¹ Chiprofeti icho chaakaona Habhakuki muprofeti. ² O Mambo Mwari, ndinozochema mukuwo wakaitawani kuti ndidetserwe, newe usikazozwi? Nokuti kuchema kwouri “Ngokugebengwa,” newe usikazoponesi? ³ Ngenyi wechindionisa kushata, nokuita kuti ndiringire kutambudzika? Kuparadzwa, kupambwa zviri pamberi pangu; varipo vanomusa hasha nokurwisana. ⁴ Ndizvo mupango unononoka kuitwa, kutonga kwakanaka akuitiki. Vakashata vanotendenedza vakarurama; ndizvo kutonga kwakanaka kunopauswa. ⁵ Ringirai pakati pemadzinza, muone! Mushamiswe! Mukangaidzwe! Ngokuti mushando unoitwa mumazuva enyu, womusikakoni kuugonda, kudai mwechiuronzerwa. ⁶ Ngokuti, ringira, ndinomusa vaKharadhea, dzinza rinovava rinechara, iro rinohamba mukati mwenyika, kutora ndau dzokugara dzisiri dzavo. ⁷ Vanokarudza nokutyisa; kutonga kwavo nokuremeredzeka kwavo zvinobva kwevari vemene. ⁸ Mahachi avo anokasira kurumba kupinda makhamba, anopinda kutyisa kune matika emadeekoni; mahachi avo anorumbirira. Vanhu vavo vanogadha mahachi vanobva kuretu; vagadhi vemahachi vanombururuka kudai ngegodzi rinokasira kuenda koodya. ⁹ Vanouya veshe koogebenga, nehope dzavo dzakaringira mberi kakurutu; vanounganidza hloko kudai ngejecha. ¹⁰ Kumadzimambo vanoadadira, vatongi vanovaita chishekedzo. Vanosheka rusvingo rweshe, nokuita mirwi yemavhu kurutora. ¹¹ Zvino vanotsvaira kudai ngedutu; vanopauka nokuita vanoshaisha; simba ravo remene ndicho chimwari chavo!” ¹² Auri uwo wekare here, O Mambo Mwari, Mwari wangu, Uwo Wakachena wangu? Atizofi. O Mambo Mwari, wavaemesera kutongwa; newe, O Buwe, wavaemesera kuororwa. ¹³ Madziso ako akanyanya kuchena kuti aringire zvakashata, newe aukoni kuringira zvishaishi; ngenyi wechiringira avo vanoshanda ngokuchengedzera, wechinyarara apo wakashata echimedza munhu wakapinda kururama kuneivo? ¹⁴ Waita vanhu kuti vadai ngehove dzoruandhle, kudai ngezvinotamanda zvisina mutongi padera pazvo ¹⁵ Vanovabata veshe ngechiedzo, vanovakweera kubanze muchitaa chavo, vanovaunganidza mukati mwechitaa chavo; ndizvo vanodakara nokudakadzwa. ¹⁶ Ndizvo vanopira mudiro kuchitaa chavo, nokupisha mutombo unegwema rakanaka kuchitaa chavo; ngokuti kubudikidza ndicho chikoaniswa chavo chinokudzwa, nokudya kwavo kunowanda. ¹⁷ Zvino unozoangira kukutura here zviri muchitaa chake, nokuparadza madzinza asikaaitiri nyasha?