¹ Paulo, moaposetolo wa ga Jeso Keresete ka go rata ga Modimo, mo bathong ba Modimo ba ba boitshepo mo Efeso ebile ba ikanyega mo go Jeso Keresete. ² A tshegofatso le kagiso di nne le lona go tswa go Modimo Rara le Morena wa rona Jeso Keresete. ³ A Modimo le Morena wa rona Jeso Keresete a galalediwe, yo o re segofaditseng ka tshegofatso nngwe le nngwe ya se moya mo legodimong mo go Keresete. ⁴ Modimo o re tlhophile mo tshimologong ya lefatshe gore re nne boitshepo re sena selabe mo ponong ya gagwe. ⁵ Modimo o re itshenketse gole pele, a re dira bana ba gagwe mo go Jeso Keresete, go ya ka thato ya gagwe. ⁶ Go amogelwa ga rona go dira gore re ipele mo tshegofatsong ya gagwe e a e re fileng mahala mo go ene yo a mo ratang. ⁷ Mo go Jeso Keresete re rekolotswe ra ba ra itshwarelwa dibe ka madi a gagwe, go ya ka dikhumo tsa tshegofatso ya gagwe. ⁸ O goromeditse tshegofatso e mo go rona ka botlhale le tlhaloganyo. ⁹ Modimo o re bontshitse go rata ga gagwe mo go fitlhegileng, go ya ka se se mo itumedisang mme ebile a se supile mo go Keresete. ¹⁰ Tiro ya ga Keresete e ne ele ya nako ee tletseng, go tsisa dilo tsotlhe ga mmogo, dilo tsotlhe mo lefatsheng le mo legodimong, mo tlhogong ele nngwe fela eleng Keresete. ¹¹ Modimo o re kgethile go nna baja boswa mo go Keresete Jeso. O re kgethile go le pele, go yeng ka maikaelelo a ene yo o dirang dilo tsotlhe go ya ka thulaganyo ya gagwe. ¹² Modimo ore tlhophile re le bajaboswa jwa legodimo gore re tle re nne ba ntlha go nna le tsholofelo ee tletseng mo go Keresete, gore re tle re ise kgalaletso ko go ene. ¹³ Mo go Keresete, le lona, fa le utlwile lefoko la boammaruri, mafoko a poloko ya lona, la dumela mo go ene mme la kanelwa ka Moya yo o boitshepo yo le o solofeditsweng. ¹⁴ Moya yo o Boitshepo ke tlhomamiso ya boswa jwa rona go fitlhela re bo rua, gore re mo galaletse. ¹⁵ Ka lebaka le, fa e sale ke utlwa ka tumelo ya lona mo go Morena Jeso le lerato la lona mo baitsheping botlhe. ¹⁶ ga ke a emisa go leboga Modimo ka lona fa ke le rapelela. ¹⁷ Ke rapela gore Modimo wa Morena wa rona Jeso Keresete, Modimo wa kgalalelo , a le neele botlhale le tshenolelo go mo itse. ¹⁸ Ke rapela gore matlho a dipelo tsa lona a phatsimisediwe lesedi, gore le itse tsholofelo e e tlhomameng e a e le bileditseng le lehumo la boswa jwa gagwe fa gare ga baitshepi botlhe ba Modimo. ¹⁹ Mme ke rapela gore re itse bogolo jwa maatla a gagwe a sena bolekanyetso a a mo go rona ba re dumelang, go ya ka fa tirong ya nonofo ya gagwe e kgolo. ²⁰ A ke o ne maatla a Modimo a tsositseng Jeso Keresete ka one mo baswing a ba a mmaya ka fa letsong le legolo la Modimo kwa legodimong. ²¹ A tsholetsa Keresete godimo ga babusi botlhe, taolo, le maina otlhe a a biditsweng. Keresete o tlaa busa eseng mo nakong e fela, le mo nakong ee tla tlang. ²² Modimo o beile dilo tsotlhe ka fa tlase ga dinao tsa ga Keresete, mme a mo neela le kereke e le tlhogo ya dilo tsotlhe. ²³ Kereke ke mmele wa gagwe, mme o re tlatsa rotlhe ka maatla a gagwe jaaka a neela dilo tsotlhe botshelo.