¹ Cwale honi, yenu mwaapange okukena, yenu muna amuhele mupizo cho kuwilu. Mulemuhe Jesu, omu apositola na muprista o mukulu o tumelo chetu. ² Kuma naasepahala kwa Mulimu, oyo no muketa, mwenja Mushe kame omu sepahalele moshe munjiyo cha Mulimu. ³ Kakuli Jesu kumana moniwa ku kwata kanya chikulu ku pita cha Mushe, kakuli oyu no yakwa e njiyo akutekiwa kupita echo njiyo. ⁴ Kakuli echo njiyo choshe chakwata oyu naku chiyakwa, kono o muyakwi oinu yoshe Mulimu. ⁵ Oye Mushe kuma nasepahala munjiyo choshe cha Mulimu mwenja mutanga, yotendile oupaki oinu yaku ambiwa posho. ⁶ Kono Jesu asepahala mwenja mwana wo ku busa mu njiyo cha Mulimu, mi omunjiyo chaye yoyetu nji twa ongola okutwala kuma maneneno moku kolwa namu sepo tuku kuumuselize. ⁷ Mungeyo, kwafeka o muambelile o moya ukenu: ''pelo apo yuba e liywi liaye. ⁸ Waka tatafalisha o muchima oye o muna mwalukela, munako cho muliko mulihalaupa. ⁹ Echi neli nako chaka nyakulienu aa nanialukela okinilika, apo, neli munako cho ilimo yo makumi mane, kono kuma naamono eyi nanitenda. ¹⁰ Pangeyo nopo nichinena olo lusika. Nopo niamba nji, ''ayauluka yonone nako na nako mu michima choo. Kashilimuka amanjila ange''. ¹¹ Nopo ni kuecha muuchini: wange nopo niamba nji, 'kaku ingena mu pumulo change'''. ¹² Mumamele, mwaapange, mwendi mumweya okwenu atwesha kukwata muchima ouyi, okukana kuitana, muchima okualukela o Mulimu woku yoya. ¹³ Kono, mukukataze liuwa na liuwa, okushikile elifuwa,'' lioku amba'' nji ''pelo'', kuli kuulwe okwenu oyu kutatafaza o muchima muku hongiwa ku sibi. ¹⁴ Kakuli tunapiwa shimba kwa Kreste nji twaongola musepo chetu okwae kutunda kuma tatekelo kutwala kuma maneneno. ¹⁵ Kweyi kwa ambiwa nji, ''pelo,apo yuba e liywi liaye, waka tatafalisha o muchima, mwenja apa na nialukela''. ¹⁶ Aka anyi nayuba Mulimu naku mualukela? Kaha onio aa natunda ku Engepita mutaiso cha Mushe? ¹⁷ Aa nachinena e myaka cho makumi mane? Kaha onio natenda sibi, aya nafela mulihalaupa? ¹⁸ Aka anyi ana kuechela nji kaku ingena mu pumulo chaye, kaha onio aya nakana okuyuba? ¹⁹ Twa mona nji kela atwesha oku ingena mu pumulo chaye paku shaitana eyi naamba.