2 Zvino Abrama waiya gurudza kakurutu muzvifuyo, sirivha nomukore. 3 Naye wakahamba murwendo rwake kubva Negebhi metsa kuguma Bhetheri, kundau iyo yaiya netende rake pakutanga, pakati peBhetheri neAi.
4 Iyi ndiyo ndau yainga ne arita yainga agadzirira naapo Abrama wakakumbira ngezita raMambo Mwari. 5 Panguwa iyi, Roti, waiperekedza Abrama, waiyawo nemwombe, makwai nematende.
6 Ndizvo nyika aizi kuvakwana, kuti vagare pamwepo, ngokuti pfuma yavo yaiya yakawanda, ndizvo vaiya vasikakoni kugara pamwepo.
7 Pakamuka hasha pakati pevaushi vezvifuyo zvaAbrama nevaushi vezvifuyo zvaRoti. Panguva iyo vaKhenani nevaPherizi vaigara munyikamwo. 8 Zvino Abrama wakati kunaRoti, “ Kusaapo hasha pakati pangu newe, nepakati pevaushi vangu nevaushi vako; ngokuti tiri hama.
9 Nyika yeshe airipopi here pamberi pako? Paradzana neni. Kudai iwewe wechienda kumuoshwe, inini ndinozoenda kumudyo; nokuti kudai wechienda kumudyo, inini ndinozoenda kumuoshwe”. 10 Roti wakamurudza madziso ake, akaona bani reshe reJorodhani, kuti raiya nemvura yakawanda kundau dzeshe, kudai ngomunda waMambo Mwari, wakadai ngenyika yeEgipite munjira inoenda Zoa; izvi zvakaitika ngepamberi Mambo Mwari asati aparadza Sodhoma neGomora.
11 Ndizvo Roti wakadzitsanangurira pachake bani reshe reJorodhani; naRoti wakahamba kuenda kumabvazuva; vakaparadzana umwe kubva kunoumweni. 12 Abrama wakagara munyika yeKhenani, naRoti wakagara mumadhorobha omubani, echindothuthisa tende rake metsa kuguma Sodhoma.
13 Zvino vanhu veSodhoma vaiya vakashata, vashaishi vakurutu pamberi paMambo Mwari. 14 Mambo Mwari wakati kunaAbrama, ngesure apo Roti aparadzana naye:“Zvino mirudza madziso ako uringire kubvira pandau youri, dera kubani, kumabvazuva nokumabirirazuva.
15 Ngokuti nyika yeshe younoona, ndinozoipa kwouri nokune mibarirwana yako mhera nariini. 16 Ndinozoita kuti mibarirwana yako idai ngebukuta renyika, kuti kudai aripo munhu angaerenga bukuta renyika, ngokudaro mibarirwana yako ingaerengwa.
17 Muruka, uhambe padera penyika mukureba kwayo nokupamhama kwayo; ngokuti ndinozoipa kwouri”.
18 Ndizvo Abrama wakathuthisa tende rake, akauya, akagara mumiokhi yeMamure, iri muHebroni, wakaakirapo Mambo Mwari arita.