¹ Naapo magaa avaJudha naaBhenjamini azwa kuti avo vakapetuka kubva kuuhloko vaiakira Mambo Mwari, Mwari waIsuraeri, temperi, ² vakauya kunaZerubhabheri, nokuvakuru vemhatso dzemadzibaba, vakati kwevari, “Ngatiake nemwi, ngokuti tinodira Mwari wenyu, kudai ngezvomunoita; nesu taipira midiro kwaari kubvira pamazuva aEsarihadhoni mambo weAsiria, uwo wakatikwidza uno.” ³ Asi Zerubhabheri, Jeshua nevamweni vevakuru vemhatso dzemadzibaba aIsuraeri vakati kwevari, “Imwimwi amuna chikoaniswa nesu mukuakira Mwari wedu mhatso; asi isusu tega tinozoakira Mambo Mwari, Mwari waIsuraeri, kudai ngokupanga kwaSairusi mambo wePhesia.” ⁴ Zvino vanhu venyika iyo vakarembesa nyara dzevanhu vaJudha, vakavaita kuti vatye kuaka, ⁵ navo vakatengera vanhu vakuru kuti vashaishire urongwa hwavo, mazuva eshe okutonga aSairusi mambo wePhesia metsa mukuwo wokutonga kwaDhariusi mambo wePhesia. ⁶ Mukutonga kwaAhasuerusi, mugore rake rokuamba kutonga, vakanyora tsamba yokumangarira vagari veJudha neveJerusarema. ⁷ Nomumazuva aArthazekizesi, Bhishiramu, Mithiredhathi, Tabheeri, nevamweni vaiya naye vakanyora kunaArthazekizesi mambo wePhesia; netsamba yakanyorwa ngorurumi rwevaAramu, narwo rwakakhumuchwa. ⁸ Rehumu muteeri wamambo mukuru naShimishai munyori vakanyora tsamba kunaArthazekizesi mambo yokuitira ndaa Jerusarema. ⁹ Zvino vakanyora Rehumu muteeri wamambo mukuru, Shimishai munyori pamwepo nevamweni vavo, vatongi, nhumwa, vakuru, vaPhesia, vanhu veErekhi, vaBhabhuroni, vanhu veSusa, ndivo vaEramu, ¹⁰ nemadzinza amweni awo aakadzinga Osinapha, munhu mukuru unembiri, akavagarisa mumadhorobha eSamaria, nomundau dzimweni dzenyika kuguma mberi kwerwizi. ¹¹ . Uku ndikwo kunyorwa kwetsamba yakatumirwa. “KunaArthazekizesi mambo: Varanda vako avo vanhu vari mberi kwerwizi, vanomuchingamidza. ¹² Nazvino ngazviziikanwe kunamambo kuti vaJudha avo vakakwira kubva kwouri vakauya kwetiri vakapetuka Jerusarema. Vanoakisa dhorobha iro rinomukira rakashata; vaakupedza marukumbati nokuakisa matsikiro. ¹³ Ngazviziikanwe zvino kunamambo kuti, kudai dhorobha iri rikaakiswa nemarukumbati aro akapera, avachazobhadhari chibharo, nomuthero wezviro zvokutengesa, nomuthero wepato, ngokudaro vanozotsonza pfuma yamadzimambo. ¹⁴ Zvino ngokuti tinokowana munyu womungome yamambo, nazvo azvichanakiri isusu kuona mambo echitserudzwa, ndizvo tinotumira izwi rokuziisa mambo, ¹⁵ kuti kutsvakisiswe kubva mubhuku rendaa dzemadzibaba ako. Munozoona mubhuku rendaa dzemadzibaba enyu kuti iri dhorobha idhorobha rokumukira, rinoshaishira madzimambo nenyika, nokumusa kumukira mukati mwaro kubvira ngemazuva ekaretu. Ngendaa yeizvi dhorobha iri rakaparadzwa ¹⁶ Tinoziisa mambo kuti dhorobha iri rikaakiswa, nemarukumbati aro akapedzwa, zvino iwewe auzoane chikoaniswa munyika ngeseri kworwizi.” ¹⁷ . Mambo wakatumira mupinguro KunaRehumu muteeri wamambo mukuru, nokunaShimishai munyori, nokunevamweni vavo, vanogara muSamaria nokundau dzeshe dzenyika seri kworwizi, ndinochingamidza. Nazvino ¹⁸ tsamba yemwakatumira kwetiri yakanasa kudzidzwa nokukhumuchwa pamberi pangu. ¹⁹ Ndizvo ndakapanga noumweni wakatsvakisisa, naye wakaona kuti iri dhorobha karetu raimukira madzimambo, kuti kumukira nokugebenga zvakaitwa mukati mwaro. ²⁰ Jerusarema raiya nemadzimambo padera paro vaiya nesimba, vaitonga nyika dzeshe seri kworwizi; kwevaitorayo zvibharo nemithero yokutengesa neyepato. ²¹ Ndizvo panga zvino kuti ava vanhu varekere, kuti iri dhorobha risaakiswa, metsa ndaita mupango umweni. ²² Ngwarai zvino kuti musanonoka pandaa iyi; kushaishirwa kungakura ngenyi kunamambo?” ²³ Zvino apo tsamba yaArthazekizesi mambo yadzidzwa pamberi paRehumu naShimishai munyori naavo vamweni vavo, vakakasira kukwira Jerusarema kuvaJudha, vakavarambidza ngesimba kuti varekere. ²⁴ Panguvayo mushando wemhatso yaMwari wakarekerwa muJerusarema, nawo auzi kuzoangira metsa gore rechipiri rokutonga kwaDhariusi mambo wePhesia.