¹ kali mwahe munaloela kukala afundishi, mwa apange, komulimuka ci atwe tufundisha kenge tuka atuliwa nene. ² Mukonda twahetwe episha muma kun'wa o angi. Ngeci yumweya ka ipisha mu maywi, oyo munu olishiwa, atwesha shaanga kunyunga elema yenji. ³ Honine ngeci tupake inu mutunwa two lukambe ci tutuyuve, twatwesha kalo kunehethza elama yo yoihe. ⁴ Mulimuke ci shanga isepe, shaanga ci ikulu nene unone yaendishiwa ku mipepo thzo thzikolo, ya endishiwa ku muthila o sho thzu-thzu nene oko anahimi muka kuendisha. ⁵ Mulikun'wa lyo kengeyo, lulimi nalo shanga ci shilama sho shionye, lwa lishangala muinu yo shokulu. Mu limuke ci mulilo o uonye watumeka mulundu osho kulunene. ⁶ Lulimi nalo mulilo, ko umango kana pakiwa mukaci ko elama. Lulimi lwa episha elama yoihe, lwa fakala mulilo mu moyo wetu wouhe, ne luna lifakalela mulilo wo lihele. ⁷ Mukonda iyama yoihe, inyunyi, nei ienda no mala, nei yoihe iyoya mulikululwale, ya amuniwa kalo na imuniwa ku munu. ⁸ Unone kwithsa munu oyu twesha ku muna lulimi. Luli no mango wo, ko kuyala shifa sho kupaa. ⁹ Ko olu twa shangala Fumu no Tata, kalo ko lululimitwa tuka anu, ao ano mbiwa mukulipitula na Nyambi. ¹⁰ Mukamwa kofoci mwa tunda fiyauthzi no kukuta. Apange, ei inu ya ku kwamahala. ¹¹ Nehoni lishima lya twesha kupunisha meyu o atowi no a walulu? ¹² Nehoni shitondo sho veine shipake Feiga? Shaanga lishima lyo meyu o mungwa kupunisha meyu oa towi. ¹³ Elye muka kunyanyama no kuyuvishisha mukaci kenu? Mushiye oyu munu amonishe moyo o uwa ko ekwama yenji mu uno o munyanyami. ¹⁴ Unone ngeci muli no shipululu sho shilulu no likan'i mu micima thzenu, katele mulishangale no ku angela ku alukela inu yo shemwa. ¹⁵ Ou kali oliyo onyanyami una kutundelela ku wilu. Unone, wo pano pashi wa thzimu, no mipepo thzo thzimango. ¹⁶ Mukonda apa palishipululu no likan'i, poliyo pali kukana kuliyuwa no ikwama yo umango wouhe. ¹⁷ Unone onyanyami utunda kuwilu po matatekelo o owa, ne kuliyala - kuima, shiemo, utokwa, n'eke thzo thzikulu, no ushuka owuwa, kukana kuangula no ku sepahala. ¹⁸ Ushuka wo kuluka wa kuniwa mu kuliyala mukaci kawo akwama kuliyala.