¹ Apange, kulitawa kwetu kwa Fumu Jesu Kilesite, Fumu o kutethzima, kwakala ko kuhangula anu. ² Ngeci akopo kuingena munu oyu navata kathzeya no ito yoiwa omu munaliwana, ne kalo akopo kuingena munu o shihutu oyu navata ito yo mathzilo. ³ Ngeci amwepo mutaneka oyu navata ito yoiwa no kuamba ci, ''Okongomane apa pa wikalo ouwa,'' unone mwaambela oyo munu o shihutu ci, ''Oimane paya'' nji ''Okongomane kunyonga thzo maulu o shipula shange,'' ⁴ oko kali kuatula mukaci kenu? apo kamupilukile aka kuatula o maayalo oamango? ⁵ Muteelele, amwe apange nihima, Nyambi kahangulile ehutu yo mukaye ci apiluke akwa kufuma mu shitawao ne apiluke aka kushwana ofumu ou nakulupelisha awa amuhima? ⁶ Unone munashwaula ehutu! Aka kufuma kali woilyo amilyatelela? Kali woliyo amikokela ku kuta? ⁷ Kali woliyo ashwaula lithzinz lyoliwa eli muishishiwa nalyo? ⁸ Shanga kengeyo, ngeci, amwepo mukwama mulao o ufumu kuthza ko man'olo, ''Ohime mwapoe eci eli olihima owe shinda,'' mwakwama shuwana. ⁹ Unone ngeci amwepo muhangula anu amweya, mwakwama shivi, ne mulao wamiatula mukonda munaulee. ¹⁰ Mukonda munu oyu mamela mulao ouhe, shanga ci akun'uka poshoonye pohuma, onapiluka mukakulea milao thzothzihe. ¹¹ Mukonda oyu wambile ci, ''Wakwama ohuka,'' kalo wambile ci, ''Wapaa.'' Ngeci kokwama ohuka, unone wapaa, onapiluka mukakulea mulao. ¹² Honi muambe no kukwama eci awa akuatuliwa ko mualo o kuliyala. ¹³ Mukonda katulo thzakeyanga kokupila shihemo kwawa anakana kumonisha shihemo. Shihemo shalyatelela katulo. ¹⁴ Shakwathsa ine, apange, ngeci munu ammba ci oli no shitawo, unone kali no ekwama? Esho shitawo shatwesha kumuyoyisha? ¹⁵ Muanekele ci mwapoe nji ndumbu thzoe kali nei yokuvata kalo kali nei yokulya elyo liyuwa. ¹⁶ Ne yumweya kukwenu amuambela ci, ''Oende shuwana, okalale shuwana kalo okalye okaikute.'' Ngeci kamumupile ei ifotahala pa elama yo, apo yakwathsa ine eyo? ¹⁷ Mofoci shitawo yofoci, ngeci kashili no ekwama, shinafu. ¹⁸ Unone yumweya atwesha kuamba ci, ''Owe oli no shitawo, ne ame nili no ekwama.'' Onimonishe shitawo shoye shokupia ekwama, ne ame kenge nikumonisha shitawo shange ko ekwama yange. ¹⁹ Watawa ci Nyambi yofoci pohuma; wakwama shuwana. Unone shanga madimona nao atawa kengeyo, ne atutuma. ²⁰ Munu o shanga, wafota kulimuka, ci shitawo shokupila ekwama kashili no ukwathsi? ²¹ Abrahama tata wetu kali kuma apakiwile o kuluka ko ekwama ou aletile mwanenji Isaka pa katala(aletare). ²² Mwamona ci shitawo shakwamine no ekwama yenji, ne kalo ko ekwama shitawo shenji shakalile sho kukwana. ²³ Lin'olo kuma naliyalisheleliwa eli liamba ci, ''Abrahama walitawile kwa Nyambi, ne kuma nataliwa ci wakuluka,'' ne kuma naishiwa ci mbusha Nyambi. ²⁴ Mwamona ci munu apakiwa o kuluka ko ekwama, ne kali ko shitawo pohuma. ²⁵ Mofoci kalo, kali Rahaba o lihule wapakiwile o kuluka ko ekwama ou atambulile tunganda no kuwacila ko kuwapitisha likun'wa lyalo? ²⁶ Mukonda eli ili elama kupila mupepo inafu, no shitawo nasho kupila ekwama shinafu.