¹ Inini ndinoronza izvi kuti mudyi wenhaka mukuwo weshe waachiri ndumure, aana chaanopinda ndicho muranda, kunyazwi ndiye mambo wazvo zveshe. ² Asi uri pashi pevarindi nevangwariri metsa igume nguva yakaemeswa ndibaba. ³ Ndizvo nesuwo, apo tichiri ndumure, tainga hloko dzemweya yaitonga mundau dzemudenga. ⁴ Asi apo nguva yakwana, Mwari wakatumira Mwana wake wakabarwa ngemudzimai, wakabarirwa pashi peMupango. ⁵ Kuti aripire avo vainga pashi peMupango, kuti tiashire urerwa wekuita vana. ⁶ Ngokuti muri vana, Mwari wakatumira Mweya weMwana wake mukati mwemwoyo yedu, wechidaidzira wechiti, “Abha, Baba!” ⁷ Ndizvo iwewe auchaiti muranda, asi mwana; kudai uri mwana, unogarawo nhaka kubudikidza ndiMwari. ⁸ Kare musati mwazia Mwari, mwainga hloko dzezviro zvechibarirwe zvaiya zvisiri zvimwari. ⁹ Asi zvino mwamuzia Mwari, kukuru kuziikanwa ndiMwari, munoita mapetukireyi sure kuneiyo mweya yekuamba isina simba neyoubemha, yemunoda kusungwazve ndiyo? ¹⁰ Munongwarira mazuva, mwedzi, nguva nemakore. ¹¹ Ndinomutyira, kuti mushando wangu pakati penyu ungaita usina shwiro. ¹² Ndinomupota, hama, itai vakadai ndini, ngekuti inini ndakadai ndimwi, amuzi kundishaishira. ¹³ Zvino munozia kuti indaa yekurwadziwa kwomuiri kwakaita kuti ndichumaire vhangeri kwomuri pakutanga. ¹⁴ kunyazwi kurwara kwangu kwaiya chiedzo kwomuri, amuzi kundinyenya nokuti kundiramba. Asi mwakandiashira kudai ngevanoashira ngirosi yaMwari, kudai ngevanoashira Kristu Jesu. ¹⁵ Kuripari kudakadzwa kwenyu kwemwakazwa? Ngokuti ndinomuitira chapupu imwimwi kuti kudai zvaibvira, mwaizodai mwakabvita madziso enyu mukaapa kwendiri. ¹⁶ Ndizvo ndaita gaa renyu here ngekumuronzera gwinyiso? ¹⁷ Vanotsamwirira kumutsvaka asi haiwa ngenjira yakanaka; vanoda kumukonyera kubanze, kuti imwimwi muvatsamwirire. ¹⁸ Asi zvakanaka kutsamwirirwa ngenjira yakanaka ngenguva dzeshe, haiwa kwega apo ndinemwi. ¹⁹ Vana vangu vadoko, vendinotambudzikira metsa Kristu abarwe mukati mwenyu, ²⁰ Ndaida kuti dai ndaingepo nemwi zvino, kuti nditsandure izwi rangu; ngokuti ndinokangaidzwa ndimwi. ²¹ Ndironzerenyi, imwimwi munoda kutongwa ngeMupango, amupurutani Mupango here? ²² Ngokuti kwakanyorwa kuti, “Abrahama wainga nevana vairi, umwe wakabarwa ngemurandakadzi, neumweni wakabarwa ngomukadzi wakasununguka.” ²³ Asi mwana wemurandakadzi wakabarwa ngokuda kwenyama; asi mwana wemukadzi wakasunungurwha wakabarwa kubudikidza ngechigondiso. ²⁴ Izvi zvinechidzidzo chemuedzaniso, ngekuti vakadzi vairi ava muedzaniso wezvitenderano zviiri. Umwe wevakadzi ndiHaga unobva kumutunhu weSinai, unobara vana vouranda. ²⁵ Zvino Haga idunhu reSinai muArabhia, unoedzaniswa neJerusarema rindoripo, ngekuti uri muusungwa pamwepo nevana vake. ²⁶ Asi mukadzi umweni unoedzaniswa neJerusarema iro remudenga rakasunhurika, ndivo mai edu. ²⁷ Ngokuti kwakanyorwa kuti: “Dakara, iwewe ngomwa usikabari. Pururidza, udaidzire, iwewe usikazi kurwadziwa ngokubara. Ngokuti vanopinda kuwanda vana vomukadzi wakasiiwa kunouwo unemwamuna.” ²⁸ Zvino imwimwi, hama, muri vana vechigondiso kudai ndiIsaka. ²⁹ Asi kudai ngezvakaitika nge iyo nguwa, ena wakabarwa ngokuda kwenyama wakatambudza uwo wakabarwa ngokuda kwoMweya, zvakandodaro nazvino. ³⁰ Asi chinyorwa chinoti kudini? Chinoti, “Dzinga uwo murandakadzi nemwana wake, ngekuti mwana wemurandakadzi aazogari nhaka pamwepo nemwana wemukadzi wakasununguka.” ³¹ Ndizvo hama, isusu atiri vanapi vouwo murandakadzi, asi tiri veuwo wakasununguka.