¹ Aa oliyo maywi a Mushe aambile kwa ana Isilaele wahe kwanashii Jodani kwali mu mumbulwa kukutu, mu lyanda lyo mulonga uwela pa lwale lo Jodani kutanekela Sufi, mukaci ko Parani, Tofela, Labani, Hezeroti, no Dizahabu. ² Kwanaende mayuwa likumi na lyofoci kutunda mu Horeve ko likuñwa lyo mukaci ka Seiri kuthza ku Kadeshi Banea. ³ Kuma yakwamahalile ko mwaka o makumi ane (40) mu ngoda thzo ulikumi na thzofoci (11), mu liyuwa lyo kutanga mu ngonda, apo Mushe aambile kwa ana Isilaele, kuwatongwela enu yoihe namutumina Shinda sha moyomci ci aiwaambele. ⁴ Apo Shinda sha moyo konamana kulwisha Sihoni fumu wa Amori, oyu watungile mu Heshiboni, no Ogi fumu wa Bashani, oyu watungile mu Ashitaroti ku Ederei. ⁵ Musambwa lyo Jodani, mu litunga lya Moabi, Mushe ayepo tateka kuwatongwela elaa, kuamba ci, ⁶ ''Shinda sha moyo Nyambi wetu naamba kukwetu ku Horebe, kuamba ci, 'Munakala shikati sho shile nene omu litunga lyo mikinya. ⁷ Mupiluke ne muthze mu muendo wenu, ne muthze ku litunga lyo mikinya lya Amori no ku matunga oahe ali ku lyanda lyo mulonga oku lwale lo Jodani, mu Negevi, no ku liya lyo likulu lwale mu litunga lya Kanana no mu Lebanoni kukahenyena ku lwale loshokulu lwa Eufarete. ⁸ Mumone, ninamipakela eli litunga ci likale lyenu; muthze mo mukatunge mu litunga eli akulupelishile Shinda sha moyo kwa atata wenu- kwa Abrahama, kwa Isaka, noku kwa Jakobo- kuliwapa no kulipa kwa ekulyo awa akukeya mu nyima thzo.' ⁹ Kuma naambile kukwenu ko shiya shikati, kuamba ci, 'Kanitwesha kumiendisha nofoci pohuma. ¹⁰ Shinda sha moyo Nyambi wenu onamibulisha, ne, mumone, amwe lelo munabulu eci matungwethzi o kuwilu. ¹¹ Shinda sha moyo, Nyambi wa tata wenu, amikwame miendo 1000 ku ungi ecci eli muli, ne amifiyawele, eci eli amikulupelishile! ¹² Ambene ngepi elinga nishimba nofoci eshimba yenu, no mipango thzenu thzo tzhilemu, no mifilifili thzenu? ¹³ Mushimbe akwelume owanyanyami, akwelume o kuyuvishisha no akwelume o kulemwkiwa mu mukuta no mu mukuta, ne kenge niwakwama aendishi enu.' ¹⁴ Amwepo munitawa no kuamba ci, ''Ei enu onaamba iwa kukwetu ci tuikwame.' ¹⁵ Ne amepo nishimba aendishi o ikuta yenu, akwelume owanyanyami, akwelume o mwoyo ouwa, no kuwapaka ci amiendishe, aendishi o ma 1000, aendishi o ita (100), aendishi o makumi mutamu (50), aendishi o makumi (10) no añathsile, shikuta ko shikuta. ¹⁶ Kuma nanitumina atuli enu ko shiya shikati, kuwaambela ci, ''Muyuve mifilifili thzikal mukaci ka apenu, ne muatue shuwana apenu, kalo muatule shuwa an munu na mwapenji, no munu tunda kwako. ¹⁷ Lelo mwaimanena munu yupi nji yupi mu iamba; kenge mwakuatula iamba yoionye no iamba yoikulu. Kamwakauyapa shihanga sho munu, mukonda kuatula po kwa Nyambi. Eamba eyi imikalupela, muiletange ku kwange, ne kenge niiatula. ¹⁸ Kuma nanimitumina ko shiya shikati enu yoihe muna loela kukwama. ¹⁹ Twatundile mu Horebe ne atwepo tupita momuhe muya mu mubulwakukutu oukulu no kuyapisha uya namumono, mu muendo wetu okuthza ku litunga lyo mikinya lya Amori eci eli natutumina Shinda sha moyo Nyambi wetu; ne atwepo tukuma ku Kadeshi Benea. ²⁰ Amepo nimiambela ci, ''Munakumu ku litunga lyo mikinya lya Amori, eli atupa Shinda sha moyo Nyambi wetu. ²¹ Mumone, Shinda sha moyo Nyambi wenu onamipa litunga; muthze, mukatunge mo, eci eli Shinda sha moyo, Nyambi owa tatawetu, anaamba kukwenu; lelo mwayapa, nji kuvapa.' ²² Mwaheno kuma namukeya kukwange no kunaniambela ci, 'Otutawethze tutume anu alitangethze ku posho thzetu, ci akatufotishishele elyo litunga, ne natutongwele omu anakawanena nomu tutweshela kulwisha, no ma mbongi tuloela kupita ci api.' ²³ Muambelo wenu waniloelile; amepo nishimba akwelume likumi na eli (12) kukwenu, yofoci ku shikuta no shikuta. ²⁴ Awopo akatuka kuthza ku litunga lyo mikinya, awopo akuma ku mulonga o Eshikoli, ne awopo akalifotishisha. ²⁵ Awopo ashimba ei yeema omo mu litunga mu moko o no kuileta kukwetu. Kalo atuletelile liywi ne awopo aamba ci, 'Litunga lyo liwa eli atupa Shinda sha moyo Nyambi wetu.' ²⁶ Unohoni kuma mwakanine kulwisha, ambene kuma mwakanine kukwama ei amituminine Shinda sha moyo Nyambi wenu. ²⁷ Kuma mwavilaelile mu matende enu no kuamba ci, ''Mukonda Shinda sha moyo onatuthzimbi yoliyo natutundishela mu litunga lyo Engepita, kunatupa mu moko o Amori ci atupae. ²⁸ Kupi tuthza honi pano? Apetu anatuyuvisha micima kukola, kuamba ci, 'Waya anu akulu ilama no ule kutupita; mambongi oo akulu kalo anapakiwa mu ipaka yo ile kukakuma ku wilu; ne kalo, tunamono ana Anakimi owakwelumu ci mwali.''' ²⁹ Nehoni amepo nimiambela ci, ''Mwatuka micima, nji kuwayapa. ³⁰ Shinda sha moyo Nyambi wenu, oyu mienda kuposho, kenge amilwela, eci enu yoihe ei nakwama mu Engepita pa meho enu, ³¹ no mu mumbulwa kukutu oku namumono omu namishimbela Shinda sha moyo Nyambi wenu, eci munu oyu shimba mwanenji, kokuhe oku namupiti amwepo mukuma kuno ku shivaka. ³² Ambene shanga ko eli liywi kanamulitawa kwa Shinda sha moyo Nyambi wenu, ³³ oyu namiende posho mu likuñwa kumifotela shivaka ci mukwame shilombo, ushiku amimonisha ko mulilo ne mutanya amimonisha ko livui. ³⁴ Shinda sha moyo ayepo yuva maywi enu ne ayepo anjipa; ayepo liethza no kuamba, ³⁵ 'Yoshemwa kwithsa shanga yofoci kwawa anu o oshikuta sho shimango oyu wakumona litunga lyo liwa eli naliethzile ci kenge nilipa akuku wenu, ³⁶ shime Kalebu mwana Jefune. Kenge akulimona ne kenge nimupa aye na ekulyenji litunga eli anakalyata, mukonda onashupwela Shinda sha moyo.' ³⁷ Kalo Shinda sha moyo kuma anianjipelile name mukonda wenu, kuamba ci, 'Nowe kowakuthza mo; ³⁸ Joshuwa mwana Nuni, oyu nemana pa posho thzoe, kenge athza mo; omukolopishe mucima, mukonda yoliyo wakuendisha Isilaele kukalishwana. ³⁹ Ne kalo anenu owaonye, awa mwaambile ci woliyo ali mu ukalu, awa akana kulimuka owa no omango lelo---kenge athza mo. Kenge nilipa kukwo, ne kenge lya kupiluka lyo. ⁴⁰ Ambene amwe, mupiluke muhuke ku muendo wenu omu mumbulwa kukutu mu likuwa litamba ku likulu lwale lyo likihu. ⁴¹ Nehoni amwepo mutawa no kuniambela ci, ''Tunakwama shivi kwa Shinda sha moyo; kenge tuthza no kukalwa ne kenge tushupwela yoihe ei anatutumina Shinda sha moyo ci tuikwame. Munu no munu mukaci kenu ayepo loisha ilwisho yenji yo mvo, ne kuma mwaliloishelile kulwisha litunga lyo mikinya. ⁴² Shinda sha moyo ayepo aamba kukwange, 'Owaambele ci, ''Lelo mwalwisha kalo lelo mwalwa, mukonda kanakukala nenu, ne kenge mutweshiwa ko akwethzimbo yenu.' ⁴³ Namiambelile kengeyo, ambene kanamuyuvu. Kuma namukana ei namitumina Shinda sha moyo; kuma mwalitundulile ne amwepo mulwisha litunga lyo mikinya. ⁴⁴ Ambene Amori, awa akalile muya u litunga lyo mikinya, awopo akeya kunalwa nenu ne awopo amuicithza eci muka, ne awopo akamipwela ku Seiri, kukakua no ku Horima. ⁴⁵ Amwepo muhuka no kukalilela pa posho thza Shinda sha moyo; ambene Shinda sha moyo kateelelile liywi lyenu, nji kutwala maano kukwenu. ⁴⁶ Ne amwepo mukala mu Kadeshi mayuwa oangi, mayuwa oahe aa mwakalile ko.