¹ Kwakaita nzara munyika, isikazi kudai ngenzara yaingepo pamazuva aAbrahama. Isaka wakaenda muGera kunaAbhimerekhi mambo wevaFiristia. ² Mambo Mwari wakaoneka kwaari, akati: “Usadzaka Egipite, gara munyika iyo yendinozokuronzera. ³ Ramba urimo munyika imweyo, neni ndinozoapo newe, ndinozokufumisa, ngekuti ndinozopa idzi nyika dzeshe kweuri nekumibarirwana yako, ndinozogwinyisa zwindakapika kunaAbrahama baba ako. ⁴ Ndinozowanza mubharirwana yako kudai ngenyeredzi dzemudenga, nekuzopa dzindza rako nyika idzi dzeshe. kubudikidza ngemubarirwana yako madzinza eshe enyika anozofumiswa. ⁵ Ndichaita izwi, ngekuti Abrahama wakayaeya izwi rangu, akangwarira kupanga kwangu, mirau yangu, zviemeso zvangu nezvironzo zvangu''. ⁶ Isaka wakagara muGera. ⁷ Apo vanhu vendau iyo vakabvunza ngendaa yomukadzi wake, wakati: “Mukunda wangu,” ngekuti wakatya kuronza kuti: “Mukadzi wangu;” Ena wakafunga ega echiiti: “Pamweni vanhu vendau iyi vanozondiuraya ngendaa yaRebheka, ngekuti wainga akanaka pakuningirika.” ⁸ Isaka wainga agarepo nguva yakareba kudaika Abhimerekhi, mambo wevaFiristia, wakaningira ngepafasitera, akaona, Isaka waitamba naRebheka mukadzi wake. ⁹ Abhimerekhi wakadaidza Isaka, akati: “Ningira, mukadzi wako. Saka Wakaronza ngenyi kuti: ‘Mukunda wangu?’ ” Isaka wakadhaira akti kwaari: “Ngekuti ndaitkyira kuti pamweni ndaizofa ngendaa yake.” ¹⁰ Abhimerekhi wakati: “ Ngeyi Waita ichi kwetiri? Kwaizoitika, kuti umwe wevanhu waidai akaatana nemukadzi wako, newe waizounza ndaa padera pedu.” ¹¹ Saka, Abhimerekhi wakapanga vanhu vake veshe echiti: “Uwo unozogwama uyu munhu kana kumukadzi wake, ngegwinyiso unozouraiwa.” ¹² NaIsaka wakakusha mbeu munyikayo, akakukura ngeiro gore zana rakapetwa kunezvakakushwa. Mambo Mwari wakamuropafadza. ¹³ Munhu wakaita gurudza, wakaangirira kuuyirwa nekuuyirwa kubvira waita gurudza guru. ¹⁴ Wainga nepfuma yemakwai, mwombe nevaranda vajinji, nevaFiristia vakaita ndurumwa ndiye. ¹⁵ Nazvo, vaFiristia vainga vafushira zvinyuka zveshe zvakatsiwa ngehloko dzababa ake ngemazuva aAbrahama baba ake, vakazvizarisa ngemavhu. ¹⁶ NaAbhimerekhi wakati kunaIsaka: “Ibva kwetiri, ngekuti waita mukuru kupinda isusu.” ¹⁷ NaIsaka wakabvepo, akaemesa tende rake mubani reGera, akazogarepo. ¹⁸ Isaka wakatsazve zvinyuka zvemvura, izvo zvainga zvakatsiwa ngemazuva aAbrahama baba ake, ngekuti vaFiristia vakazvifushira ngesure kwekufa kwaAbrahama, wakazvidudza mazita awo ezvakadudzwa ndibaba ake. ¹⁹ Asi varanda vaIsaka wakatsa mubani, wakaonepo chinyuka chemvura chinoveruka mvura. ²⁰ Vaushi veGera vakaambana nevaushi vaIsaka vechiti: “Mvura iyi ngeyedu.” Nazvo, Isaka wakadudza zita rechinyuka kuti Eseki, ngekuti vakaita hasha ngenyaya yake. ²¹ Navo vakatsa chinyuka chimweni, vakaambanazve ndicho; ngekudaro wakadudza zita racho kuti Sitina. ²² Ena wakabvepo, akatsa chinyuka chimweni, vona avazi kuambana ngendaa yacho. wakadudza zita racho kuti Rehobhoti, wakati: “ Mambo Mwari zvino wakatiitira ndau, nesu tinozowanda munyika.” ²³ Wakabvepo akakwira kuenda Bheeri-shebha. ²⁴ Mambo Mwari wakaoneka kwaari nge uwo usiku, akati: “Ndiri Mwari waAbrahama baba ako. Usatya, ngokuti ndinewe, ndinozokuropafadza, ndiwanze mubarirwana yako ngendaa yomuranda wangu Abrahama.” ²⁵ Ndizvo wakaakapo arita, akakumbira ngezita raMambo Mwari, wakaemesapo tende rake. Nevaranda vaIsaka vakatsepo chinyuka. ²⁶ Saka Abhimerekhi wakaenda kwaari kubva Gera, naAhuzathi mhangamazano yake, naFikori nduna yehondo yake. ²⁷ Isaka wakati kwaari: “Mwauyireyi kwendiri, kwechioneka kuti munondinyenya, mwakandidzinga kuti ndibve kwemuri? ²⁸ Vakavadhaira vechiti: “Taona pamhene kuti Mambo Mwari unewe. ‘Hino ngakuepo mhiko pakati pako nesu, ngatiite chitenderano newe: ²⁹ kuti usazotishaishira, kudai tisu tisikazi kukugwama, kudai ngezvetisikazi kukuitira chiro asi zvakanaka, tikakuendisa mukunyarara. Zwemwne iwewe ndiwe mutendi waMambo Mwari''. ³⁰ Saka, Isaka Wakavapa dhiri, vakarha nekumwa. ³¹ Vakamukira mangwanani, vakapika mhiko umwe kunoumweni. Isaka wakavaendisa, vakaenda kubva kwaari mukunyarara. ³² Ngezuva ririro varanda dzaIsaka vakauya, vakamuronzera ngendaa yechinyuka chedzakatsa, vakati kwaari: “Taiona mvura.” ³³ Wakachidudza kuti Shibha; ndizvo zita redhorobha rinodaidzwa kuti Bheeri-shebha kubvira nanyamashi. ³⁴ Apo Isau aane makore makumi marongomuna, wakaroora mukadzi Judhithi mwanasikana waBheeri muHiti, naBhasemathi mwanasikana waEroni muHiti. ³⁵ Vona vakaita dambudziko mukupona kwaIsaka nekwaRebheka.