¹ Naapo mwedzi wechinomwe waguma vana vaIsuraeri vaiya vaa mumadhorobha, vanhu vakaungana pamwepo muJerusarema ² Zvino Jeshua mukororo waJozadhaki, nehama dzake vapristi, naZerubhabheri mukororo waShearitieri, nehama dzake vakamiruka kuaka arita raMwari waIsuraeri, kuti vapirepo midiro yokupisha, kudai ngezvakanyorwa mumupango waMosi munhu waMwari. ³ . Navo vakaemesa arita padera petsikiro raro, ngokuti vaiya mukutya ngendaa yevanhu venyika idzo dzevaigurirana nadzo; navo vakapira midiro yokupisha kunaMambo Mwari padera paro, mangwanani nemadeekoni. ⁴ Navo vakangwarira dhiri rematumba, kudai ngezvakanyorwa, navo vakapira midiro yokupisha zuva ngezuva, kudai ngouwandu wazvo, kudai ngezvakaemeswa zvinodikanwa zvezuva ngezuva, ⁵ nangesure kweizvi vakapira midiro yokupisha yenguva dzeshe, yokutawa kwomwedzi, nemadhiri eshe akaemeswa ndiMambo Mwari, iyo yakacheneswa, neyeavo veshe vakapa kunaMambo Mwari ngokuda. ⁶ . Kubvira ngezuva rokutanga romwedzi wechinomwe vakatanga kupira midiro yokupisha kunaMambo Mwari. Asi tsikiro retemperi raMambo Mwari raiya risati raradzikwa. ⁷ Ndizvo vakapa mare kuneavo vaitsetsa mapuwe, naavo vaitsetsa matanda, nezvokudya, zvokumwa, nemafuta, kuvaSidhoni nevaThire kuti vaunze matanda emisidhari kubva Rebhanoni kuaendesa kuruandhle kuti aende Jopa, kudai ngokutenderwa kwevakatenderwa ndiSairusi mambo wePhesia. ⁸ Mugore rechipiri ngesure kwokuuya kwavo kumhatso yaMwari paJerusarema, ngomwedzi wechipiri, Zerubhabheri mukororo waShearitieri naJeshua mukororo waJozadhaki, vakaita maambo pamwepo nevamweni vevanhu vavo, vapristi nevaRevhi, naavo veshe vaiya vapetuka kuJerusarema vechibva kuusungwa. Vakaemesa vaRevhi vaibvira pamakore makumi mairi nevari padera, kuti varingire mushando wemhatso yaMambo Mwari. ⁹ NaJeshua anevakororo vake nehama dzake, naKadhimieri nevakororo vake, vemibarirwana yaHodhavhia pamwepo nevakororo vaHenadhadhi, vaRevhi, vakororo vavo nehama dzavo pamwepo vakatora mushando wokuringira vashandi mumhatso yaMwari. ¹⁰ . Naapo vaaki varadzika tsikiro retemperi raMambo Mwari, vapristi vakaemeswa vanezvokusimira zvavo zvezvipani vanemagwama, nevaRevhi vakororo vaAsafi vanengome dzavo dzesimbi, kuti vakudze Mambo Mwari kudai ngokuemesa kwaDhavhidha mambo waIsuraeri; ¹¹ navo vakaemba vechidairana, vechikudza nokubonga kunaMambo Mwari, “Ngokuti wakanaka, ngokuti nyasha dzake dzinogara mhera nariini kunaIsuraeri.” Nevanhu veshe vakadaira ngokudaidzira kukurutu, apo pevakakudza Mambo Mwari, ngendaa yokuti tsikiro remhatso yaMambo Mwari rakaradzikwa. ¹² . Asi vazhinji vevapristi nevaRevhi nevakuru vemhatso dzemadzibaba, avo vanhu vakurisa, avo vakaona mhatso yokutanga pamadzeyo ayo, vakachema ngeizwi guru, apo pevakaona mhatso iyi, kunyazwi vazhinji vakadaidzira kakurutu ngokudakara. ¹³ Ndizvo vanhu avazi kukona kuparadzanisa pakati pebope rokudakara nerokuchema kwevanhu, ngokuti vanhu vakadaidzira ngokudaidzira kukuru nebope rakazwika kuretu.