¹ Amubone kukomena koluyando tata ndwakatupa, lokuti katwitwa kuti tuli bana ba Leza, ambi mbutubede. Mukambo aka, inyika taituzi swebo, kambo tikamuzibidewe. ² Nomuyandwa, tuli bana ba Leza ino, ambi takuna kuyubununwa mbutuyoba. Tulizi kuti kilisitu akuboneka, tuyoba mbuli nguwe,esnsi tuyomubona mbonyina mbuli mbwabede. ³ Kufumbwa ni oni oyo ujesi olusyomo mukati mucamba mulinguwe walisalazya lwakwe mbonyina mbuli mbwasalala. ⁴ Kufumbwa oyo wabisya watyola mulawo. Mulizi kuti kilisitu wakayubunwindwa kuti ngogwisye zibi, ambi mulinguwe takukwe cibi. ⁵ Takukwe nanga womwi usyala mulinguwe uyozumanana kubisya. ⁶ Takwe ninga womwi uzumanana kubisya wakamubona na wamwizi. ⁷ Nobana, mutazumizi naba womwi kumusowa. Oyo ucita bubotu uli kabotu, mbonya mbuli kilisitu mbwaluleme. ⁸ Oyo ucita bubi nguwa satani, kambo satani wakabisya kuzwa kumatalikilo. Kambo kanamu mwan wa Leza ncakazida, mukuti azonyonyone zicita satani. ⁹ Kufumbwa oyo wakazyalwa kuzwa kuli Leza tazumanani kubisya, kambo mbuto ya Leza ilazyala mulinguwe. Takozya kuzwidilizya kubisya kambo wakazyalwa mubu Leza. ¹⁰ Muli eci bana ba Leza a bana ba satani balaboneka, kufumbwa oyo utaciti eco ciluleme tazwi kuli Leza, ncimwi buyo oyo utayandi mwenzinyina. ¹¹ Kambo oyu gomulumbe ngumwakamvwa kuzwa kumatalikilo, twelede kuyandana umwi o umwi . ¹² Takwelede kuba anga ngu kayini, wali kuzwa kumubi wakojaya muzyalwanyina. Ino wakamujaila nzi, kambo kokuti milimo yakwe yali mibi kalimuzyalwanyina wali kucita ziluleme. ¹³ Mutagambwi, nabana kuliswe, kuti bantu balimusulide . ¹⁴ Tulizi kuti twakainda kuzwa mulufu tuli mubumi, kambo tulayandana. Kufumbwa oyo utayandi mwenzinyina ucili mulufu. ¹⁵ Kufumbwa oyo utayandi mwenzinyina mujayi. Mulizi kuti takwe naba womwi mujayi ujesi bumi butamani bukede mulinguwe. ¹⁶ Kuli eci tulizi luyando, kambo kilisitu wakaba bumi bwakwe akambo kesu. Aswibi mbonyina mbutwelede kwaba bumi bwesu akambo kab enzuma. ¹⁷ Pele kufumbwa oyo ujesi zintu zyenyika, ulabona mwenzinyina ubulide, okujala moyo wakwe woluse kuzwa kulinguwe, ino luyando lwa Leza inga lwasyala buti mulinguwe, ¹⁸ Nobana bangu, luyando lwesu lutabi buyo lwamajwi na lwamulomo, pele lube kumicito okulusyomo. ¹⁹ Cili namu mbutunga twaziba kuti tucilila zyokweni kweni okuti tuyoba emyoyo ikede kunembo lyakwe. ²⁰ Kambo kokuti myoyo yesu ilatukatazya. Leza mupati kwinda myoyo yesu, ²¹ Nomuyandwa, na myoyo yesu taitukatazi, nkokuti tatukonzya kuyowa kunembo lya Leza. ²² Kufumbwa eco ncitwkumbila tulaba okutambula kuzwa kuli nguwe, kambo tucilila milawo yakwe ambi tulacita zintu zimunonezya. ²³ Ngoyu mulawo wakwe, ngokuti twelede kusyoma muzina lyo mwanakwe Jesu kilisitu okuyandana umwi oumwi, mbonyina buyo mbwakatupa oyu mulawo. ²⁴ Oyo ubamba milawo ya Leza ulikalilide mulinguwe, ambi Leza ulakala mulinguwe. Mbombubo mbutuzi kuti ulikede muliswe, kwindila ku muya ngwakatupa.