mhandwe, mwanasikana weZioni? Ngokuti rutwe rwako rwakakura kudai ngoruandhle; ndiani uwo ungakona kukuporesa? ¹⁴ Vaprofeti vako vakuonera zvioniso zvokunyepa nezvinopaukisa zvisina shwiro nezvoupenzi; avazi kubudisa kushaisha kwako, kuti vabvise uhloko hwako; asi vakuonera zvioniso zvokunyepa nezvokupaukisa. ¹⁵ Veshe avo vanopinda ngenjira vanoembera nyara dzavo kwouri; vanoridza murudzi nokudzungudza masoro avo kumwanasikana weJerusarema vechiti, “Iri ndiro here dhorobha revakadudza vechiti, ‘Kuperera kwounaku, kudakara kwenyika dzeshe? ¹⁶ Magaa ako eshe akushamira miromo yawo kurwisana newe; vanoridza murudzi nokukwetsanisa mazino avo; vanoti: Tamumedza; iri ndiro zuva retaigarira; zvino tariona. ¹⁷ Mambo Mwari waita izvo zvaakaronga, wakazadzisa izwi rake raakapanga; kudai ngezvaakaemesa karetu, waputsira pashi, asina nyasha; waita kuti magaa adakare padera pako, nokumirudza runyanga rwemagaa ako. ¹⁸ Mwoyo yavo yakachema kudaidzira kunaMambo Mwari, O rukumbati rwemwanasikana weZioni. Masodzi ngaaerere kudai ngorwizi masikati nousiku! Usazorora, madziso ako asaremba. ¹⁹ Miruka, ucheme yaamho usiku, pakutanga kwomurindo! Durura mwoyo wako kudai ngemvura pamberi pehope yaMambo Mwari. Mirudza nyara dzako kwaari ngendaa yendaramo yevana vako, avo vanodemera ngenzara ngedera kwepato rimwe ngarimwe. ²⁰ Ringira, O Mambo Mwari, ukarakadze. Ngokunaani kwewaita izvi? Madzimai vangadya mibarirwana yavo here, vana vevabara? Mupristi nomuprofeti vangaurawa here mundau yakacheneswa yaMambo Mwari? ²¹ Vadoko nevakuru vanoata pamavhu mumapato; mhandwe dzangu nemajaha angu awa ngeshoti; pazuva roushungu hwako wavauraya, kuuraya usikakunguriri, ²² Wadaidza magaa angu kubva kweshe kwakanditendenedza kudai ngezuva redhiri; ngezuva roushungu hwaMambo Mwari akuna wakapokonyoka nokuti kusara; avo vendakatengura nokurera, gaa rangu ravapedza.