¹ Isuraeri wakahamba zveshe zvaainga nazvo, akaenda Bheeri-shebha. Iyo wakapa mubairo kunaMwari wababa ake Isaka. ² Mwari wakareketa kunaIsuraeri ngezvioniso usiku, echiti: “Jakobe, Jakobe.” Iye akati: “Ndiri pano.” ³ Mwari akati: “Ndini Mwari, Mwari wababa ako, usatka kudzaka Egipite, ngekuti ndinozokuiteyo dzinza guru. ⁴ Ndinozodzaka newe muEgipite, ngegwinyiso ndinozokuunzazve unono. Josefa uchazovara madziso ako ne nyara yako.” ⁵ Saka, Jakobe wakamuruka kuenda kubva Bheeri-shebha; vana vaIsuraeri vakatwara Jakobe baba avo, vadoko vavo nevakadzi vavo, mungoro dzaakatumira Faro kumutwara. ⁶ Vakatora zvifuyo zvavo nezvidziyo zvavo, zvevakaona munyika yeKhenani, vakauya Egipite, Jakobe nerudzi rwake rweshe. ⁷ vana vake nevana vevana vake pamwepo naye, nevanasikana vake nevanasikana vevakomana vake, nerudzi rake reshe wakauya narwo muEgipite. ⁸ Aya ndiwo mazita evana vaIsuraeri avo vakaenda Egipite: Jakobe nevana vake: Rubheni, dangwe raJakobe; ⁹ nevana vaRubheni vainga Hanokhi, Paru, Hezironi, naKhami. ¹⁰ Vana vaSimeoni: Jemueri, Jamini, Ohadhi, Jakhini, Zoha naShauri, muwana wemukadzi wemuKhenani. ¹¹ Vana vaRevhi: Gershoni, Kohathi naMerari. ¹² Vana vaJudha vainga: Eri, Onani, Shera, Pherizi naZera, asi Eri naOnani vakafa vachiri munyika yeKhenani. Vana vaPherizi vainga Hezironi naHamuri; ¹³ Vana vaIsakha vainga: Tora, Puvha, Jashubhi naShimuroni. ¹⁴ Vana vaZebhuruni vainga Seredhi, Eroni naJahireeri. ¹⁵ Ava vana vaRea, vaakabarira Jakobe muPadhana-aramu, nemwanasikana wake Dh-aina. Vanakomana pamwepo nevanasikana vake veshe vainga vandhu makumi matatu navatatu. ¹⁶ Vana vaGadhi vaiya Zifioni, Hagi, Shuni, Ezibhoni, Eri, Arodhi naAreri. ¹⁷ Vana vaAsha vainga Jimina, Ishivha, Ishivhi, Bheria naSera, mukunda wavo; neVana vaBheria: Hebha naMarikhieri. ¹⁸ Avo vana vaZiripha vainga ava vaakapa Rabhani kunaRea mwanasikana wake; ne ava ndivo vaakamubarira Jakobe vana gumi navatanhatu. ¹⁹ Vana vaRacheri mukadzi waJakobe vainga Josefa naBhenjamini. ²⁰ Josefa wakabarirwa Manase naEfuremu munyika yeEgipite ndiAsenathi mwanasikana waPotifera mupristi waOni. ²¹ Vana vaBhenjamini vainga Bhera, Bhekheri, Ashibheri, Gera, Naamani, Ehi, Roshi, Muphimi, Huphimi naAdhi. ²² Ava ndivo vana vaRacheri, vaakabarira Jakobe. Veshe vanhu vainga gumi navarongomuna ²³ Mwana waDhani wainga Hushimu. ²⁴ Mwana vaNafitari vainga Jahizeeri, Guni, Jeza naShiremu. ²⁵ Ava vana vaBhiriha, uwo waakapa Rabhani kunaRacheri mwanasikana wake, avo vaakabarira Jakobe vanhu veshe vainga vanomwe. ²⁶ Vandhu veshe vakaenda naJakobe muEgipite, avo vainga mubarirwana yaJakobe, vasikaerengi vakadzi vevana wake, veshe vainga makumi matanhatu navatanhatu. ²⁷ Vanakomana vaJosefa vaakabarirwa muEgipite vainga vanhu vairi. Vanhu veshe vembhatso yaJakobe avo vakauya muEgipite vainga makumi manomwe. ²⁸ Jakobo Wakatuma Judha pamberi pake kunaJosefa, kuti amutungamirire njira yekuenda Gosheni; navo vakaguma munyika yeGosheni. ²⁹ Apo Josefa wakanasirira ngoro yake, akakwira kuenda Gosheni koosangana naIsuraeri baba ake. Paakamuona, akamukumbatira pamutsipa wake, akachema ari pamutsipa yake panguwa yakareba. ³⁰ Isuraeri wakati kunaJosefa: “Hino, ngekuti ndaiona hope yako, ndikazia kuti uchapona. ³¹ Josefa wakati kuvakoma wake nevekumbhatso yababa ake: “Ndinozokwira, ndironzere Faro ndechiti kwaari,:‘Vaguma kwendiri vana vababa angu nevembhatso yababa angu, avo vaigara munyika yeKhenani. ³² Vamuna ava vaushi, ngekuti vaiusha zvifuyo,. Vona vakaunza zvifuyo zvavo nemihlambi yavo nazvo zveshe zvevanazvo’. ³³ Apo Faro akazomudaidza echiti: ‘Mushando wenyu ngoweyi?’ ³⁴ Munozo dhaira mwechiti: ‘Mushando wevaranda vako ngewekuusha mombe kubvira paudoko hwedu kuguma nazvino, isusu teshe nemadzibaba edu.’ Itai izwi, saka, imwimwi muchazogara munyika yeGosheni, ngekuti muushi weshe chinyangadzo kune vaEgipite.”