¹ Omwo miyoyo wolokele, Paulu wa thanene bandokethzi bendi chomu mwa manethele kuba takametha, wa ba thalethele nomu waile ku Masendoniya. ² Omwo mwaile muje mumitambela ya mafuti na kwendeka majwi amengi a kuba takametha, wethzile ku Ngilisi. ³ Omu wa manethele bimbonde bitatu kuje, ba yunda ba mukele mbunga ya kumulwitha omu wakele nakuli bwahethela kujabuka kuya ku Siliya, wa yongwele kwiluka na kwitila mu Masendoniya. ⁴ Baje baile nendi kuje ku Asiya ba pwile Sopata muna Pinase uje wa tundile ku Mbeleya; Alisitakase na Sekundase, batundile kuli baka kutaba ku Tesalonika; Ngayase waku Ndembe; Timoteo; na Tayikikase na Tolofimase ba tundile ku Asiya. ⁵ Oloni aba banalume balibangele cho baka tubandamenene ku Tolowase. ⁶ Twa jabukile kufuma ku filipu omu matangwa a likende lya kujeneka chimbalwila atile, munima ya matangwa atanu twe thzile kuli bakebo ku Tolowase. Kuje twakeleko matangwa atanu na abali. ⁷ Halitangwa lya chalumingo omu twalikungulwile hamo naku bujula likende Paulu wendekele kuli baka kukulahela. Wa thinganyekele kukatuka lya mukwabo, cho wa twaleleleho na munthzimbu wendi kweta na mukati ka buthsiki. ⁸ Mwakele bindeya byabingi mu bulili bwa hakamwa ya njubo omu twali wanenene. ⁹ Muje munjanena mwa tumamene mukwenje wa lithzina lya Yatikase, wa wililile mutulo twakama. omwo Paulu wa twaleleleho na kwendeka, ou mukwenje, te achili mutulo, wa wile hathi kufuma kuje ku bulili bwa hakamwa bwa muchitatu cho bamunonele te nathsi. ¹⁰ Oloni Paulu wa shulukile hathsi, wa bulumanene hali ikeye, na kumu bumbatela. Cho wendekele ngwendi, "Kethi mulubale, mwafwa achili na mwonyo." ¹¹ Cho waile nawa ha kamwa cho wa bujwile likende na kulya. Munima ya ku thimutwilya nabo thsimbu ya kama noho litangwa lya kile, nomu waile. ¹² Ba munenele uje mwanike wa munalume na mwonyo wendi cho echi cha bathzembelekele manene. ¹³ Yetu twa libangele kuya na mbapolo kuthethza Paulu na kujabukila kuya ku Asose, kuje twa shakele ku kutela Paulu. Ebi bikebyo bya shakele kullinga ba benya, mwafwa wa thinganyekele kuya na ngila ya nunda. ¹⁴ Omu watu wanene ku Asose, twa mu londethele mu mbapolo twaile nendi ku Mitelene. ¹⁵ Cho twa jabukile kutunda kuje cho hali kaki twetele muyehi na kulikanda lya Chiyose. Cho lya mukwabo twetele ku likanda lya Samose, cho lya mukwabo lalo twethzile ku nganda ya Miletu. ¹⁶ Oloni Paulu wathinganyekele kujabuka naku tubakana ku Efese, linga keti ombile tuthimbu muje mu Asiya; wakele mu bwathi bwa kweta mu Yelusalema ha litangwa lya Pentekosita, nga chitaba kuli ikeye linga alinge ngocho. ¹⁷ Kutunda ku Miletu wa tumine banalume ku Efese cho wathanene bakulunu ba chikungulwilo. ¹⁸ Cho omu bethzile kuli ikeye, wa balekele ngwendi, "Yeni yenibabenya mwa thzibuka, kufuma litangwa lya kulibanga linja lyatele lindi mu Asiya, muje munja kele neni thimbu yoshe. ¹⁹ Nja pangelele Shukulu na kuli kehetha ku mbunge na mithsothzi, na byetheko bije bye thzile kuli yange mwafwa ya matumbe aba Yunda aku njilwitha. ²⁰ Mwathzibuka omu kunjalikelele kulinga chuma chimo chije chapwile cha kumi kwatha, nomu njamilongethele mu mbunga na kufuma ha njubo, ²¹ kwambulula ku ba Yunda naba Ngiliki haku tenguluka na kwija kuli Njambi na ku kulahela muli Shukulu Yesu. ²² Cho taleni, njili nakuya ku Yelusalema, kuthindiyiwa kuli munthzinthzime, kujeneka ku thzibuka bikalingika kuli yange, ²³ kubanga Munthzinthzime wakujela ambulula muli yange mubi nganda ngwe malenge na kayando bina nji bandamena. ²⁴ Oloni jina yongola ngwangwe mwonyo wange kuwethi na seo kuli yange, ngwe lika njimanethe bipangi na kumanetha bu ntwamena bu nja tambwile kuli Shukkulu Yesu, kwambulula munthzimbu wa chikeketima cha Njambi. ²⁵ Cho Taleni, nji thzubuka ngwangwe muboshe, njinendangana akati keni kwambulula bumwene, naumo wahi aka mona chihanga change lalo. ²⁶ Mukemo njimileka bukaleho lelo, yange njina thamba kunjthi na mulonga lalo ha maninga a munu. ²⁷ Mwafwa kunja likelele kwambulula kuli yeni butumbe bwoshe bwa Njambi. ²⁸ Ngechibene linyungeni, cho lalo nyungeni butanga bwoshe buje bwana myana munthzinthzime wakujela linga mu bunyunge. Akeniko mana ha kupwa tunyungi ba chikungulwilo cha Njambi, echi cha landele na maninga endi. ²⁹ Njathzibuka ngwange omu njiya, ba mbwangongo ba bukenya ba kaija hakati keni cho kubakatetele butanga. ³⁰ Nja thzibuka ngwange bamo banalume hakati keni baka katuka na kwendeka majwi a mabi linga bangumune baka kukulahela linga baba kabe. ³¹ Ngachije nyanyameni. Anukeni ngweni ha myaka itatu kunja likelele kuleka umo na umo weni buthsiki na mutanya na mithsothzi. ³² Njili na kunikundika kuli Njambi na ku lijwi lya chikeketima chendi, uje atha kumi tunga na ku myana buswana hali baje boshe bali na kuthzilika. ³³ Kunja shungwiye siliva ya munu, ngolinde, nambe buthzalo. ³⁴ Yeni babenya mwa thzibuka ngweni njina kala na kupanga na maboko ange mukuwana bije twashakele hamo na baje njakele nabo. ³⁵ Mu byuma byoshe njakele na ku mwetetha omwo mwatela ku kwata baka kuthzeya mu ku panga, na kwanuka majwi a Shukulu Yesu, majwi aje endekele ngwendi: 'Muli kukithiwa mukwana ktubakana mu ku tambula.'" ³⁶ Cho omu wamanethele kwendeka mungila eyi, wa thsikamene ha mabuli cho wa lombele nabo boshe. ³⁷ Kwakele kulila mbimbi cho babumbateyele Paulu na kumuthsemba. ³⁸ Ba kele na buthiwa mwafwa wa bije bi edenekele ngwendi kubakamono chihanga chendi lalo. Cho bamuthsindikiyiye ku Mbapalo.