¹ Ndinozoema kundau yangu yokurinda, nokudziemesa padera porusvingo; ndinozoangira kurinda kuti ndione chaanozoereketa kwendiri, nechaanozopingura ngendaa yokugunun'una kwangu. ² Zvino Mambo Mwari wakandipingura, akati, “Nyora chioniso pamarusamba, uite kuti chinase kuoneka, kuti murumbi achidzidze. ³ Ngokuti chichipo chioniso chomukuwo wakaemeserwa, chinoereketa ngepakugumisira, chisikanyepi. Kudai chechinonoka, chigarire; ngegwinyiso chinozouya, achizononoki. ⁴ Ringira kumudadi! Mweya wake auzi kururama mukati mwake, asi wakarurama unozopona ngokugonda kwake. ⁵ Zvakanyadaro vhini muchengedzeri; unodzikudza aagari pakanyi; unobeura mukuro kudai ngeSheori, kudai ngorufu, aagutiswi. Unounganidza kwaari madzinza eshe, nokudziunganidzira vanhu veshe. ⁶ Weshe aazoembi here nduyo ndiye, nechinai chinoshekedza ndiye, vechiti. “Ihehe kwaari uwo unounganidza izvo zvisiri zvake!” Unozodzitwarisa pachako ngezvakanaka kwomukuwo wakadini ngezvakagondiswa? ⁷ Avazokasiri kumiruka here avo vanozokuruma, nokuti kumuka avo vanozokuita kuti umuke wechihuta? Newe unozoita mupambwa kwevari. ⁸ Ngokuti wapamba madzinza akawanda, veshe vanosara veavo vanhu vanozokupamba; ngendaa yengazi yevanhu, nokugebengwa kwenyika, nokwemadhorobha, nokwaavo veshe vanogaramwo. ⁹ Ihehe kwaari unoona kuuyirwa kwoupfumi kumhatso yake ngenjira yakashata, kuti aemese saki rake padera, kuti anunurirwe kusimba revakashata!” ¹⁰ Wakaronga zvinotsverudza kumhatso yako ngokuuraya vanhu vazhinji, newe wakashaishira mweya wako. ¹¹ Mapuwe emene anozodaidzira ari parukumbati, nemwamba uri pakati pesika unozoripingura. ¹² Ihehe kwaari unoaka dhorobha ngengazi, nokuemesa dhorobha padera pokushaisha!. ¹³ Ringira, azvibvi kunaMambo Mwari wehondo here, kuti vanhu vagutise murazvu womuriro wemene, madzinza anodzirembesa ngezvisina shwiro?. ¹⁴ Asi nyika inozozara ngokuzia uthende hwaMambo Mwari, kudai ngemvura inofukidza ruandhle. ¹⁵ Ihehe kwaari unoita kuti muakirwana wake amwe, echidurura ukaira metsa araradza, kuitira kuti aringire utitinini hwavo! ¹⁶ Munozozadzwa ngezvinotsverudza pandau youthende. Imwa iwewe pachako, udai ngouwo usikazi kuchekwa! Tsani iri munyara yokumudyo yaMambo Mwari inozoguma pasinde kwouri, nokunotsverudza kunozoapo padera pouthende hwako. ¹⁷ Ngokuti kugebenga kwakaitika muRebhanoni kunozokufukidza, nokuurawa kwezvikara kunozomutyisa, ngendaa yengazi yevanhu yakaparadzwa, nendaa yokugebenga kwakaitika kunyika, kumadhorobha, nokwavari veshe vanogaramwo. ¹⁸ Muedzaniso wakatsetswa unodetserenyi, kuti muiti wawo autsetsa; zve, muedzaniso wakanyunguruswa nomudzidzisi wemanyepo? Ngokuti muiti wawo unogonda mweuri, kunyazwi miedzaniso isikaereketi! ¹⁹ “Ihehe kwaari unoti kumuti, ‘Muka;’ nokune buwe risikaereketi, ‘Miruka pachako!’ ” Uyu unokona kudzidzisa here? Ringira, wakasetwa ngomukore nesirivha, nawo amuna nakamwe kufema nepadodoko mukati mwawo. ²⁰ Asi Mambo Mwari uri mutemperi rake rakachena; nyika yeshe ngainyarare pamberi pake.