¹ Chojo chasholokele ngachije ngwe omwo Apolosi wakele ku Kalinde, Paulu nendi wa pulyathanene kwilu ya lije lifuti na kwija ku nganda ya Efesasi, cho wa waneneko bandongethi amo kuje bene. ² Cho Paulu wendekele nabo ngwendi, "Omwo mu mwa kulahelele mwatambwile munthzinthzime wa kuthzila tahi indi bati? Olojo bakebo bendekele kuli ikeye ngwabo, "Embwe, mwafwa yetu nameme kuthziba bene kutwa thibileho cha ku pandama kuli owo munthzinthzime wa kuthzila." ³ Paulu wendekele kuli bakebo ngwendi, "Indi oni kumbwitika kwa muyati mukajo bami mbwitikilemo yeni?" Chojo bendekele ngwabo, "Kumbwitika kwa Yowano." ⁴ Chojo Paulu wa ba kumbulwile ngwendi, "Yowano wa mbwitikile na kumbwitika kwa kutenguluka. Wakele na ku leka banu ngwendi bana pande ku kulahela muli owo ya kele na kwija munima yendi kwendeka ngwabo, muli, Yesu." ⁵ Chojo omwo banu ba thzibile echi, baba mbwitikile mu lithzina lya mwene Yesu. ⁶ Cho omwo Paulu wa kambekele maboko endi hali bakebo chojo bendekele na mu bindaka byeka na ku Polofita ba polofitile. ⁷ Choboshe betele ha theteko ya kupwa banu likumi na ba bali. ⁸ Cho Paulu wa kobekele mu sinangonge na kwendeka na kuthzimpa kwa kama ha bingonde bitatu, kwetheka kuthimutwiya na ku kwatha banu mangana bathzibithithe na kuba lombelela ha mulonga wa bumwene bwa Njambi. ⁹ Olojo na meme ngocho bamo ba ba Yunda kabele na bimbunge bya bimata chojo na kwononoka ku bononokele, ba putuka na bwendeka bya bibi hali ngila a kati ka mbunga ya banu. Cho Paulu wa ba thethzele na kwambata ba ndongethi na kuya nabo, cho wakele na ku thimutwiya ya kuli longethela ya ku Tilasani. ¹⁰ Echi chipangi echi cha twalelelaho ha myaka ibali, chojo na banu boshe baje batungile mulifuti lya Asiya ba thzibile lijwi lya mwene, boshe bene ba Yunda na ba Ngiliki. ¹¹ Chojo Njambi wakele na kulinga bimwetho bya kukomowetha kwitila mu maboko a Paulu, ¹² kweta na ha theteko yakulinga ngwabo nambe lika chitambala cha kumaboko na binanga bya mbolele kuli ikeye ba kele na ku bitwala kuli baje ba kele naku binja chojo na ku konguka ba kangukile ku mabethzi abo cho lalo na minthzinthzime ya ibi yakele na kufuma muli bakebo. ¹³ Olojo kwa kele baka kutaha bingombo ba baYunda obo ba kele na kwita mu mwela uje. Cho na bakebo lalo bethekele ku thana a lithzina lya mwene Yesu ngwabo mangana na bakebo ba kale na bitnthzili ha kwendeka ngwabo, "Kwitila muli Yesu owo Paulu ali na kwambulula nji kushika ngwange tunda." ¹⁴ Cho na mukakulombela wa kama, owo lithzina lyendi lya kele Sikeba, wakele na bana ba tanu na babali baje bakele na kulinga ngocho. ¹⁵ Olojo munthiznthzime wa ubi wa ba kumbulwile ngwendi, "Yesu nja mu thzibuka na Paulu njimu thzibuka; Oloni yeni beya?" ¹⁶ Cho uje munthzinthzime wa ubi wakele muli uje munalume watumbukilile hali baje baka kataha bingombo cho wa ba hyanene na kubambitatanga. Cho batewelele hanja ya ije njubo mushele shele oku bana ba betwetha bimbandu. ¹⁷ Cho banu boshe ba mu nganda ya Efeso ba thzubukile ebi bya sholokele, boshe ba Yunda na ba Ngiliki. Cho banu boshe ba kele na lyoba, cho na lithzina lya mwene Yesu bali thingimikile manene. ¹⁸ Cho lalo, bwingi bwa baje baka kukulahela bethzile na kwambulula milonga yabo ya shili na kwendeka byoshe bya bibi ba lingile. ¹⁹ Cho baje boshe bakele nakupanda bya matheno banenele mabulu abo hamo naku wenyeka chitona mesho. Cho ba labele ndando ya aje mabulu, na kuwana ngwabo pa pwile makulukathzi a tanu a bimbongo bya Siliba. ²⁰ Chojo lijwi lya mwene lya shandanganene bya nthzili manene. ²¹ Cho hanima ya kumanetha chipanga chendi mu Efeso, Paulu wa thinganyekele mu Sipilitu kulinga ngwendi a pulyathana mu Masendoniya na Akaiya ha bungetnhtzi bwendi bwa kuya ku Yelusalema, cho wendekele ngwendi, "Akulinga kuje njinaileko laja, nja pande cho kumonako loma lalo." ²² Cho Paulu wa tumine ku Masendoniya babali babaje bakele na kupangela, ba Timoteu na Elasitasi. Olojo ikeye babenya wa chi thalele mu Asiya hathimbu ya indondo lika. ²³ Cho hathimbu ije bene hakeho a sholokele mpindangano yakama manene ya ku komoketha mu Efeso ya ku pandama ku ngila. ²⁴ Cho kwa kele muka kufula wa lithzina lya Ndemetiyasi, ou wa kele na kufula tumponya twa Siliva twa Atemisi, ya nenela bipangi bya bingi manene kuli baka kufula. ²⁵ Chojo wa kungwilile hamo baje boshe bakele ba bipangi ba chipangi chije. "Eni banalume, mu na thzinuka ngweni mu bipangi bene ebi mukemo mutuka wanena bimbongo bya bingi. ²⁶ Muli na kumona na kuthziba ngwabo, keti lika kuno ku Efeso, olojo na mulifuti lyoshe lya Asiya, ou Paulu na thindiya na ku ungu muna banu ba bengi,. Ali na kwendeka ngwendi baje tulunga ba tumponya baku munga ku maboko kethi tulunga. ²⁷ Choni kuli bushonde bwa kama manene mwafwa bipangi byetu bishauka, Cho lalo na tembele ya Atemisi, Kalunga ketu wa munakathzi cho banu ba imona ngwabo ya ngochongocho cho bene na bukama bwendi obu bwaya puho mu Asiya na mulifuti lyoshe cho buhwila aha bene." ²⁸ Cho omu baje boshe ba thzibile echi, boshe balubalele manene cho ba tambekelele ngwabo, "Wakama Atemisi waku Efeso." ²⁹ Cho nganda yoshe yakele mu mpindangano yakama, cho banu ba shatukile na mbunge imo kuje kunjubo ya kwehela. Ba kwatele babuthamba ba Paulu, Angayasina Alisitatusi, obo bakele na kwenda na Paulu, obo ba fumine ku Masendoniya. ³⁰ Cho Paulu nendi wa tondele ngwendi ali tikilikile hakati ka banu naku kobela mukati, olojo bandongethi ba mwonowethele kulinga ngocho. ³¹ Cho lalo na bamo baka bipangi baku mutambela wa Asiya baje ba pwile babuthamba bendi ba mutuminine majwi a kumulomba ngwabo kethi a kobelemo mu lyehelo. ³² Cho banu bamo ba kele na kutambeka chuma chimo, cho ba kwabo nawa cheka, mwafwa mbunga yoshe yakele mu kulwangana kwa kama. Bwingi bwabo kuba thzibukile bene nebi ba kungulukilile hamo. ³³ Cho bamo ba muje mu mbunga ba nangwileko Alekizanda, uje ba Yunda bakele na kutonda ngwabo apwe ntwama yabo. Cho Alekizanda wa chisholwele na liboko lyendi, ngwe wakele na ku shaka kwendeka ku chikungulikila mangama a lyohyele. ³⁴ Oloni omu banu ba putukile kuthzibuka ngwabo wakele ka Yunda, ba tambekelele ha theteko ya mahola abali na lijwi limo, na kwendeka ngwabo, "Wakama ou Atemisi wa ku Efeso." ³⁵ Hanima ya uje mukaku thoneka wa mumbongi kwoletha ije mbunga, wendekele kuli bakebo ngwendi, "Yeni banalume ba ku Efeso, munu mukajo ali hano owo kathzibuka ngwe ino nganda ya ba Efaso yapwa bene ikeyo ya nyunga tembele ya Atemisi wa kama na kamponya kaje ka wile kufuma mwilu? ³⁶ Cho ha kumona ngwe ebi byuma wahi natha ku bibyana, muna pande ku bi thimpila na ku jeneka ku bilinga mu lumbithi embwe. ³⁷ Mwafwa munanene aba banalume kuli ino nthzango obo kethi bethzi ba mu tembele nambe kwendeka bya bibi hali Njambi yetu. ³⁸ Akufwa ngocho, umo wa wa Nemetiyasi nabaka kufula bali nabo bana wanena munu uli woshe mulonga, cho binthzango bi napu bya kusholoka kuli bakakuthompa. Umona ngwe bana chishaka cho bali wanene milonga bakebo babenya. ³⁹ Olojo ngwe mutonda chuma chikwabo chi mu shaka ku tubakana aliechi, cho baka chithompa mu chikungulukilo. ⁴⁰ Mwafwa chili bene tuli mu bukalu bwa kutu wanene mulonga hali ei mpindangano eyi ina lingika lelo. Kukwethi chifwa choshe chichina pandele kunena eyi mpindangano embwe, cho netu kutuwana mwa kuli patungwililacho." ⁴¹ Oloni hanima yakwendeka byoshe ebi. Cho wa shandwile chingulwilo.