¹ . Ushomanyi hwakadai dhorobha ragara rega, iro raiya rakazara ngevanhu! Ngenjiranyi raita kudai ngeshirikadzi, iro raiya rakakura pakati pemadzinza! Iro raiya mwanasikana wamambo, pakati penyika raita hloko. ² Rinochema kakurutu usiku, nemasodzi aro anomozoka pamatama aro; pakati pevadikani varo arina naumwe wokuriembedzera; vangani varo veshe vakashanda naro ngokuchengedzera, navo vakaita magaa kweriri. ³ Judha rapinda muuhloko munokutambudzika nouhloko hukuru; rinogara zvinopano pakati pemadzinza; arioni ndau yokuzororera; varumbiriri varo vakaribatira pakamanikana. ⁴ Njira dzinoenda Zioni dzinochema, ngokuti akuna naumwe unouya kumadhiri akaemeswa; misiwo yaro yeshe yaparadzwa, vapristi varo vanogwimba; mhandwe dzaro dzinotambudzika, iro pacharo riri mukutambudzika. ⁵ Magaa aro aita vatongi varo, mapandu aro anobudirira, ngokuti Mambo Mwari wakariita kuti ritambudzike ngendaa youwandu hwezvishaishi zvaro; vana varo vapinda muubatwa pamberi pemagaa. ⁶ Unaku hweshe hwemwanasikana Zioni hwapera. Vatongi varo vadai ngeshoma dzisikaoni mafuro, vakatiza vasina simba pamberi pevarumbiriri vavo. ⁷ Jerusarema rinokarakadza, ngemazuva okutambudzika nokunzerereka kwaro, zviro zvaro zveshe zvinomutengo mukuru, izvo zvaiya zvaro mazuva ekare. Naapo vanhu varo vakawira munyara dzemagaa, pasina naumwe wakaridetsera, magaa akariona akaita chishekedzo ngokuparadzwa kwaro. ⁸ . Jerusarema rakashaisha kakurutu, ndizvo raita chishekedzo; avo veshe vairiremeredza vorishoora, ngokuti vaona utitinini hwaro; iro pacharo rinogwimba nokufuratira. ⁹ Tsvina yaro iri munezvokufuka zvaro; aripinimidzi ngemagumisiro aro; kuwa kwaro pashi kunoshamisa, pasina naumwe muembedzeri. “O Mambo Mwari, ringira kutambudzika kwangu, ngokuti gaa ranyisa. ¹⁰ Gaa rakatambanudza nyara dzaro padera pezviro zvaro zveshe zvinomutengo mukurutu; ratoona madzinza echipotera mundau dzaro dzakacheneswa, avo vewakaereketa ndivo kuti vasapotera mumishongano yako. ¹¹ Vanhu varo veshe vanogwimba, apo vanotsvaka chokudya; vanotengesa zviro zvavo zvinomutengo mukurutu kutenga kudya kuti vapone. “Ringira, O Mambo Mwari, uone kushoorwa kwendinoitwa. ¹² Azvironzi chiro kwomuri here, imwimwi mweshe munopinda ngenjira? Ringirai, muone kuti kuripo here kutambudzika kukuru kwakadai ngokutambudzika kwangu, ukwo kwakaitwa kwendiri, kwaakanditambudza ndikwo Mambo Mwari ngezuva roushungu hwake hukuru. ¹³ Kubva mudenga wakatuma muriro, ukapinda kudzama mumagodo angu; wakatambanudzira tsoka dzangu mumbure, akandihwirinza sure; wakandiparadza nokundipedza simba zuva reshe. ¹⁴ Zvishaishi zvangu zvakasungirwa mujoka; ngenyara yake zvaiya zvakasungirwa pamwepo, zvikaiswa pamutsipa wangu, zvechimwa simba rangu; Mambo Mwari wakandipira munyara dzaavo vendisikakoni kurwa navo. ¹⁵ Mambo Mwari waramba dzeshe ngwazi dzangu dziri mukati mwangu; wakandidaidzira nguva yokurwa neni kuuraya majaha angu; Mambo Mwari watsikatsika pashi kudai ngounosvina mavhini mhandwe mwanasikana Judha. ¹⁶ Ngendaa yeizvi ndinochema; madziso angu anoerera masodzi; ngokuti muembedzeri uri kuretu kubva kwendiri, umwe kumusira simba rangu; vana vangu vaparadzwa, ngokuti gaa ranyisa. ¹⁷ Zioni rinotambanudza nyara dzaro, asi akuna naumwe wokuriembedzera; Mambo Mwari wapanga ngendaa yaJakobe kuti vaakirwana vake ndivo vaita magaa ake; Jerusarema raita chiro chakasvipiswa pakati pavo. ¹⁸ Mambo Mwari wakarurama; ngokuti ndamukira mipango yake. Asi izwai, imwimwi vanhu mweshe, muringire kutambudzika kwangu; mhandwe dzangu nemajaha angu vapinda muuhloko. ¹⁹ Ndadaidzira kuvadikani vangu, asi vandichengedzera; vapristi vangu nevasharuka vangu vafira mudhorobha, vechitsvaka kudya kuti vamusirire simba ravo. ²⁰ Ringira, O Mambo Mwari, kutambudzika kwangu; ndinotambudzika mukati mwangu, mwoyo wangu unotambudzika mukati mwangu, ngokuti ndakamukira kakurutu. Mumapato shoti inouraya, mumhatso mune rufu rwega. ²¹ Vakazwa kugwimba kwangu, pasina naumwe wokundiembedzera. Magaa angu eshe akazwa ngokutambudzika kwangu; anodakara ngokuti wazviita. Unza zuva rowaemesa, vaite kuti vadai ndini. ²² Kushata kwavo kweshe ngakuuye pamberi pako; uvaitire kudai ngezvewaita kwendiri ngendaa yezvishaishi zvangu zveshe; ngokuti kugwimba kwangu kwakawanda, nomwoyo wangu unodemera.