¹ Ndizvo ndinopota vakuru vari pakati penyu, kudaiwo ndini ndiri mukuru pamwepo nemwi, nechapupu chemadambudziko aKristu, nounoashirawo utswene unozooniswa. ² Ushai muhlambi waMwari waakaisa pashi penyu, haiwa ngokuangiridzwa, asi ngokuda, kudai ngokuda kwaMwari; haiwa kuti muuyirwe ngemare inetsvina, asi ngokudisisa. ³ Musikaiti kudai ngevatongi padera pezvakakoanisirwa kwomuri, asi mwechiita zvionero kumuhlambi. ⁴ Apo Muushi mukuru paanozooniwa, munozoashira dzungudza routhende risikazoperi. ⁵ Ngokudaro imwimwi vadoko pfairai vakuru. Eya, imwimwi mweshe dzisimidzei ngokupfaa mukushandirana umwe noumweni, ngokuti Mwari unorwisana nevanodzikudza, asi unopa nyasha kunevakapfaa. ⁶ Ndizvo dzininipisei pashi penyara yaMwari inesimba, kuti amutunhumadze ngoengva unofanira. ⁷ Kandirai kweshe kuneseka kwenyu padera pake, ngokuti unonyera ndimwi. ⁸ Svinurai, murinde. Gaa renyu dhiabhorosi rinohamba-hamba kudai ngemhondoro inorira, rechitsvaka avo veringadya. ⁹ Murwe naye mwakagwinya mukugonda kwenyu, mwechizia kuti madambudziko akatodzana anogumira hama dzenyu munyika dzeshe. ¹⁰ Zvino Mwari wenyasha dzeshe, uwo wakamudaidza kuutswene wake usikaperi uri munaKristu Jesu, mwambotambudzika munguva mudoko, ena emene unozomupererisa, unozomuemesa, unozomugwinyisa nekumutseya. ¹¹ Kwaari ngakugare kunesimba mhera nariini nariini. Ameni. ¹² Ndakanyora kwomuri ngokufupisa kubudikidza ndiSirivhanusi, hama yedu inogondeka kudai ngezvendinofunga, ndechimugwinyisa nokupupura kuti idzi ndidzo nyasha dzaMwari dzegwinyiso. Emai mwakagwinya mwedziri. ¹³ Chiara chiri muBhabhuroni, chakaketwa pamwepo nemwi, chinomutambisa; ngekudaro Marako mwanao wangu. ¹⁴ Chingamidzanai ngemuromo umwe noumweni ngorudo. Kunyarara ngakugare kwomuri mweshe muri munaKristu.