¹ Ino batumwa aba zyalwanyina bali mu Judiya bakanvwa kuti basimasi ambabo bali tambwide jwii lya leza. ² Kazide Pita ku Jelusalema, abo balikuzulwa kunkamu yokupalulwa bakamukazya: ³ Bakati,"wakanvwana abatapalwidwe okulya ambabo! ⁴ Pele Pita wakatalka kupandulula kambo mubulamfu kati, ⁵ "Ndalikukomba mucisi ca Jopa, mponya ndakaba ecilengano ceci gumbuli kacobuza ansi, anga cibiya cipati calekwa ansi kuzwa kujulu amabazu one acico cakaseluka alime. ⁶ Ndakacilangisisya ali ncico mponya ndakaciyeya, ndakabona banyama bamaulu one benyika banyama bomusaka, banyama bakalaba, abayuni bomuluwo. ⁷ Mponya ndakamvwa jwii liti kulime,"Buka,Pita: jaya ulye!" ⁸ Ndakati, itainsi namu mwami: nkambo takwe citasofwede na citasalali cakanjila kale mukanwa lyangu". ⁹ Pele ijwii lyakataba ape kuzwa kujulu,'leza ncasalazya, toyelede kucita kuti tacisalali.' ¹⁰ Eci cakacitika zindi zyotatwe, mponya zyeense zyakapilusigwa kujulu ape. ¹¹ Mulange, mponya awo kwali balumi botatwe bainvwi kunembo lye nganda mputwabede; bakatumwa kuzwa kuli sizaliya kuza kulime. ¹² Muuya wakandilailila kwinka ambabo, mponya kuti nditaciti citelelede kujatikizya ambabo. Aba bazyalwanyina bali tosanwe akomwi bakainka amibo, mponya twakanjila munganda yomwalumi. ¹³ Wakatwambila mbuli mbwakabona mungelo kainvwi munganda yakwe okuti, tuma balumi ku Jopa okupilusya Saimoni wiitwa kuti Pita. ¹⁴ Uyokwambila majwi atazokufutule-yebo omukwasyi wako wense. ¹⁵ Mbuli mbundakatalika kwambola kulimbabo, muuya usalala wakaza alimbabo, mbonyina mbutwakatambula aswibo kumatalikilo. ¹⁶ Ndakayeya majwi o mwami, mbuli mbwakamba, Joni masimpe wakabbizya a manzi, pele muyobbizigwa mumuya usalala. ¹⁷ Mponya na leza wakapa kulimbabo cileleko ciswana mbuli mbwakapa kuliswe nitwakashoma mumwami jesu kilisito, ndali ni, kuteti ndikazye leza?" ¹⁸ Nibakanvwa ezi zintu, takwe ncibakaamba mukutaba, pele bakalumbaizya leza okuti,"mponya leza watupa kweempwa kambo kaba simasi ambabo. ¹⁹ Ïno abo bakasabalanganizigwa amapenzi akabuka atala ali Sitivini akamwaikana kusika fenisiya, Saipulasi, oku Antiyoki, kwamba majwi kuma juda buyo. ²⁰ Pele bamwi babo, balumi kuzwa ku Saipulasi oku Sailini, bakaza ku Antiyoki okuyobwamba oku magiliki, kukambauka kulimbabo mulombe mubotu womwami jesu. ²¹ Janza lyo mwami lyali ambabo; mwelwe munji wakashoma okusandukila ku mwami. ²² Makani ajatikizya mbabo akanvwigwa kumbungano mu Jelusalemu, mponya bakatuma babelesi kusia ku Antiyoki. ²³ Nakaza okubona luse lwa leza, wakanonenwa mponya wakabakulwaizya beense kuti bakalilile mu mwami emyoyo yabo yeense. ²⁴ Kambo wali mwalumi mubotu uzwide muuya usalala mponya wolushomo, mponya bantu banji bakayungizizigwa ku mwami. ²⁵ Banabasi mponya wakainka ku Tasusi kuyandola Saulo. ²⁶ Nakamujana, wakamweta ku Antiyoki. Kwakaba kuti ko mwaaka weense bakabungana antomwi ecikombelo okwiisya bantu banji . Basikwiya bali bokusanguna kwiitwa kuti bana kilisito mu Antiyoki. ²⁷ Ino mumazuba aya bamwi basinsimi bakazwa ku Jelusalemu kwinka ku Antiyoki. ²⁸ Umwi wabo, Agabusi, wakainka okusinsima kwindila mumuya kutegwa nzala mpati iyoba munyika yeense. eci cakacitika mu mazuba a kilaudiyasi. ²⁹ Mponya basikwiya, mbuli umwi-oumwi mbwalikukonzya, bakayeya kutuma lugwasyo kugwasya kubazyalwanyina mu Judiya. ³⁰ Bakacita eci, bakatuma mali kuba pati-pati be cikombelo kwinda mujanza lya Banabasi o Saulo.