¹ Hathimbu ije Mwene Helonde washangumukile kuapketha bamo baka mbunga mu chikungulwilo. ² Wathsiyile Yakomba ndolome ya Yowano na moko ya mukwale. ³ Cho omwo wamwene ngwendi echi china bwahetheletha ba yunda, cho watwaleleho kubuta lalo Petulu. Echi chalingiwile ha matangwa a chiwano cha makende aku jeneka chimballwila. ⁴ Hanima ya kumukwata, wa mwakele mu kamenga, wa mwanene ku binunga biwana bya maswalale ku munyunga; wayongwele kumutuhula kuli banu hanima ya Paseko. ⁵ Cho Petulu bamunyungilile mu kamenga, oloni chikungulwilo cha mulombelele na mbunge imo lika kuli Njambi. ⁶ Cho ha buthsiki buje bene omwo Helonde washakele ku mutuhula na kumunena ku kumuthompetha, Petulu walele mukati ka maswalale ba bali, wakukuta na malenge abali, thimbu ba kakunyunga ku chikolo chakulutwe bakele naku kenga-kenga ha kamenga koshe. ⁷ Mukutala, kangelo ka Shukulu wa sholokele kuli ikeye, cho muje mulili mwatwililile cheke. Cho uje kangelo waningangele Petulu ku bimati nakumwindula na kwendeka ngwendi, "Induka bwathi," cho haje bene malenge akele kumaboko endi awile. ⁸ Kangelo wendekele kuli ikeye ngwendi, "Thzala bithzalo byobe cho nawa kuta ku binkaku byobe." Petulu walingile ngocho bene. Uje kangelo wendekele kuli ikeye ngwendi, "Thzala buthzalo bwobe bwa helu cho unji kabangeye." ⁹ Cho Petulu wa kabangeyele uje kangelo na kutuhuka. Kathzibukule ngwendi ebi alina kulinga kangelo bya buthunga. Wa yongwele ngwendi ali na kumona chimona. ¹⁰ Cho omwo batubakanene uje muka kunyunga kamenga wakulibanga na uje wamu chibali, cho bethile ku lipito lya chikungo lije lya kushokolwela chikolo ku nganda; chalishokwelele chibenya. Batuhukile cho baile mutapalo, cho uje kangelo wathzethzele Petulu haje bene. ¹¹ Cho muje Petulu wanangukile, wendekele ngwendi, "Ololo njina thzibuka ngwange mwabuthunga Shukulu na tumu kangelo kuli yange nakunjitunditha kuliboko lya Helonde, naku byoshe bije ba Yundeya bashakele bilingiwe hali yange." ¹² Omwo wanukile ebi, waile ku njubo ya Maliya ina ya Yakomba, ou baka thana nawa ngwabo Mako, okwo mbunga yakama ya banu baliwanene na kulombela. ¹³ Omwo Petulu watotele ku lipito lya hanja, ngamba wa munakathzi wa lithzina lya Londa wethzile na kutabako. ¹⁴ Omo mwa thzibukile lijwi lya Petutlu, cho wa bwahelelele manene welukile chakujeneka kushokolola lipito; ngechije, welukile lumbithi mukati ka njubo; na kubaleka ngwendi Petulu nemana ku chikolo. ¹⁵ Cho bamulekele ngwabo, "Una thzaluka." Oloni ikeye wakumbulwile ngwendi mukemo bene. Bendekele ngwabo, "Kangelo kendi." ¹⁶ Oloni Petulu wa twaleleho na kutotela, cho omu bashokolwelele kulipito, ba mumwene cho bali komokelele. ¹⁷ Petulu wabanyatelele na liboko lyendi ngechi boloke, cho wabalekele omu Shukulu namu tuhwitha mu kamenga. Wendekele ngwendi, "Lekeniko Yakomba na ba ndolome." Cho wabathzethzele nakuya kuchela cheka. ¹⁸ Omo kwachile, kwakele chitanga chakama manene haktai ka baka kunyunga kamenga ha byalingikile ku Petulu. ¹⁹ Omo Helonde wa mutondele tondele wahonene kumuwana, cho wehwile baje baka kunyunga kamenga cho wanenele lushiko lwa kubathsiya. Hakeho wa tundile mu Yundeya nakuya kuya ku Sesaliya cho wakakele kuje. ²⁰ Hajebene Helonde wabihililile manene na banu baku Tile na Sindone. Baile kuli ikeye na bithingaanyeka bimo, hanima yaku lambelela Mbalasitale, Muhato wa Mwene, aba kwathe, balombele kupwa kwoloka mwafwa lifuti lyabo lya tambwile kulya chabo kufuma ku lifuti lya mwene. ²¹ Halingwa limo li bashakwile Helonde wathalele buthzalo byendi bya bumwene nakutumama ha litanda lyendi; cho wendekele kuli banu. ²² Cho banu batambekele, "Eli lijwi lya Njambi, kethi lya munu!" ²³ Haje bene kengelo ka Chukulu wapupile Helonde, mwafwa kanene Njambi bumpahu; bamulile kuli mainyo cho wathsile. ²⁴ Oloni lijwi lya Njambi lya twaleleleho cho lyakele nakutanda. ²⁵ Cho omu Mbanambase na Saulu ba manethele bipangi byabo, cho belukile ku Yelusalema, Amo mabulu akuthañulu ba wathonene ngwabo, "belukile ku Yelusalema." hamo na Yowano, ou bathanene nawa ngwabo Mako.