¹ Ndizvo tinofanira kuti tipinde kungwarira zvetakazwa, kuti tirekere mukukuzwa kubva kwezviri. ² Ngokuti kudai izwi iro rakareketwa kubudikidza ngengirosi yakaoneswa kuti rakagwinya, nekupauka kweshe nokuzwisisa zvakathuswa ngokuunzidzirwa kwakafanira, ³ isusu tingaita mapokonyokereyi kudai techirekeredza ruponeso rukuru rwakadai? Urwo rwakatanga kureketwa kubudikidza ndiye Mambo, rukagwinyisiswa kwetiri ngaavo vakamuzwa. ⁴ Apo Mwari wakapupurawo pamwepo navo ngezvioniso nemushamiso nemushando yakawanda yesimba nezvipo zvoMweya Wakachena, zvakapuwa kudai ngokuda kwake. ⁵ Ngokuti aazi kuipfaisa pashi pengirosi nyika inouya, yetinoreketa ndiyo. ⁶ Asi umwe wakapupura pandau imweni echiti: “Munhu chiinyi kuti ukarakadze ndiye? Nokuti mwana wemunhu kuti mumungwarire?, ⁷ Wakamuita kwekamukuwo kadoodori ari pashi pengirosi; wakamupfekedza dzungudza routhende nokuremeredzwa. [1], ⁸ Wakapfaisa zveshe pashi petsoka dzake.” Ngokuti pakuisa pashi pake zviro zveshe, aazi kusiya chiro chisikazi kuiswa pashi pake. Asi zvino atisati taona kuti zveshe zvakaiswa pashi ⁹ Asi, tinoona Jesu, uwo wakaitwa mudoko pashi pengirosi kwenguva doko, asi zvino akapfekedzwa dzungudza routswene nokureremedzwa ngendaa yokutambudzika kwerufu, kuti ngenyasha dzaMwari araire rufu ngendaa yomunhu weshe. ¹⁰ Ngokuti kwakamufanera Mwari, iye wakaitirwa zviro zveshe, nokubudikidza ndiye zviro zveshe zviripo, mukuunza vana vazhinji muuswene, kuti apererise mukutambudzika uwo uri mutungamiri weruponeso wavo. ¹¹ Ngokuti uwo unochenesa naavo vakacheneswa vana Baba umwe. Ngeiyi ndaa Jesu aanyari kuvadaidza kuti hama. ¹² Ena unoti: “Ndinozochumaira zita rako kuhama dzangu, ndinozoemba mukukudza pakati pembungano. ¹³ Zve kare Ena unoti: “Ndinozogonda kwaari.” Zve: “Inini ndiri pano, nevana avo vaakandipa Mwari.” ¹⁴ Ndizvo kwechioneka kuti vana vakakoanisirwa ngazi nenyama, iye emene ngokudaro wakakoana navo pane zviro zvakadaro, kuti kubudikidza ngokufa ungaparadza uwo unesimba rorufu, ndiye

Dhiabhorosi.

¹⁵ Nokudaro wakasunungura veshe avo vainga muusungwa mukupona kwavo kweshe mukutya rufu. ¹⁶ Ngokuti ngegwinyiso aazi kuuya koodetsera ngirosi, asi kudetsera mibarirwana yaAbrahama. ¹⁷ Ndizvo unofanira kuti atodzane nehama dzake ngezviro zveshe, kuti aite mupristi mukuru unenyasha nounogondeka mumushando waMwari, kuti aripire zvishaishi zvevanhu. ¹⁸ Ngokuti ena emene wakatambudzika echiedzwa, unesimba rekudetsera avo vanoedzwa.