¹ Mambo Mwari wakahambira Sara kudai ngezvaakaronza, naMambo Mwari wakaita kunaSara kudai ngezvaakagondisa. ² NaSara wakaita mimba, wakabarira Abrahama mwana weukuru hwake, munguva dzakaka pimwa ndiMwari sezwaakareketa kwaari. ³ Abrahama wakadudza zita remwanakomana wake mutchetche, uwo wakabarirwa kwaari, waakamubarira Sara, kuti Isaka. ⁴ Abrahama wakacheka wake Isaka apo aane mazuva masere, kudai ngezvaakamupanga Mwari. ⁵ Abrahama wainga nemakore zana apo Isaka mwana wake paakabarwa kwaari. ⁶ Sara wakati: “Mwari wakaita kuti ndisheke; veshe vanozozwa vanozosheka pamwepo neni.” ⁷ Wakati, “Ndiani waizoronza kunaAbrahama kuti Sara unozoamwisa vana? Ngekuti ndamubarira mwana aamusharuka kukuru. ⁸ Nemwana wakakura, akarumurwa; naAbrahama wakanafanira dhiri guru ngeiro zuva rakarumurwa Isaka. ⁹ Asi Sara wakaona mwanakomana waHaga muEgipite waakabarira Abrahama, echiita jee naIsaka, mwana wake. ¹⁰ Hino, wakati kunaAbrahama: “Dzinga uyu murandakadzi newanakomana wake, ngekuti mwanakomana wemukadzi uyu muranda aazogari nhaka pamwepo nemwakomana wangu, Isaka.” ¹¹ Shoko iri rakarwadza kukuru kunaAbrahama, ngendaa yemwanakomana wake. ¹² Asi Mwari wakati kunaAbrahama: “Usarwadziwa ngendaa yemurumbwana, nendaa yomukadzi wako uri muranda. Kunyazwi ngechiri chaanoronza Sara kweuri, chiite kudai ngezvaanoronza; ngokuti kubudikidza ndiIsaka rudzi rwako runozodaidzwa ngezina raIsaka. ¹³ Ndinozoitazve dzinza ngemwana wemukadzi wemuranda, ngekuti ena rudzi rwako.” ¹⁴ Abrahama wakamuruka mangwanani, akatora chingwa nenyede yemvura, akazvipa Haga, echiriisa pakadza pake. Nemwana, akamuendesa. Naye wakabvEpo, akapepesheka mushango reBheeri-shebha. ¹⁵ Apo mvura yainga munyede yapera, wakaisa mwana pashi perimwe remapfiba. ¹⁶ Saka, ena wakaenda akagara pashi pakaringirana naye kamuhambo kokuposhera kwe uta, ngekuti wakati: “Ndisazoona kufa kwemwana.” Ena wakagara akaningirana naye, akaboorera ngeizwi rake, echichema. ¹⁷ Mwari wakazwa izwi romurumbwana, nengirosi yaMwari yakadaidzira kunaHaga iri mudenga, yakati kwaari: “Chiinyi chinokutambudza, Haga? Usatya, ngekuti Mwari wazwa izwi romurumbwana apo paari. ¹⁸ Muruka, umurudze murumbwana, umutengure munyara dzako, ngekuti ndinozomuita dzinza guru.” ¹⁹ Hino, Mwari wakavura madziso ake, akaona chinyuka chemvura. Ena wakaenda akazadza nyede ngemvura, akaipa murumbwana kuti amwe. ²⁰ Mwari wainga nomurumbwana, wakakura; akagara mushango akaita muvhimi ngeuta. ²¹ Ena wakagara mushango rePharani, namai ake vakamutorera mukadzi kubva kunyika yeEgipite. ²² Panguva iyo Abhimerekhi naFikori nduna yehondo yake vakati kunaAbrahama: “Mwari unewe kuneizvo zveshe zvounoita. ²³ Ndizvo, saka pika kwendiri panapa ndiMwari kuti auzondibati ngekuchengedzera inini nokuti mubarirwana wangu nekuti mubarirwana womukororo wangu, asi kudai ngenyasha dzandakaita kwouri, unozondiitira inini nokunyika youri chigarandimo kweiri.” ²⁴ NaAbrahama wakati: “Ndinopika.” ²⁵ Abrahama wakagunun'unira Abhimerekhi ngendaa yechinyuka chemvura, icho chainga chabvukwa ngesimba ngevaranda vaAbhimerekhi. ²⁶ Abhimerekhi wakati: “Andimuzii kuti ndiani wakaita chiro ichi. auzi kundironzera pakutanga, neni andizi kumbozvizwa kubvira nanyamashi.” ²⁷ Saka, Abrahama wakatora makwai nen'ombe akazvipa Abhimerekhi, nevanhu vairi ava vakaita chitenderano. ²⁸ Abrahama wakapaura makwai makadzi manomwe akamaisa ega. ²⁹ NaAbhimerekhi wakati kunaAbrahama: “Chiinyi chinorewa makwai makadzi manomwe ewaisa ega?” ³⁰ Ena wakadaira echiti: “Makwai makadzi manomwe aya unozomatora kubva munyara yangu kuti aite chapupu kwendiri, kuti ndini ndakatsa ichi chinyuka.” ³¹ Saka, ena wakadudza ndau iyo kuti Bheeri-shebha, ngekuti veshe vairi vakapika mhiko. ³² Vona vakaita chitenderano paBheeri-shebha; Abhimerekhi naFikori nduna yehondo yake vakamuruka, vakahwirira kunyika yevaFiristia. ³³ Abrahama wakasima muti wemuthamarisiki muBheeri-shebha, akakumbirepo ngezita raMambo Mwari, Mwari wekuguma nariini. ³⁴ Abrahama wakaramba ari munhu mupara munyika yevaFiristia mazuva akawanda.