¹ Nzara yainga yashata munyika. ² Apo pavakapedza varha zvekudha zvevainga vaunza kubva Egipite, baba avo vakati kwavari: “Petukaizve, mutitengere zwekudya zwishomani.” ³ Judha wakavadhaira echiti: “Munhuwo wakagwinyisisa kutironzera echiti: ‘Amuzombooni hope yangu, kusiri kuti munukuna wenyu anemwi.’ ⁴ Kudai mwechizotuma munukuna wedu nesu, tinozodzaka, timutengere kudya. ⁵ asi kudai musikazomutumi, atizodzakiyo. Ngokuti munhuwo wakati kwetiri: ‘Amuzombooni hope yangu, kusiri kuti munukuna wenyu anemwi''. ⁶ Isuraeri wakati: “Sei wakandiitira zvakashata kudaro, kubvundza ku mundhu kuti mune munukuna umweni?” ⁷ Vona vakadhaira Vechiti: “Munhuwo wakatibvunzisisa ngekugara kwedu nendaa yehama dzedu . Echiti: ‘Baba enyu vachapona here? Mune munukuna umweni here?’ Nesu takamuronzera kudai ngemubvunzo iyi. Taizoita maziireyi kuti ena wazoti: ‘Undzai nomunukuna wenyu?'''. ⁸ Judha wakati kunaIsuraeri baba ake: “Tuma murumbwana neni. Nesu tinozomuruka tiende kuti tipone, tisafa, teshe isusu nemwi nevadoko vedu. ⁹ Inini ndinozoita chibatiso chake; munozobvunza munyara dzangu. Kudai ndisikamuunzi kwemuri, ndimuise pamberi penyu, ngandiane ndaa yemhesa nariini. ¹⁰ Ngekuti, dai tisikazi kunonoka, ngegwinyiso taizodai tauya kwechipiri.” ¹¹ Baba avo Isuraeri vakati kwavari: “Kuti zvakadaro, itai izvi. Torai muchero dzakapinda kunaka dzemunyika muzvidziyo zvenyu, mudzake mwakatwara kuita chipo kumundhuwo, makha mashomani nezviuchi zvishomani zvinonuhwira nemhura nemichero yomupistakhio nemaarimondi. ¹² Mutore munyara dzenyu mare yakahwirinzirwa kairi. Petudzai mare iyo yakapetudzwa mumuromo yemasaka enyu, hwirirai nayo iri munyara dzenyu. Pamweni kwainga kukangaidzwa. ¹³ Mutorezve munukuna wenyu. Mumuruke, muendezve kunemundhuwo. ¹⁴ Mwari Unesimba-reshe ngaamuitire nyasha pamberi pemundhuwo, kuti amusunungurire hama yenyu umweni naBhenjamini. Kudai ndanyapedzerwa vana vangu, ndatopedzerwa.” ¹⁵ Vamuna avo vakatora icho chipo, vakatora mare yakahwirinzirwa kairi munyara mwavo, naBhenjamini; vakamuruka, vakadzaka Egipite, vakaema pamberi paJosefa. ¹⁶ Apo Josefa aona Bhenjamini anavo, wakati kune mungwariri wembhatso yake: “Unza ava vamuna mumbhatso, uuraye mhuka, unasirire, ngekuti ava vamuna vanozorha neni masikati.” ¹⁷ Nemungwariri wembhatso wakaita sezwaakaronza Josefa. Ena wakavaundza vamuna mumhatso mwaJosefa. ¹⁸ Vamuna vakatka ngekuti vakaunzwa mumbhatso mwaJosefa. Vona vakati: “Tapindzwa munomu ngendaa yemare yakahwirinzwa mumasaka edu ngenguwa yekutanga, kuti atsvake chekutiitira ndaa ndicho, atipambe, atitore kuita hloko nembongoro dzedu.” ¹⁹ Vakakwedzera kune mungwariri wemhatso yaJosefa, vakaereketa naye vari pamusiwo wemhatso, ²⁰ vakati: “izwai, mambo, wedu, isusu takauiya pekutanga kuzotenga zwekurha. ²¹ Zwakaitika zwekuti, petakaguma kundau yetakaata, takabeura masaka edu, tikaona kuti mare yemundhu weshe yainga mumuromo wesaka rake, mare yedu ngeuremu wayo weshe. Nesu taiunzazve munyara dzedu. ²² Nesu takauya nemare imweni munyara dzedu yokutenga ndiyo zvekurhya. Atizii kuti ndiani wakaisa mare yedu mumasaka edu.” ²³ Mungwariri Wakati: “Kunyarara ngakugare kwemuri, musatka. Mwari wenyu, Mwari wababa enyu, ndiye wakamupa upfumi mumasaka enyu. Ndini ndakaashira mare yenyu.” Mungwariri wakaundza Simeoni kwavari. ²⁴ A mundhungwariri wakaunza vamuna avo mumbhatso yaJosefa. Ena wakavapa mvura, vakashamba tsoka dzavo. Akapa zvekurhya ku mbongoro dzavo. ²⁵ Vakanasirira chipo kuti vachipe Josefa apo ouya masikati, ngekuti vakazwa kuti vanozorhepo chingwa. ²⁶ Apo Josefa auya, vakamuunzira chipo chainga munyara dzavo, vakapinda mumbhatso, vakadzikotamisa pashi pamberi pake. ²⁷ Wakabvunza ngekutamba kwavo, akati: “Baba enyu vanotamba here, harahwa yemwakareketa ndiyo? Ichapona here?” ²⁸ Vakapingura vechiti: “Muranda wako, baba edu vanotamba, vachapona.” Vakagwadama, vakakotamisa masoro avo pamberi pake. ²⁹ Wakamurudza madziso ake, akaona munukuna wake Bhenjamini, mwana wamai ake, akati: “Uyu ndiye here munukuna wenyu wemwakareketa ndiye kwendiri?” Saka Wakati: “Mwari ngaakuitire nyasha, mwana wangu!” ³⁰ Josefa wakakasira kubudha, ngekuti mweya wake waishuwira munukuna wake. Ena wakatsvaka pekuchemera; wakaenda mukamera rake, akachemeremwo. ³¹ Wakashamba hope yake, akabudazve. Akadzinyaradza, echitii: “Burai kurha''. ³² Varanda Vakaisa kwake ari ega, nekwavo vari vega. NevaEgipite vakarhya naye vari vega, ngekuti vaEgipite avangarhyi nevaHebheru, ngekuti icho chinyangadzo kuvaEgipite. ³³ Vakagariswa pamberi pake, dangwe kudai ngeutangwe hwaro, nechigumisirwa kudai ngeuchigumisirwa hwacho nevamuna vakaningira umwe neumweni mukushamiswa. ³⁴ Josepha Wakavakoanisira tsima kubva pamberi pake, asi tsima yaBhenjamini yakahwirinzirwa kashanu kune dzavo veshe. Vakamwa, vakadakara naye.