¹ Izvi zvakaitika mumazuva aAhasuerusi, uwo Ahasuerusi ndiye wakatonga padera penyika zana nemakumi mairi nemanomwe kubvira India metsa kuguma Ethiopia. ² Mumazuva awo apo mambo Ahasuerusi paakagara padendemaro roumambo hwake, raiya mungome yeSusa, ³ mugore rechitatu rokutonga kwake, wakaitira dhiri kuneveshe vakuru vake nevaranda vake. Hondo yePhesia neMedhia, vakuru nevatongi venyika, vaiyapo pamberi pake, ⁴ apo paaionisa upfumi hukuru hwoumambo hwake nouthende hwake, nembiri youkuru hwake mazuva akawanda, zana nemakumi masere eshe pamwepo. ⁵ Naapo mazuva aya apera, mambo wakaita dhiri mazuva manomwe reavo vanhu vaiyapo mungome yeSusa, veshe vakuru nevadoko, muruwanze rwengome yamambo. ⁶ Aiyamwo machira akaturikwa akachena akasvipirika, nematema, akasungwa ngetambo dzorukangaza dzakanaka nedzakatsvukuruka pandandazi dzesirivha dzakasungirwa kusika dzemapuwe. Paiya nezvigaro zvaiya zvomukore nezvesirivha, padera peruwanze rwakaakirwa ngemapuwe emaara akatsvuka, matema, akachena neakasvipa ⁷ Zvokumwa zvakamwirwa muzvidziyo zvomukore, zvidziyo zvembeu dzakaparadzana nevhini roumambo rakawanda, kudai ngoukuru hwoumambo hwamambo. ⁸ Kumwa kwaimwiwa kudai ngechironzo; akuna wakaangiridzwa; ngokuti mambo waiya akaemesa chironzo kunevakuru veshe vengome yake, kuti vaite kudai ngokuda kwomunhu weshe. ⁹ Zve, Vhashiti vahosi wakaitira vakadzi dhiri mungome yamambo Ahasuerusi. ¹⁰ Ngezuva rechinomwe apo mwoyo wamambo wechidakara ngevhini, wakapanga Mehumani, Bhizitha, Habhona, Bhigitha, Abhagitha, Zetha naKharkasi, mithenwa minomwe yaishanda pamberi pamambo Ahasuerusi, ¹¹ kuti vaunze Vhashiti vahosi pamberi pamambo, akapfeka dzungudza roumambo, kuitira kuonisa vanhu nevakuru unaku hwake; ngokuti waiya akanaka mukuringirika. ¹² Asi vahosi Vhashiti vakaramba kuuya kudai ngokupanga kwamambo kwakaunzwa ngemithenwa. Ndizvo mambo wakanyangadzwa kakurutu, noushungu hwake hwakabaka mukati mwake. ¹³ Zvino mambo wakabvunza vanhu vakangwara, vaizia ngemipango (ngokuti ndiwo mushuma waaiita mambo kuneavo vaizia mipango netsika ¹⁴ naavo vaigara pasinde pake Kharshena, Shetha, Adhimatha, Tharshishi, Meresi, Marsena naMemukhani, vakuru vanomwe vePhesia naMedhia, vaiona hope yamambo, nevaigara kutanga muumambo ¹⁵ “Kudai ngomupango tinozoitenyi kunavahosi Vhashiti, ngokuti aazi kuita kudai ngokupanga kwamambo Ahasuerusi kwakaronzwa ngemithenwa?” ¹⁶ Zvino Memukhani wakapingura pamberi pamambo nepamberi pevakuru vake, “Vhashiti vahosi aazi kushaisha kunamambo ega, asi nokuvakuru vake veshe, nokuvanhu veshe vari munyika dzeshe dzaAhasuerusi mambo. ¹⁷ Ngokuti ichi chiito chavahosi chinozozwika kuvakadzi veshe, zvinozoita kuti vakadzi vatange kushoora vamuna vavo vanozoti, ‘Mambo Ahasuerusi wakapanga vahosi Vhashiti kuti aunzwe pamberi pake, asi iye wakaramba kuuya.’ ¹⁸ Ngezuva iri vakadzi vakuru vePhesia neMedhia vaiya vazwa ngokuita kwavahosi vanozoshoora vakuru vamambo, nakwo akuzoperi kushoorwa kwakakura noushungu ¹⁹ Kudai zvechidakadza mambo, ngaaemese mupango woumambo unobva kwaari, nawo ngaunyorwe pakati pemipango yevaPhesia nevaMedhia, kuti usazoshandurwa, kuti Vhashiti vasachazouyazve pamberi pamambo Ahasuerusi; namambo ngaape ndau yake youhosi kunoumweni wakanaka kupinda iye. ²⁰ Ndizvo mupango wamambo waanozoemesa unozodaidzirwa muumambo hwake hweshe (ngokuti huri hukuru,) vakadzi veshe vanozoremeredza vamuna vavo, zvakaedzana vakuru nevadoko.” ²¹ Izwi iri rokupanga rakadakadza mambo nevakuru, namambo wakaita kudai ngeizwi raMemukhani. ²² Wakatumira tsamba kunyika dzeshe dzoumambo hwake, kunyika yeshe kudai ngokunyora kwayo, kumunhu weshe kudai ngendimi yake, kudaidzira kuti mwamuna weshe atonge mumhatso yake. Ngaaerekete ngendimi yevanhu vake.