¹ Iino kusanguna, ndakumbila kuti zikumbizyo nkombyo, kwiima akati okupa milumbo kube kubantu beense. ² Kubami abo kuti mubwendelezi kucita kuti tukonzye kukala mulumuno mububotu omubulemu. ³ Eci ncibotu ape citambulike kubusyu bwa leza mufutuli wesu. ⁴ Uyanda bantu beense kuti bakafutululwe okuti basike kuluzibo lwamasimpe. ⁵ Nkaambo kuli leza womwi, ape kuli simwimi akati kaleza abantu, ngu Jesu kilisito. ⁶ Wakalipa mweni lwakwe kuti anunune bantu beense, mbuli bumboni acindi celede. ⁷ Akaambo kaya makanze wakandibika kuba mwendelezi o muntumwa ndili kwamba masimpe, nsilimukweni' omwiyi wabasimasi mulushomo omumasimpe. ⁸ Mponya ndiyanda balumi mucibaka ciliceense kuti bakombe amanza anyamwidwe omoyo usalala kakutakwe kunyema nikuba kukazyana. ⁹ Munzila njiyonyina, banakazi beelede kuzwata zibya zyeeleede, cobulemu okulibamba lwabo kutamba kulyoosa masusu mukulibonya nikuba kugama kuzwata zibya zidula, nikuba tusege twa ngoide na twengae, ¹⁰ kono baleelede kulibotya emilimo mibotu mbonyina mbubelede banakazi bakilisitu. ¹¹ Mwanakazi nibaisigwa balelede kulibatamika okuswililisya. ¹² Nsizumizya mwanakazi kuyisya nikuba kubalanga amutwe balumi, pele kunga kaumwinide buyo. ¹³ Adamu nguwakasanguna kulengwa, mponya Eva. ¹⁴ Adamu tainsi nguwakaenenwa, pele mwanakazi nguwakaenenwa ambi oku sotoka malailile aa leza. ¹⁵ Nikuba namu, mwanakazi uyofutulwa kwindila mukuzyala bana, kuti wajatisya mulushomo o muluyando o mukusalala kumizezo.