¹ Oloni omo batubakanene mubinganda bya Afipolise na Apoloniya, Betile ku nganda ya Tesalonika kuje kwakele sinangonnge yaba Yunda. ² Paulu, omo kuchithemwa chendi chakele, waile kuli bakebo, cho ha matangwa atatu a Sabata wathimutwilile hamo nabo kufuma ku bithoneka. ³ Wakele na kufukula bithoneka na ku lumbununa ngwendi chafwililemo Kilisitu kuyanda na kwinduka lalo kufuma ku bathsi, Wendekele ngwendi, "Ou Yesu injambulula kuli yeni ikeye Kilisitu." ⁴ Ba Yunda bamo batabele na kuthzibithitha cho balyakeleko kuli Paulu na Sailasi, Kwakelaho na theteko yakama ya ba Ngiliki baje baka kulongwa, cho kwakelaho lalo na ba banakathzi baje bakele bantwama. ⁵ Oloni ba Yunda bakweneka kutabela, ba tundileho na Chipululu, bambatele banu bamo baka-kulinga bubi kutunda ku mwela wa kulanda na kulandetha, bakungulwile mbunga hamo, na kupwitha kungila mu nganda, Balwithsile njubo ya Njasone, bakele nakwetheka kunena Paulu na Sailasi ku banu. ⁶ Oloni omo kubabawanene, bakokangeyele Njasone na bamo bandolome beka kumesho a baka-kuswana ba muje munganda, kulila, "Aba banu banathsilimika lifuti banaija kuno lalo. ⁷ Aba banalume banatambula Njasone bakalingi byuma ha kujeneka kukabangeya mashiko a kaisale; bali na kwendeka ngwabo kuli mwene mukwabo—Yesu." ⁸ Ba yandethsele mbunga na mbunga ya bakabipangi mu nganda baje bathzile bino byuma. ⁹ Oloni hanima ya kubanda kuli Njasone na bakwebo, babechele cho baile. ¹⁰ Ku buthsiki ba ndolome batumine Paulu na Sailasi ku Mbeliya. Omo betele kuje, baile mu Sinangonge ya ba Yunda. ¹¹ Olojo baje banu bakele bakulyana na bimbunge byabibwa kutubakana baje ba mu Tesalonika, omu baambwile lijwi na kuli bwahethela mana, na kwethseketha bithona halitangwa bamone nga ebi byuma byakele ngechi. ¹² Olojo babengi bakulahelele, hano lika na banakathzi baje bakulema ba mu Ngiliki na banalume babengi. ¹³ Oloni omo ba Yunda ba ku Tesalonika balilongethsele ngwabo Paulu wakele nawa nakwambulula lijwi lya Njambi ku Mbeliya, baile kuje nakushangumuka kushongwangeya bimbunga. ¹⁴ Cho ohobene, bandolome batumine Paulu aye kulishali, oloni Sailasi na Timoteo batumamene kuje. ¹⁵ Baje bakele na kutwamenena Paulu bamutwalele kwakulako na nganda ya Atena. Omo bathsethzele Paulu kuje, batambwile kushika kutunda kuli ikeye mangana Sailasi na Timoteo baije kuli ikeye bwathi bwathi omo chinathiwila. ¹⁶ Oloni hathsimbu ije Paulu wakele na kubandamena mu Athenisi, munthzinthzime wendi washangumukile muli ikeye omo wamwene mu nganda munashulu tumponya. ¹⁷ Cho wakele nakulongetha matangwa oshe mu Sinangonge na ba Yunda na beka baje balemethele Njambi, mumolika na mu mwela wakulanda na kulundulula na baje bakeleko. ¹⁸ Oloni na bamo baku Epikulyeni na Sitoki bafilosofa baliwanene nendi. Bamo bendekele ngwabo, "Bika ebi ou chehebe ali nakwethseka kwendeka? " Beka bendekele ngwabo, "Natela kupwa umo uje muka kuthana banu bakabangeye tumponya tweka," mwafwa wakele na kwambulula muthzimbu waubwa wa Yesu na kuthsanguka. ¹⁹ Bambatele Paulu na Kumunena kuli Aleyopangase, kwendeka, "Tushaka kuthzibuka echi chilongetho chachihya chi uli na kwendeke? ²⁰ Omo yobe unanene byuma bimo byeka kumatwi etu. Choni, tutonda kuthzibuka ebi byuma omwo binalumbunukila." ²¹ (Omo baka Anthenisi boshe na bakamafuti eka baje bakele nakutumama kuje bamanethele thimbu yabo mu kwendeka nambe mukuthzibili byuma bimo bije byabihya.) ²² Oloni Paulu wamanene mukati ka ba Aleyongase na kwendeka ngwendi, "Eni banulume na mu Anthenisi, njamono ngwange munapu manene baka lukulahelo mubingila byeni byoshe. ²³ Omo njinende na kukenga ku byuma bije bimuka thzumabngeya, njawanene ha mutula haje bathoneka ngwabo, "Kuli Njambi uje kututhibuka," echi nawa mukathzingimika chakweneka ku chithzibuka, njitambekela kuli yeni. ²⁴ Njambi uje watangele kaye na byuma byoshe bilimo, oho ikeye Shukulu wa lilu na hathi, kethi kutumama mubitembele bya kutunga ku maboko. ²⁵ Nambe kethi kushaka tumupangele na maboko a banu, nge ngwabo watondele, chuma chimo, hakulinga ikeye babenya muka kwana mwonyo na kuhwima na byuma byoshe. ²⁶ Kutunda ku munalume umo watangele lifuti lyoshe lya banu ngechi akakale hathi hoshe, omo wabwehethele chimweja wangwile bithimbu na binginga bya mitambela kuje bayoyela, ²⁷ mangana bakatheke Njambi cho na mangana bakathse kuthsiba ngila yabo kuyehi na ikeye na kumuwana. Lalo kethi kulako kutunda kuli umo na umo wetu. ²⁸ Olojo muli ikeye twayoyela na kwendelamo na kukalamo, nge umo wa myatho yeni nendeka ngwendi, 'Olojo netu lalo tunapu tubana bendi.' ²⁹ "Choni, omo yetu tubana ba Njambi, kutwapandele kuthinganyaka ngwetu bifwa bya Njambi binapandama ku ngolinde nambe Siliva, nambe limanya — tumponya atuje bafulu nambe kushonga na bithinganyeka bya munu. ³⁰ Ha mulonga wechi Njambi kanene banu mulonga, ha bithimbu bije ku bathibukile obyo bakele na kulinga, olojo ha thimbu imo ali na kushika banu boshe kwoshe kwoshe ngwe batenguluke kububi bwabo. ³¹ Echi chinapu ngechi mwafwa nakako laja litangwa olyo lifuti lyoshe bakalithompetha mu buthunga kuli munalume yana shakula. Njambi nana chakuthzibukilaho ou munalume kuli munu woshe ha kulinga wamwindwile kubathsi. ³² Cho omo banalume baku Athenisi bathzibile ebi bya kuthanguka ku bathsi, bamo bashendumwine Paulu; oloni beka bendekele, "Tukuthzibilila yobe lalo hali ebi byuma." ³³ Hunima yebi, Paulu wabathethzele. ³⁴ Oloni banu bamo balikumbathanene nendi cho bakulahelele, hakati kabo umo wapwile Ndionisiyusi, ou wapwile ka Aleopangiti, munakathzi walithzinalya Ndamalisi, cho na beka na bakebo.