¹ Pele yebo ambola zyeelede zyamalailile akweninikweni. ² Iisya balumi bapati kuti babe basikitide, babe atwaango, bali amaano mulusyomo, muluyando amulukakatilo. ³ Munzila njoya, amuiisye banakazi bapati kuti babe aziwa zyabulemu, batabotamikizyi nanga kuba bazike kuli zyokunwa zinji, pele kubabaiisya ezyo zili kabotu. ⁴ Okuti baisye banakazi baciili baniini kuyanda balumi babo okuyanda bana babo. ⁵ Kuti babe a maano, akusalala, akukutauka kabotu mumaanda aabo, okuba baswiilila balumi babo, mukuti ijwi lya leza litakasampolwi. ⁶ Munzila njoonya mubalailila baalumi bacili baniini ku belesya maano mabotu. ⁷ Munzila zyoonse ziliwo yebo lwako uleelede kubacitondezyo cemilimo mibotu mukwiisya kwako, kotondezya bululami,abulemu. ⁸ Angawo majwi ngoamba abote katajisi mulandu, mukuti kufumbwa oyo uukazya akonzye kuusa nkaambo kokuti tabakwe cibi ncibanga batwaamba. ⁹ Amuisye bazike kuti kabalitesya kulibasimalelo babo muzintu zyoonse, kababotezya akutakazyana ambabo. ¹⁰ Kabatababidi, pele beelede kulitondezya kuti balasyomeka, mukuti munzila iili yoonse bakonzye kweeta bulemu bwenjisyo zyaleza mufutuli wesu. ¹¹ Nkaambo kuluse lwa leza lwakayubununa lufutuko kubantu boonse. ¹² Lutuiisya kusiya kasampu-sampu ezisusi zyabuntunsi, okuti tube obuumi bwakulijata,bulemu, ob kukomba leza mazuba aano. ¹³ Nkaambo tulangila buzuba bulelekidwe,nituzobona bulemu bwa leza we kali ngomupati o mufutuli wesu jesu kilisito. ¹⁴ Jesu wakalipa lwakwe kuliswebo mukuti atununune kuzwa kububi akucita kuti tusalale kulinguwe kuba bantu bankutwe bayandisya kucita milimo mibotu. ¹⁵ Amuzyambe zintu ezi, amubayumye-yumye bantu bazicite, ambi amubalailile cenguzu kutabi muntu uukubausya.