¹ Mudikani Thofireusi, ndakanyora mubhuku rokutanga zveshe zvaakatanga kuita Jesu nokudzidzisa, ² metsa kuguma pazuva iro raakaashirwa mudenga, apedza kupanga kubudikidza ndiMweya Wakachena vapostori avo vaaiya akatsanangura. ³ Kwavari wakadzionisa ari unopona ngesure kwokutambudzika kwake ngenjira dzinoonisa gwinyiso dzakawanda, echioneka kwavari kazhinji pakati pemazuva makumi marongomuna, echiereketa ngendaa youmambo hwaMwari. ⁴ Echigara pamwepo navo wakavapanga kuti vasazobva muJerusarema, asi kuti vagarire chigondiso chaBaba: “Icho chemwakazwa kubva kwendiri; ⁵ ngokuti Johani wakabhabhatidza ngemvura, asi imwimwi munozobhabhatidzwa ndiMweya Wakachena ngesure kwemazuva mashomani.” ⁶ Ndizvo, apo vaiya vaungana, vakamubvunza vechiti: “Mambo, ngouyu mukuwo unozohwirinza umambo kunaIsuraeri here?” ⁷ Wakati kwavari, “Andizvopi zvenyu kuti muzie mikuwo nokuti nguva, izvo zvaakangwarira Baba pashi pesimba rake emene. ⁸ Asi munozoashira simba apo Mweya Wakachena auya padera penyu; nemwi munozoita zvapupu zvangu muJerusarema, muJudhia mweshe, muSamaria nokumagumo enyika.” ⁹ Naapo aiya aronza izvi, vacharingira, iye wakamirudzwa kuenda mudenga, negore rakamuashira kumufisha kubva mukuona kwavo. ¹⁰ Kwakati vacharingisisa mudenga echikwira, penya, vanhu vairi vakaema pasinde pavo, vane zvokupfeka zvakachena. ¹¹ Vakati: “Vamuna veGarire, munoema ngenyi mwechiringira mudenga? Uyu Jesu watorwa kubva kwomuri kuenda mudenga, unozouyazve kudai ngezvemwamuona echienda mudenga.” ¹² Zvino vakapetuka Jerusarema, kubva paMutunhu wemaOrivhi, uri pasinde peJerusarema, muhambo wezuva reSabatha. ¹³ naapo vaiya vapoteramwo, vakakwira mukamera romuturikwa, umwo mwevaigara, Petro, Johani, Jakobe naAndreu, Firipu, Thomasi Bhathoromeu, Mateu, Jakobe, mukororo waArifeusi, Simoni muZeroti naJudhasi, mukororo waJakobe. ¹⁴ Ava veshe vakaangirira kukumbira ngechisungo chimwe, pamwepo nemadzimai, naMaria mai aJesu, nevanun'una vake. ¹⁵ Mumazuva awo Petro wakaema pakati pevatendi, (uwandu hwevanhu vaiyapo hwaiya hwechida kuguma zana nemakumi mairi,) akati: ¹⁶ “Hama, kunodikanwa kuti chinyorwa chizadzisike, icho chakaereketwa karetu ndiMweya Wakachena kubudikidza ngomuromo waDhavhidha ngendaa yaJudhasi uwo wakaita mutungamiriri weavo vakabata Jesu. ¹⁷ Ngokuti iye wakaerengwa pamwepo nesu, akaashira chikoaniswa chake chouyu mushando.” ¹⁸ (Zvino munhu uyu wakatenga munda ngomutuso wokusikarurama kwake; naye echiwa ngetsukupinya wakaputika ndani, nematumbu ake eshe akabuda. ¹⁹ Zvakaziikanwa ngevagari veshe veJerusarema, ndizvo munda uwo wakadudzwa ngorurumi rwavo kuti, “Akeredhama,” ukwo kunoti, “Munda weNgazi.”), ²⁰ “Ngokuti kwakanyorwa mubhuku reNdwiyo kuti, ‘Ugaro hwake ngahuite shango, munhu asagara mukati mwahwo;’ ‘Mushando wake ngautorwe ngoumweni.’ ²¹ kubvira parubhabhatidzo rwaJohani metsa kuguma pazuva raakatorwa mudenga kubva kwetiri, umwe wavo unosisira kuita chapupu nesu chokumuka kwake kubva kwevakafa.” ²² “Ndizvo umwe wevanhu vakahamba nesu ngomukuwo weshe waakapotera nokubuda Mambo Jesu pakati pedu, ²³ Ndizvo vakaemesa vairi, Josefa waizwi Bharsabhasi, uwo mutupo wake waizwi Justusi, naMathiasi. ²⁴ Vakakumbira vakati: “Iwewe, Mambo, unozia mwoyo yevanhu veshe, wonisa pakati peava vairi uwo wewakatsanangura, ²⁵ kuti atore rupande rwouyu mushando noupostori, hwaakapauka Judhasi kubva kwouri, kuti aende kuugaro hwake.” ²⁶ Navo vakavaitira mabhigidha; nemabhigidha akabata Mathiasi; naye wakaerengwa pamwepo nevapostori vari gumi naumwe.