¹ Ame Pitolosi, mu apositola wa Jesu Kilesite, nan'olela awa analihanda mu matunga aa anu ao, awa anahanguliwa, mu Pontasi momuhe, mu Galatia momuhe, mu Kapadosia, momuhe, mu Asia momuhe, no mu Betania momuhe. ² Eipo kuthza ko wa natanga kuimukiwa ko Nyambi Tata, kuthza ko kukenishiwa ko ekwama yo upepo, ci akuteke no kushamweniwa Onyinga wa Jesu Kilesite. Shihemo shikale kukwenu, ne kuliyala kwenu kukule. ³ Kushangaliwe Nyambi noTata wa Fumu wetu Jesu Kilesite! Mu shihemo shenji shoshikulu, onatupa kuelekuiwa komushili ku shikulupelisho shiyoya ko kupinduliwa kwa Jesu Kilesite kwa afu. ⁴ Ei yoliyo tunatatelela kushwana ei yakukana kuipa, ei yakukana kuthzilauliwa, nei yakukana kupwa. Ei munatulekeliwa kuwilu. ⁵ Mwanyungiwa ko okolo wa Nyambi kuthza ko shitawo sho shokuyoyishiwa eshi shinatatelela kumonishiwa mu shikati sho kuhula. ⁶ Ei yoliyo imipa kunyanyuka nene, shanga ci honi, pa shikati shoshionye, kenge mwakunyandishiwa nu enu yoihe. ⁷ Eipo kufota kumona ukulu wo shitawo shenu, shoshiwa kupita gauda ethzi thzipwa, shanga ci thzaelekiwa ko mulilo. Ei yakwamahala ci shitawo shenu shakuwaniwe ci shahsangala, shatethzima, no kulemeka apa akumonahala Jesu Kilesite. ⁸ Kamumumonine, unone mwamuhima. Kamumumono pano, unone mwalitawa kukwenji no kunyanyuka ko shinyanyu shoshikulu eshi shili kutethzima. ⁹ Honi mwatambula amwe mwashinda enu shileta shitawo, Kuyoyishiwa ko myoyo thzenu. ¹⁰ Eci yoku kuyoyishiwa, apolofita awa apoloftile yo shihemo eshi shakukeya kukwenu, kuma afotishishile no kuipaula shuwana, ¹¹ kufotishisha ci munu yupi nji shikati shipi mupepo wa Kilesite ou wakalile kukwo nauwamonisha apa nauwatongwela yo makando a Kilesite no kutethzima oku kwakukeya munyima. ¹² Kuma nalimukishiwa ci kalikwamena awo ashinda, unone amwe, ou ambile ei enu munatongweliwa kowa anamikutathza evangeli ko mupepo oukenu utunda kuwilu- enu ei anatatelela kumona man'eloi. ¹³ Honi muliange mumbunda thzo maayalo enu. Mutanale. Mupake shikulupelo shenu shoshihe pa shihemo eshi shakuletiwa kukwenu Jesu Kilesite ou akumonahala. ¹⁴ Eci ana o likute, lelo mwakwama ehima ei namukwamanga komushime kulimuka. ¹⁵ Unone eci eli ali okukena oyu namiishi, amwe, namwe, mukale akakukena mu muikalelo wenu wouhe. ¹⁶ Mukonda kunan'oliwa ci, ''Mukale akakukena, mukonda nomukakukena.'' ¹⁷ Honi ngeci mwaisha ci, ''Tata'' oyu naatulanga kokupila ketululo ne kokuthza ko ekwama yo munu no munu, mukale no wowa pa shikati mushili mulitunga lyene. ¹⁸ Mwalimuka ci kali ko silivera no gauda ei ipwa ou namutundishiwa ku mukalelo woumango ou namushwana kwakathsan'ulu enu, ¹⁹ unone ko onyinga ouwa wa Kilesite, eci onyinga wo nguana wokupila mulandu nji po kuilaula. ²⁰ Kilesite kuma nalimukiwa kaye kokashime kukushishiwa, unone pano honi onamonishiwa kukwenu omu mu mayuwa o mahulelo. ²¹ Ko aye mwalitawa kwa Nyambi, oyu wamupindulile kwa afu no kumupa kutethzima, ci shitawo no shikulupelo shenu ikale kwa Nyambi. ²² Munakenisha myoyo thzenu ko kuyuvela shemwa. Ei kuma yakwamahalile ci mulihime nene na apetu; honine mulihime nene munu na mungenji kutunda ku mucima o kukena. ²³ Munaelekiwa lomushili, kali ku mbuto thziola, unone ku mbuto thzikana kuola, ko liywi liyoya no kukalelela lya Nyambi. ²⁴ Mukonda, ''Nyama thzothzihe thzalipitula eci muhonyi, ne kutethzima kwathzo kwalipitula no palisa thzo muhinyi. Muhonyi wakukuta, ne palisa thzawa ko, ²⁵ unone liywi lya Fumu lyakalelela kokukana kupwa.''