¹ Jakobo mupika Nyambi na Fumu Jesu Kilesite, ku mikuta likumi no mikuta thzili, ethzi thzinalihanda: Shangwenu! ² Apange, mumone enu yoihe ci shinyanyu ou mwingena mu ukalu o kulishiyashiyaa. ³ Mwalimuka ci kuelekiwa ko kulitawa kwenu kwaleta kulitanalisha. ⁴ Mushiye kulitanalisha kumanene ekwama yako ci mupiluke anu o kuyala no kumanenena, o kukana kupila shimweya. ⁵ Unone ngeci yumweya kukwenu afota onyanyami, aulombe kwa Nyambi, oyu napanga pohuma kokupila ku anjipa ku anu wahe awa amulomba, ne kenge amupa oo. ⁶ Unone alombe ko kiltawa, kokupila kulishoshomwa shimweya. Mukonda munu yomuhe oyu lishoshomwa alipitula eci lin'isingi lyo mulwale eli liendishiwa ko mupepo kuthzingulukishiwa oku no noko. ⁷ Mukonda oyo munu anekela ci kenge atambula shimweya kutunda kwa Fumu; ⁸ munu o kengeyo wa micima thzili, wakukana kutala mu makun'wa enji o ahe. ⁹ Mukakulitawa o shihutu alishangale mu ukulu wenji, ¹⁰ unone munu o lufumo alishangale mu uonye wenji, mukonda kenge akupwa eci mapalisa o mumuhonyi. ¹¹ Mukonda liyuwa lyava no kupya kwalyo no kukukutisha muhonyi. Lipalisa lyawa, ne uwa walyo wapwa. No munu o lufumo naye, kenge apwa kuli pakaci ko muendo wenji. ¹² Oli no fiyauthzi munu oyu litanalisha mu ieleko. Mukonda munyima thzo kupita mu ieleko, kenge atambula tepa thzo ufumu o moyo, ethzi thzinakulupelishiwa awa ahima Nymbi. ¹³ Munu yomuhe oyu li mu ieleko katele ambe ci, ''Naelekiwa ko Nyambi,'' mukonda Nyambi katwesha kuelekiwa ko umango, nji aye Nyambi kueleka munu. ¹⁴ Unone munu no munu aelekiwa ko ei ahima, ei imukoka no kumunyanyamena. ¹⁵ Nehoni kuhima ou kukala no lila, kwaeleka shivi, ne munyima thzo shini kukila nene shaeleka lifu. ¹⁶ Lelo mwaangeliwa, amwe apange nihima. ¹⁷ Shoshihe shipiwa shohsiwa no shipiwa shohsihe shokuloa shatunda kuwilu. Shatunda kwa Tata o mwethzi. Kukwenji kwithsa kualuka nji muthzimbimbi oku kupilu. ¹⁸ Nyambi wahangulile kutupa kuelekiwa ko liywi lyo shemwa, ci tukale eci oshuka omutatekelo kwei aombile yoihe. ¹⁹ Mwalimuka ei, amwe apange nihima: Munu yomuhe ayakame kuyuva, akatape kuamba, kalo akatape kuanjipa. ²⁰ Mukonda uanji o munu kaukwama kuluka kwa Nyambi. ²¹ Honine mushiye mathzilo o shivi oahe no umango oungi. Ko shihemo mutambule liywi linakuniwa kukwenu, eli litwesha kuyoyisha myoyo thzenu. ²² Mupiluke aka kukwama o liywi kali aka kuyuva pohuma, kuliangela mwashinda. ²³ Mukonda ngeci munu po muka kuyuva pohuma o liywi unone kali muka kukwama, alipitula eci munu oyu litataneka shihanga shenji mu shiponi. ²⁴ Alilondolola aye shinda no kulithzela ne popo mwene avulama omu amonahalela. ²⁵ Unone munu oyu taneka shuwana mu milao thzinaloo thzo kuliyala, ne akwatelela kukwama kengeyo, kali kupiluka muka kuyuva pohuma no kuvulama, oyu munu kenge akala no fiyauthzi mu ekwama yenji. ²⁶ Ngeci munu ayepo anekele ci wakulitawa ne kakwata lulimi lwenji, angela mucima wenji kalo kulitawa kwenji kakuli no ukwathsi. ²⁷ Kulitawa ko kukena no kukana kuipa pa meho a Nyambi wetu no Tata wetu po kukwathsa ashiyana no mafakathzi mu likando lyo no kulihenga ku enu yokaye.