¹ Bope rakati ranyarara, Phauri wakadaidza vadzidzi, wakavagwinyisa, akavavhaisa, wakabvapo akaenda Masedhonia. ² Naapo ahamba ngemundau idzo, echivagwinyisa ngemazwi mazhinji, wakaguma Giris. ³ Wakapedzamwo mwedzi mitatu. VaJudha vakapangana kumurwisa, apo echirongedza kuhamba ngengarava kuenda Siria, wakadziemesera kuhwirira echihamba ngemuMasedhonia., ⁴ Wakaperekedzwa kuguma Asia ndiSopata, mukororo waPhirusi weBheria, naAristakusi naSekundusi veThesaronika, Gaiusi weDhebhe, Thimothi, Thichikusi naTrofimusi veAsia. ⁵ Ava vakatungamira mberi, vakatigarira muTroasi; ⁶ asi isusu takahamba ngengarava kubva Firipi ngesure kwemazuva eChingwa chisina Mumera, takaguma kwavari muTroasi ngesure kwemazuva mashanu; takagarapo mazuva manomwe. ⁷ Nangezuva rokutanga revhiki, apo taungana kugura chingwa, Phauri wakaereketa kwavari; echida kubvapo nechimangwani, wakaangira kuereketa kwake metsa pakati pousiku. ⁸ Zvaiyapo zvibani zvakawanda mukamera romuturikwa umwo mwetakaungana. ⁹ Jaha, raizwi Utikusi, raiya rakagara pachiwindo, rakabatwa ngehope dzemadzikirira apo Phauri acharebesa kuereketa kwake; iro rechinyiswa ngehope dzaro, rakawa kubva kumuturikwa wechitatu, navo vakarimirudza rafa. ¹⁰ Asi Phauri wakadzaka, akakotama padera pake, akamufungatira, akati: “Musatambudzika, ngokuti uchapona.” ¹¹ Naapo akwira mumuturikwa, wakagura chingwa, akadya, wakaangira kuereketa navo mukuwo wakareba, metsa kwakaedza; ngokudaro wakabvapo. ¹² Navo vakaunza jaha rechizwa, vakaembedzerwa kakawanda. ¹³ Asi isusu, takatanga kuenda kungarava, takahamba ngengarava kuenda Asosi, apo techikarira kutorapo Phauri; ngokuti ndiye waiya aronga kudaro, echida pachake kuhamba ngetsoka. ¹⁴ Naapo ashongana nesu muAsosi, takamukwidza mungarava, tikaenda Mitureni. ¹⁵ Techihamba kubvapo ngezuva raiteera, takaguma kundau yakaringirana neKhiosi. Ngezuva raiteera takaguma Samosi; ngezuva raiteera, takaguma Miretusi. ¹⁶ Ngokuti Phauri wakadziemesera kuhamba ngengarava kudarika Efesu, kuti asazopedza mukuwo muAsia; ngokuti waikasira, kuti kudai echikona ungaguma Jerusarema ngezuva rePentekosti. ¹⁷ Ari muMiretusi wakatumira izwi Efesu, kuti vauye kwaari vakuru vechiara. ¹⁸ Naapo vaguma kwaari, wakati kwavari, “Imwimwi mwemene munozia kugara kwangu pakati penyu nguva dzeshe kubvira ngezuva rokutanga rendakatsika tsoka muAsia, ¹⁹ ndechishandira Mambo ngokupfaa kweshe kwomupinimidzo nemasodzi, nokuedzwa ukwo kwakandigumira kubudikidza ngokurwiswa ngevaJudha. ²⁰ Andizi kutya kuita kwomuri chiro chinomudetsera, ndechichumaira izwi kwomuri nokumudzidzisa pamhene, kubva kumhatso kuenda kumhatso, ²¹ ndechivapanga kakurutu veshe vaJudha navaGiriki ngendaa yokutenderuka kunaMwari nokugonda kunaMambo wedu Jesu. ²² Zvino, ringira, ndinoenda Jerusarema, ndakasungwa muMweya, ndisikazii izvo zvinozondigumira apo; ²³ asi kuti Mweya Wakachena unondipupurira mumadhorobha eshe kuti kusungwa nokutambudzwa kunondigarira. ²⁴ Asi andierengi kupona kwangu kuita chiro chinodikanwa kwendiri, kuti ndipedze bingo rangu, nomushando wendakaashira kubva kunaMambo Jesu kuchumaira vhangeri renyasha dzaMwari. ²⁵ “Zvino, ringirai, inini ndinozia kuti imwimwi mweshe mwendakahambira pakati penyu ndechichumaira umambo, amuchazoonizve hope yangu. ²⁶ Ndizvo ndinopupura kwomuri ngeiri zuva kuti ndakachena kune ngazi yenyu yeshe, ²⁷ ngokuti andizi kuumira kumuronzera kupanga kweshe kwaMwari. ²⁸ Dzingwarirenyi imwimwi pachenyu nedanga reshe remwakaemeswa padera paro ndiMweya Wakachena, kuti muite vangwariri varo, muushe chiara chaMwari, chaakatenga ngengazi yoMwana wake emene. ²⁹ Ndinozia kuti ngesure kwokuenda kwangu, mathika anokara anozopotera pakati penyu, asina nyasha kudanga. ³⁰ Vamweni vanobva pakati penyu pemene vanozobuda vanhu, vechiereketa manyepo kupausa vadzidzi kuti vavateere. ³¹ Ndizvo rindai, mwechikarakadza kuti ngomukuwo wemakore matatu andizi kurekera kupanga mweshe umwe ngaumwe wenyu usiku nemasikati, ndechichema masodzi. ³² Nazvino ndinomupira kunaMwari nokuizwi renyasha dzake, iro rine simba rokumuaka nokumupa nhaka pakati pavo veshe vakacheneswa. ³³ Andizi kuemura sirivha nokuti mukore nokuti zvokufuka zvomunhu. ³⁴ Imwimwi mwemwene munozia kuti idzi nyara dzakashandira izvo zvendaitama, nezveavo vaiya neni. ³⁵ Ngezviro zveshe ndakamupa chionero, kuti ngokushanda kudaro tinosisira kuti tidetsere avo vasina simba, nokukarakadza mazwi aMambo Jesu, kudai ngezvaakaronza emene echiti: ‘Kunopinda kudakadza kupa kunokuashira.’ ” ³⁶ Naapo aereketa kudaro wakagwadama pashi, akakumbira navo veshe. ³⁷ Navo veshe vakachema masodzi, vakamumbundira Phauri, vakamuvhaisa ngomuromo, ³⁸ vechitambudzika kakurutu ngeizwi raakaereketa, kuti avachazomboonizve hope yake. Vakamuperekedza kuenda kungarava.