¹ Hama, kuti munhu abatwa ngechishaishi, imwimwi voMweya muunziridzireyi wakadaro ngemweya wekupfaa, wechidzingwarira iwewe pachako newewo usazoedzwa. ² Twariranai mutwaro, ngekuita kudaro mudzadzise mupango waKristu. ³ Ngokuti dai munhu echifungidzira kuti urinane kupinda vamweni, apo asikavapindi, ena unodzichengedzera pachake. ⁴ Asi munhu weshe ngaaedze mushando wake wemene; neapo unozodzionera kuti ungaganza ngeyi pachake, haiwa ngomushando womuakirwana wake. ⁵ Ngokuti munhu weshe unozodzitwarira mutwaro wake. ⁶ Asi uwo unodzidziswa izwi ngaakoanisirane zviro zveshe zvakanaka nemudzidzisi wake. ⁷ Musachengedzerwa; Mwari aaitirwi jee, ngokuti munhu unovhuna kunyazwi ngechiri chaanokusha. ⁸ Ngokuti uwo unodzikushira nyama yake, unozovhuna kuora kubva kunyama; asi uwo unodzikushira Mweya, unozovhuna kubva kuMweya kupona kusikaperi. ⁹ Tisaremba kuita zvakanaka, ngokuti ngenguva kwayo tinozovhuna, kudai tisikademeri. ¹⁰ Ndizvo zvino kudai ngezvetinayo nguva, ngatishande zvakanaka kunevanhu veshe, kukuru kuneavo

vari vemhuri yokutenda.

¹¹ Munoona kukura kwetsamba yendakanyora kwemuri ngenyara yangu yemene! ¹² Ndivo avo vanoda kuoneka vari vakanaka munyama, vanomuangiridza kuti muchekwe, kwega kuti vasazotambudzwa ngendaa yemuchinjiko waKristu. ¹³ Ngokuti kunyazwi naavo vemene vakachekwa, avangwariri Mupango, asi vanechidisiso chekuti muchekwe kuti vaganze ngenyama yenyu. ¹⁴ Asi kusaitika kuti inini ndiganze ngechiro chimweni asi ngomuchinjiko waMambo wedu Jesu Kristu, kubudikidza ndiwo nyika yakakohomerwa kwendiri, neni ndakakohomerwa kunenyika. ¹⁵ Ngokuti kuchekwa nokuti kusikachekwa akuna shwiro, asi kuita chisikwa chitsva kuri zviro zveshe. ¹⁶ Kunyarara nenyasha ngazvigare padera pavo veshe vanohamba ngouyu murao nepadera pavaIsuraeri vaMwari. ¹⁷ Kubvira zvino kuwaapo munhu unonditambudza, ngekuti ndinotwara pamuiri wangu magotsa aJesu. ¹⁸ Nyasha dzaMambo wedu Jesu Kristu ngadzigare nemweya yenyu, hama. Ameni.