¹ Fa Modimo a le tsositse le Keresete, batla dilo tse di kwa godimo, kwa Keresete a ntseng teng ka fa letsogong la moja la Modimo. ² Tlhatlhanyang ka dilo tse di kwa godimo, eseng ka dilo tse di mo lefatsheng. ³ Gonne o sule, mme botshelo jwa gago bo fitlhilwe le Keresete mo Modimong. ⁴ Fa Keresete a bonala, yo e leng botshelo jwa gago, o tla bonala nae mo kgalalelong. ⁵ Bolayang dilo tsa lefatshe, e bong, makgaphila a thobalano, bomaswe, maikutlo a tlhakanelo dikobo kwa ntle go lenyalo, keletso tse dibosula, bopelotshetlha, mo e leng kobamedi ya medimo ya disetwa. ⁶ Bogale jwa Modimo bo tshologela mo go ba ba senang kutlo ka ntlha ya dilo tse. ⁷ Lokile la bo le tsamaya mo dilong tse. ⁸ Mme jaanong le tshwanetse la kgaogana le dilo tse, bogale, tenego, keletso tse dibosula, matlhapa, le dipuo tse di bosula go tswa mo melomong ya lona. ⁹ Le seka la aketsanya, ka gore le apotse motho yo mogologolo le ditiro tsa gagwe, ¹⁰ mme le apere motho yo mosha yo o shafadiwang mo kitsong go nna mo tshwanong ya yo o o tlhodileng. ¹¹ Fa go senang Mogerika kgotsa Mojuta, yo o rupileng le yo o sa rupang, batswakwa, le ba Sentia, batlhanka, ba ba gololesegileng, mme Keresete ke tsotlhe, o mo go botlhe. ¹² Aparang boutlwelobotlhoko, tshiamo, boingotlo, bonolo, le bopelotelele jaaka ba ba kgethilweng ke Modimo, ba ba boitshepo, ba ba rategang. Itshokelelaneng. ¹³ Utlwelanang botlhoko. Fa mongwe a ngongorega ka yo mongwe, le itshwareleng jaaka Keresete a mo itshwaretse. ¹⁴ Mo godimo ga dilo tsotlhe, nnang le lerato le le re tshwaraganyang ka kagiso. ¹⁵ A kagiso ya ga Keresete e buse mo dipelong tsa lona. Ke ka kagiso e go bo le bileditswe go nna mmele o le mongwe. Mme lebogang. ¹⁶ A lefoko la ga Keresete le nne mo go lona ka botlalo. Rutanang ka botlhale, le kgothatsane ka dipesalema le dipina tsa semowa. Opelelang Modimo ka malebogo mo dipelong tsa lona. ¹⁷ Sepe se le se dirang, e ka nna ka lefoko kgotsa ka ditiro, se direng ka leina la ga Jeso Keresete. Neelang Modimo malebogo ka ene. ¹⁸ Basadi ba le nyetsweng ikobeleng banna ba lona, jaaka go tshwanetse mo Moreneng. ¹⁹ Banna ba le nyetseng, ratang basadi ba lona, le seka la ba shakgalela. ²⁰ Bana utlwang batsadi ba lona mo dilong tsotlhe, gonne mo go kgatlha morena. ²¹ Bo rrabana, se kgopiseng bana ba lona, gore le seka la ba kgobisamarapo. ²² Batlhanka, obamelang beng ba lona ka fa nameng mo dilo tsotlhe, e seng fela fa ba le bona gore le itumedise batho, mme e le ka dipelo tsa lona tsotlhe. Boifang Morena. ²³ Sengwe le sengwe se o se dirang, se dire ka mowa wa gago otlhe jaaka o direla Morena, e seng batho. ²⁴ Le a itse gore le tla amogela tuelo, e leng boswa go tswa mo Moreneng. Le direla Morena ebong Keresete. ²⁵ Ope yo o dirang tshiamololo, o tla a mogela katlholo ya tshiamololo ye a e dirileng, ga gona go mpampetsa.