¹ Naapo taparadzana navo, takahamba ngengarava tikarurama kuenda Khosi, ngezuva raiteera takaguma Rodhesi nokubvapo takaguma Patara. ² Taona ngarava yaiambuka kuenda Foenisia, takapoteramwo, takahamba. ³ Naapo taona Saipurasi, takarisiya ngokumuoshwe, takahamba kuenda Siria, tikaguma Thire; ngokuti apo ngarava yaibudiswa mitwaro yayo. ⁴ Techiona vadzidzi, takagarapo mazuva manomwe. Kubudikidza ndiMweya Wakachena vakaronzera Phauri kuti asakwira Jerusarema. ⁵ Naapo tapedzapo mazuva edu, takabvapo, tikaenda rwendo rwedu; navo veshe pamwepo nevakadzi vavo nevana vakatiperekedza metsa takabuda mudhorobha; tikagwadama pahumbikumbi yoruandhle, takakumbira. ⁶ Naapo takavhaisana, takapotera mungarava, navo vakahwirira kanyi. ⁷ Naapo tapedza rwendo kubva Thire, takaguma Putoremaisi; nesu takachingamidza vatendi, takagara navo zuva rimwe., ⁸ Nechimangwani takabvapo, takaguma Sizaria: takapotera mumhatso yaFiripu muvhangeri, uwo waiya umwe wevanomwe, takagara naye. ⁹ Waiya nevasikana varongomuna, mhandara, avo vaiprofeta. ¹⁰ Naapo tichagarapo mazuva mazhinji, kwakadzaka muprofeti waibva Judhia, waizwi Agabhusi. ¹¹ Echiuya kwetiri, wakatora bhande raPhauri, wakadzisunga tsoka dzake nenyara, akati: “Unoronza izvi Mweya Wakachena, ‘Ngokudaro vaJudha vari muJerusarema vanozosunga munewebhande iri, vanozomupira munyara dzevemadzinza.’ ” ¹⁴ Naapo asikazi kutenda kupotwa, takanyarara techiti: “Kuda kwaMambo ngakuitike.” ¹³ Zvino Phauri wakapingura, akati: “Munoitenyi mwechichema nokutambudza mwoyo wangu? Ngokuti inini ndakanasirira haiwa kusungwa kwega, asi nokufira zina raMambo Jesu muJerusarema.” ¹² Naapo tazwa izvi, teshe, isusu nevanhu veiyo ndau, taimupota kuti asakwira Jerusarema. ¹⁵ Mazuva aya apera, takatora nhumbi dzedu, takakwira Jerusarema. ¹⁶ Vakahambawo nesu vamweni vevadzidzi vaibva Sizaria, vakauya kumhatso yomunhu unozwi Nasoni weSaipurasi, mudzidzi wokutanga, wetaizogara mumhatso mwake. ¹⁷ Naapo taguma Jerusarema, vatendi vakatiashira ngokudakara. ¹⁸ Ngezuva raiteera Phauri wakaenda nesu kunaJakobe; nevanhu vakuru veshe vaiyapo. ¹⁹ Naapo avachingamidza, wakaerengudza chimwe ngachimwe ngokuteererana kwazvo izvo zvaakaita Mwari pakati pevemadzinza ngokushanda kwake. ²⁰ Naapo vazvizwa, vakakudza Mwari. Vakati kwaari: “Unoona, hama, kuwanda kwemakumi emazana eavo vakatenda pakati pevaJudha; navo veshe vanotsamwirira muMipango. ²¹ Zvino vakaronzerwa kuti iwewe unodzidzisa vaJudha veshe vari pakati pevemadzinza kuti varambe zvaMosi, wechivaronzera kuti vasacheka vana vavo nokuti vasangwarira mishuma. ²² Zvino toitenyi? Ngegwinyiso vanozozwa kuti iwewe wauya. ²³ Ndizvo ita izvi zvetinokuronzera. Tine vanhu varongomuna pano vakapika mhiko. ²⁴ Tora vanhu ava udzichenese pachako navo, uvabhadharire zveshe zvavo, kuti vapare masoro avo. Ndizvo veshe vanozozia kuti apana gwinyiso pane izvo zveshe zvevakaronzerwa ngendaa yako, asi kuti iwewe wemene unonasa kuhamba, wechingwarira Mipango. ²⁵ Asi ngendaa yeavo vemadzinza vakatenda, takanyora tsamba, techigura kuti vadzingwarire kubva pane zvinobairwa miedzaniso yokudira nengazi neizvo zvinodzipwa nokuomba.” ²⁶ Zvino Phauri wakatora vanhu avo, ngezuva raiteera akadzichenesa pachake, wakapotera muTemperi navo, echionisa pamhene kuzadzisika kwemazuva okucheneswa, metsa mudiro wakapirwa ngendaa yaumwe ngaumwe wavo. ²⁹ Naapo mazuva manomwe ooda kupera, vaJudha vaibva Asia, avo vamuona ari muTemperi vakavherudza mbungano yeshe, vakamubata. ²⁸ vechidaidzira: “Vanhu vaIsuraeri, detserai! Uyu ndiye munhu unodzidzisa vanhu veshe kundau dzeshe kurwisana navanhu neMipango neiyi ndau; ndiyezve wakaunza vaGiriki muTemperi, wakasvipisa iyi ndau yakachena.” ²⁷ Ngokuti vaiya vakaona Trofimusi muEfesu anaye mudhorobha, vakapinimidza kuti Phauri wakamuunza muTemperi. ³⁰ Nedhorobha reshe rakavherudzwa, nevanhu vakarumba pamwepo. Navo vakabata Phauri, vakamukweyera kubanze kweTemperi; paripo misiwo yakakonywa. ³¹ Naapo vachatsvaka kumuuraya, izwi rakaguma kunduna huru yemakumi emazana, kuti Jerusarema reshe raiya nehohoho. ³² Paripo wakatora majoni nenduna dzemazana, akarumba kudzaka kwavari; naapo vaona nduna huru nemajoni, vakarekera kuponda Phauri. ³³ Naapo nduna huru yakakwedzera, ikamubata, ikapanga kuti asungwe ngemaketani mairi; ikabvunza kuti ndiani nokuti waitenyi. ³⁴ Vamweni pakati pembungano vakadaidzira chiro chimwe, vamweni chimweni; naapo yakorera kuzia gwinyiso ngendaa yehohoho, yakapanga kuti aunzwe kumhatso yevarwi vehondo. ³⁵ Naapo aguma pamakwiro, wakatwarwa ngemajoni ngendaa yebope rembungano. ³⁶ Ngokuti mbungano yakateera ngesure, yechidaidzira yechiti: “Muurayenyi!” ³⁷ Naapo vooda kuunza Phauri mumhatso yevarwi, wakati kunenduna huru: “Ndingatenderwa here kuereketa chiro kwouri?” Naye wakati kwaari: “Unozia chiGiriki here? ³⁸ Andiwepi muEgipite, uwo pamazuva apera wakavherudza vanhu kumukira, akaenda mushango nevaurayi mazana makumi marongomuna here?” ³⁹ Phauri wakati: “Inini ndiri muJudha, unobva Tarsusi reSirisia, wakabarwa mudhorobha guru rine mbiri; ndinokupota, nditendere ndierekete kuvanhu.” ⁴⁰ Naapo amutendera, Phauri echiema pamakwiro wakakopera vanhu ngenyara; naapo kwaiyapo kunyarara kukuru, iye wakaereketa kwavari ngendimi yechiHebheru echiti.