¹ Ei du, ei du qi kwaya i va vatikem ko ei lia ei tam rusui na matamata ni ba ni sivi qa kadre mai i na lia leqwa e tiki o koya na drivadriva qa lawaki cakaca. ² O koya ei rusu mai i matamata o koya kwe na dau vatawa sivi. ³ E i dolavia i vua na i vatawa ni matamata. O kora na sivi e re varogo e lio, qa covi kora lea sivi i na medra yaca du qa teiteimata taki ni kora o tevai. ⁴ Ni sa mei kora coko mai i teba lea sivi, ei teiteimata i vuara, qa re takucia, ni re kilatia e lio. ⁵ E re na dua ni takuicia ei lia ei tenilia, ia e rena tuba dei nia, ni re tam kilatia e lio na koi teni. ⁶ A tata no o Jisu i na tata va tautauvata kwe, ia a re tam qara lau nia no na bonu ni vitukutuku a vecera no. ⁷ Sa qei kwaya leqwa o Jisu i vuara,"Ei du, ei duqi kwaya i va vatikem, o au na matamata ni ba ni sivi. ⁸ O kora coko a re teimata mai i va au, ei tia drivadriva qa nakinaki cakaca. ⁹ O au na matamata, maga ei lia ei rusu mai va au, ei na vacolai, ei na dau rusu mai qa rusu yati qa dania na kea. ¹⁰ Na dau driva ei tam laka sese boto mai,ei mai driva qa vivamatei qa vivarusai. Qi laka mai me re mai rewatia na cola qa na cola ei sinai vutuvutu. ¹¹ O au na i vatawa ni sivi vina, qi deinia lequ cola me baleti kora na sivi. ¹² Nai vatawa visaumitaki lea cakacaka ei tam tia i vakatawa ni sivi qa tam lea muni na sivi. Ni dania na oliva ni laka mai ei dei ni kora tu na sivi qa tuba, na oliva sa qei tubataki nira qa vasesea nira. ¹³ E i tubaraki ni kora baletia ei tau kea i sau lea viqwaravi qa tam numira na sivi. ¹⁴ O au nai vatawa ni sivi vina qi kilati kora e re leqi au qa re kilati au muni. ¹⁵ O Vava ei kilati au, qa qu kilati koya minu, qi deinia lequ cola me baletira na sivi. ¹⁶ E re sewa lequ sivi e re si tam no vali i na buto ni ba ni sivi kwe, mequ mei kora muni mai buto, me qei lia boto na i korokoro na sivi qa lia boto kedra i vatawa. ¹⁷ Ko kwe e vu ei lomani au ka o Tamai au. Qi deinia yati lequ cola me rewa ni qu qaratia leqwa. ¹⁸ E i lala me valia dei mai i va au, ia qi deinia vataki ni au. E i leqi au na lewa mequ deinia civo qa na lewa mequ qaratia leqwa i yata. Nai vakaro kwe ei vagani au o Tamai au" ¹⁹ Ei tase ei lia na vidre i vuara na koi Jutia baletia na vitukutuku raki kwe. ²⁰ Ei lia na vuni no e re kwaya," Sa waqania ei lia na nitu qa lialia vasivia. Na yava o ba varogo i koya no ka?" ²¹ A re sewa a re kwaya," Ko kwe ei tam lea tata ei lia ei waqania na nitu. Ei rewa i vua ei lia na nitu me dolavia na mata cika?" ^{22 23 24} Sa donumaki nia na so-levu ni vasavasavataki, qa viyatoyaki vali o Jisu i were ni soro i na varada lei Solomoni. A re cedrevia mai na Jiu qa re cacania,"I vei me wetai na tutuni lem qulumi kemam tu me mam vituyaki tu? Maga ei niko du na Karisito, vece i kemam vacece" ²⁵ A kwaya i vuara o Jisu," Qu sa vece i vatikem rewa qo ba tam vakabautia. ²⁶ Na vicakacaka qi tara i e yaca o Tamai au, na vikwa kwe e re vadudutaki ni au. Ia o ba dua ni vabautia baletia tam ni vatikem lequ sivi. ²⁷ O kora lequ sivi e re rogo qu lio, qi kilati kora, qa re takuci au. ²⁸ Qi vagani kora a cola ei tam mudu, e re na tam cigido rewa, qa na lala lia me vaci kora dei rewa mai qu lima. ²⁹ O Tama i au, ko a vagani kora mai i va au, ei tetelagi talia i vuara coko, qa na tam rewa ni lia me vali kora dei mai e lima o Tama i au. ³⁰ O au qa Tamai au e ri liabau. ³¹ A re sa mata virilaki ni Jisu leqwa i na vatu o kora na Jiu. ³² Sa kwaya leqwa o Jisui vuara,"Qu sa vatakea i va vatikem ei bi na cakacaka vina mai va Tama i au. Na yava i vuara na cakacaka kwe o ba mata virilaki ni au ka i na vatu?". ³³ A re vecei koya lesu na koi Jiu," A ru tam virilaki ni iko baletia lem tata vakaca, ni o iko, na tamatae sa sagatiko mo tia Kalou. ³⁴ A vecera o Jisu," Ei tam volai tu i na vatilem lawa," Qi kwaya," O ba tia Kalou"? ³⁵ Ni sa covi kora me re Kalou, o koya a laka mai vuanai Vola Tabu.[e i tam duku tautau nai Vola Tabu]. ³⁶ Ei rewa vakayava mo kwayai vua ko a tikicia vatikitiki mai o Tamaya, qa vatala mai i vuravura, " O iko e vivacacani, baletia ni qu kwaya ," O au na luve ni Kalou?" ³⁷ Ko qi tam tara no na cakcaka lei Tamai au, ba kua ni vakabauti au. ³⁸ Ia maga qi taro no, vitalia mo ba dua ni vakabauti au, ia ba vakabautia na cakacaka me rewa ni o ba kilatia qa ligocia rewa ni o Tama i au ei cola i va au o au muni qi cola i vua" ³⁹ A re sagatia me re sobetia leqwa, ia qa re qulu wadru cia. ⁴⁰ A laka sivitia leqwa na Joritani, i na vanua a vavitaiso teimata vali ka o Jisu, qa lai no vali ka. ⁴¹ A re bi coko a re laka mai i vua qa re mai kwaya," A lala lia du nai vatakilakila a tara o Joni, ia na vikwa coko a kwaya o Joni me baletia na tamata kwe ei du" ⁴² Sa tia vu ni no vina muni na tamata a re sa vabauti koya mai so keni.