¹ Paulu mutumwa wa kilisitu Jesu kwendelanya amalailile a leza mugwasyi wesu o kilisitu Jesu mulangilizi wesu, ² kuli Timoti, mwana weni weni mulushomo, luse, lwengelelo, olumuno luzwa kuli leza tata o kilisitu Jesu mwami wesu. ³ Mbonya mbuli mbundakakulailila ciindi nindati kuyobuya ku Masedoniya, ukale mu Epesasi mukuti ulesye bamwi bantu kabataisyi, bumbi. ⁴ Nikuba kuswilizya twaano buyo okulibanda mazina amazyalane atakwe magolelo. ⁵ Iino muzezo wokulalila ngo luyando lwazwa kumoyo usalala, kuyeya kululeme, o lushomo a lweni lweni. ⁶ Bamwi bantu baliswekide kuzwa kuli ezi zintu nibakacilila kukazyanya kobufubafuba. ⁷ Bayanda kuba baisya mulawo, pele kabatazi nzibaboola nikuba ezyo nzibazumina. ⁸ Pele tulizi kuti mulawo ulikabotu na umwi waubelesya mbuwelede. ⁹ Tulizi namu, kuti mulawo tubambilidwe oyo ululeme, pele abo batyola abasigama, batakombi leza abasimucita zibi, akuli abo batasalali basofwede, abo bajaya maisi amanyina ngwabajayi, ¹⁰ ngwabasibwamu, ngwabo bacita nkwela kubalumi nyina a banakazi ku mwanakazi nyina, abo basikuba bantu nyina akubacita buzike, abajayi. ¹¹ Njiisyo ezi zilajanwa mumakani mabotu obulemu ambi zya leza ulemekwa wakandipa ngawo kuti ndisiye. ¹² Ndilumba kilisitu Jesu mwami wandipa nguzu, nkaambo wakandishoma okundipa mulimo wokumubelekela. ¹³ Ndili mukumusampola, kumupenzya okumutukila. Pele ndakatambula lwengelelo nkambo ndalikuzicita ezi nketana kushoma. ¹⁴ Ambi luse lo mwami wesu lwakaba lunji mponya wakandipa olushomo o luyando luli muli kilisiro Jesu. ¹⁵ Majwi aelede kutambulwa akushomwa ngaya ngokuti kilisito Jesu wakaza munyika kuzofutula basizibi. Ndime mubi windilila kuliaba. ¹⁶ Pele muli aka kaambo wakandibedaoluse, mukuti muli mebo, ndesizibi wiinda beense, kilisito Jesu abonye lwengelelo lwakwe lupati. Wakacicita eci kuti be ngo mukozyano kuli abo bayomushoma mukuti bakajane buumi butamani. ¹⁷ Iino ku mwami wecindi ceense, kali nguwe alike utaboneki, ngo leza alike, alemekwe okupegwa bulemu mane kukabe kutamani. Akube namuya. ¹⁸ Ndikupa malailile aya, Timoti, mwanangu, kwendelanya amajwi abasinsimi ngibakambola kwamba zyako, mukuti abe zilwanyo zyalwanya nkondo mbotu. ¹⁹ Ujatisye lushomo okuba amoyo utakwe kaambo. Mukutaswilila eci. Bamwi lushomo lwabo lwakanyonyoka, ²⁰ muli aba kuli Haimeneyusi o Alekizanda, abo mbindamba kuli satani mukuti baisigwe kutasampola limbi leza.