Ndima 1

1 Kare Mwari wakareketa kumadzibaba edu ngenguva dzakawanda nenjira dzakasiana ngevaprofeti. 2 Pamazuva aya okupedzisira wakareketa kwetiri ngeMwana komana wake, uwo waakaemesa kugara nhaka yezviro zveshe, kubudikidza ndiyezve wakasika nyika. 3 Aye uri kupenya kwoutswe waMwari nemuedzaniso wemene waMwari, nokugwinyisa zviro zveshe ngesimba reizwi rake. Apo achenesa zvishaishi, wakagara pashi ngekumudyo kwoUkuru mudenga. 4 Wakawa mwana wakapinda kunaka kunengirosi, ngokuti wakagara nhaka yezita

rakapinda kunaka kuneradzo.

5 Ngokuti ngeiri ngirosi yaakaronza nokuti ngouri mukuwo echiti, “Ndiwe Mwana wangu, inini nyamashi ndakubara?” Zve, “Ndinozoita Baba ake, naye unozoita Mwana wangu''? 6 Apo zve, echiunza dangwe munyika, unoti, “Ngirosi dzeshe dzaMwari ngadzimudire.” 7 Ngendaa yengirosi unoti, “Uwo unoita ngirosi dzake dziite mhepo, nevashandiri vake kuti vaite murazvu

wemuriro.”

8 Asi ngendaa yeMwana unoti, “Dendemaro rako, A Mwari, rinogara mhera nariini nariini, nendonga yekunaka ndiyo ndonga yeumambo wako. 9 Iwewe wakada kunaka, wakanyenya kushata; ndizvo Mwari, Mwari wako, wakakudzodza ngemafuta okudakara kupinda vangani vako.” 10 Pakutanga, Mambo Mwari, wakaradzika dzeyo renyika, nematenga ari mishando yenyara dzako. 11 Izvo zvichapera, asi iwewe unogara uripo; nazvo zveshe zvichatsakara kudai ngechokufuka. 12 Kudai ngejira unozozvipeta, kudai ngechekufuka zvinozotsandudzwa. Asi iwewe unondogara wakadaro, nemakore ako aazoperi.” 13 Asi ngeiri yengirosi yaakareketa ndiyo nokuti ngouri mukuwo echiti, “Gara iwewe ngokumudyo kwangu metsa ndiite magaa ako chitambarariro chetsoka dzako?” 14 Ngirosi dzeshe andiyopi mweya inoshandira here, inotumwa kushandira avo vanozogara nhaka yeruponeso?