¹ Chojo Paulu wethzile lalo ku Ndembe na ku Lisitala, cho kengeni,, Ndongethi umo wa lithzina lya Timoteo wa kele kuje, uje wakele muna munakathzi wachi Yunda owo wakele muka kukulahela, olojo ishe wakele mu Ngiliki. ² Cho ba mushangathalele munene kuli bandolome baje bakele ku Lisitala na ku Ikoniyami. ³ Cho Paulu wa thetelele ngwendi aye nendi, chojo wa mwambatele na ku mutwala ku mukanda ha mulonga wa baje ba Yunda ba kele mu ije myela, mwafwa boshe ba thzibukile ngwe ishe wa pwile mu Ngiliki. ⁴ Chojo omwo mu bakele na Kwita mu binganda, ba kele na kwana baka kukulahela mashiko aje ba yongwele miluwa na bakulunu mu Yelusalema na kubaleka ngwe ba wa kabangeye. ⁵ Na mu kulinga ngocho bikungulukilo babi kolethele mu lukulahelo cho lalo byakele na ku tuminako ha litangwa ngwe halitangwa. ⁶ Cho Paulu na babuthamba bendi betile mu mitambela ya Pilingiya na Ngalatiya, mwafwa munthzinthzime wa kujela wa ba bindikile kwambulula lijwi mu lifuti lya Asiya. ⁷ Cho omo betele ku yehi na Misiya, bethekele kuya mu lifuti lya Mbitiniya, olojo munthzinthzime wa Yesu wa ba kangethele ku linga ngocho. ⁸ Chojo bongolokele Misiya na ku thikumuka ku nganda ya Tolowase. ⁹ Cho muthimbu ya buthsiki kwethzile chimona kuli Paulu: Wa mwene munalume wa ku lifuti lya Masendoniya nemana haje, cho wakele na ku mulomba ngwendi, "Ija ku Masendoniya mangana wa kutu kwatheko." ¹⁰ Omwo Paulu wa mwene chije chi mona, haje bene twatondele kuya ku Masendoniya, mwafwa twa thzibukile bene ngwe Njambi ikeye wa tu thanene mangana tuye na kwambulula muthzimbu na kuli bakebo. ¹¹ Chojo twa jabukile mu mbwato bwa kama ku tunda ku Tolowase, na ku batula ha kati na ku thungama ku Samotilase, cho hali kaki twethzile ku Niyapolisi. ¹² Cho omu twa fumine kuje cho twaile ku Filipu, oyo yapwa nganda ya Masendoniya, ije ya kele nganda ya Kulema manene mu mbongi cho nawa ba kele na ku iyula mu binthzili bya ba Loma, chijo twabandamenenemo muje munganda matangwa a mandondo. ¹³ Cho ha litangwa lya Sabata twatuhukile hanja ya chikolo ku yehi na ndonga, kuje twa thinganyekele ngwetu hamo kwakele mwela wa ku lombelela. Chojo twa tumamene hathi na kwendeka kuli banakathzi baje ba kungulukilile hamo kuje. ¹⁴ Cho munakathzi umo walithzina lya Lindiya, uje wakele na kulandetha landetha binanga bya bibwa bya ku benguluka bya fumine fumine ku nganda ya Sayatila, uje wa kele na ku lombela Njambi, wa tolililile kuli yetu. Chojo Mwene wa shokowelele mbunge yendi mangana a tolililile kuli bije bya kele na kwendeka Paulu. ¹⁵ Chojo omu balingile ikeye na baka njubo yendi bana ba mbwitika, wa tulombele ngwendi, "Umona ngwe mwanjimono kupwa uje munu ali na lukulahelo kuli Mwene, cho ijeni mu kale mu njubo yange." Chojo wa twaleleleho na ku tuthindiya kulinga echi. ¹⁶ Cho cha sholokele, omwo twa kele na kuya ku mwela wa malombelo, twa lihumanganene na mu mbanda wa ndungo uje wakele na munthzinthzime wa ku umikiya. Wa kele na ku nenela ba shukwa ina biyuko bwa bwingi kwithila mu kuumikiya. ¹⁷ Chojo ou munakathzi wa kabangeyeye munima ya Paulu netu na ku tambekela ngwendi, "Aba banalume aba ba ngamba ba Njambi wa Akamwa ya Boshe. Bali na kwambulula kuli yeni ngila ya kowboka." ¹⁸ Chojo wa lingile echi ha mathathe a mengi. Olojo Paulu, ha kulinga wa mulubalethele manene kuli uje mumbanda, wa tengulukile na kwendeka kuli uje munthzinthzime ngwendi, "Nji ku shika mu lithzina lya Yesu Kilisitu tunda muli ikeye." Chojo wa tundile muli ikeye ha hola ije bene. ¹⁹ Chojo omwoni baje ba shukwa ina ba mwene ngwabo bije byoshe biba kele na ku nganyala hali ikeye bya hwile, ba kwatele Paulu na Sailasi mu matoto na kuba pulunyila ku mwela wa ku landa na ku landethela kulutwe lwa baka ku shika. ²⁰ Chojo omu babanenele kuli Maako, baje baba nenele bendekele ngwabo, "Aba banalume bana nene mpindangano mu nganda yetu, Bakebo ba Yunda. ²¹ Cho bali na kulongetha futithi ije ku ya litombwele na meme ku ikabangeya embwe." ²² Chojo mbunga yoshe ya katukile na ku kungulukila Paulu na Sailasi; cho maako ba tabwothzele buthzalo bwa Paulu na Sailasi cho shikile ngwabo baba pupe na biti bya bi laja. ²³ Chojo omwo ni ba lingile ba na ba tu biñome bya bingi, cho ba bombilile mu kamenga na ku shika uje muka kubaka mu kamenga ngwabo a ba nyunge mwakulinga kethi bathe kutewa. ²⁴ Hanima ya ku mushika muje, uje muka ku nyunga kamenga wa bambatele na ku baka mukati kati ka mulili wa kamenga naku kuta medni abo mu tukunju. ²⁵ Chojo mukati ka buthsiki ba Paulu na Sailasi ba kele na ku lombela na kwimba myatho kuli Njambi, cho na bakwabo ba binthzinda ka kele naku tolilila kuli bakebo. ²⁶ Cho haje bane kwethzile mundenda wa kama, muchifwa cha kulinga na lubula lwa kamenga lwa liningangele; cho haje bene bikolo byoshe bya shokolokele, cho lalo na malenge a banu boshe abatukile. ²⁷ Chojo uje muka ku nyunga kamenga omu mwendukile ku tulo na kumona bikolo bya kamenga bya kushokoloka; wa shomwene mukwale wendi na kutonda kuli thsiya, mwafwa wathinganyekele ngwendi; binthzinda ba bombolokele. ²⁸ Olojo Paulu wa tambekelele na lijwi lya ku kanguka ngwendi, "Kethi uli bulumune, mwafwa tubabsohe tuli hano." ²⁹ Chojo uje muka kulama kamenga wa thanene ngwe ba muneneleko manongo cho bwathi bwathi wa kobelele mukati, cho oku ali na ku ngangama na lyoba, wa wililile ku lutwe lwa Paulu na Sailasi, ³⁰ cho wa ba tuhwithile hanja na kwendeka kuli bakebo ngweendi, "Malamba, bikajo binji napande kulinga mangana njoboke?" ³¹ Chojo bendekele kuli ikeye ngwabo, "Kulahela muli mwene Yesu, cho baka kwobola, yobe na bakanjubo yobe." ³² Chojo bendekele lijwi lya Mwene kuli ikeye, kwa kelaho na baje boshe bakele mu njubo yendi. ³³ Cho uje muka ku nyunga kamenga wa bambatele lalo ha thimbu ije bene buthsiki, chojo wa kushile na bimbandu byabo, cho haje bene ikeye na ba njubo yendi boshe baba mbwitikile. ³⁴ Chojo omwo mwakele na kunena ba Paulu na Sailasi ku njubo yendi na kuba tumbikila bilya ha lutwe lwabo, wa bwahelelele manene na baje boshe ba kele nabo munjubo yendi, ha mulonga wa kulinga ngwendi wa kulahelele oni muli Njambi. ³⁵ Cho omwo kwa kele, maako ba tumine lijwi kuli baka kulama kamenga, owow endekele ngwendi, "Echeleni obo banlume bali yile." ³⁶ Chojo na uje mukaku lama kamenga watethele waw majwi kuli Paulu ngwendi, "Maako bana nji tumina majwi ngwabo nji myechele muli yile. Chojo kumani tuhukeni mangana muli yile mu kwoloka." ³⁷ Olojo Paulu wendekele kuli bakebo ngwendi, "Bana tu pupile chitona mesho aku jeneka kutwetheka naku tuwanena mulonga, nameme twakala tu banu ba mu Loma—cho lalo ba tumbilile na mu kamenga. Chonini kumani ba tondoni ngwabo tufume na kuya ha kujeneka banu kuthzibuka echi? Embwe tunabyana! Tutonda bakebo bene babenya ba ije mangana ba kutuhule hanja." ³⁸ Chojo baje baka kulama kamenga betethele awa majwi kuli maako, cho omu ba thzibile ngwabo ba Paulu na Sailasi ba kele ba Loma, ba tewele manene. ³⁹ Chojo baje maako bethzile na kuli konekela kuli bakebo cho na kuba fumisa, cho lalo baba lombele ngwabo ba fumemo muje mu nganda na kuya kweka. ⁴⁰ Chojo Paulu na Sailasi ba tuhukile mu kamenga na kuya ku njubo ya Lindiya. Cho omwo ba Paulu na Sailasi ba mwene ba kaku kulahela, bedekele majwi aku ba takametha, cho na hanima baba thethzele naku fuma muje mu nganda.