1 Mumanyima nei inu, Jesu oca muhyambwaliya no liwate lya Galilea, eli kame lihyaniwa liwate lya Tiberiya. 2 Anu angi neli a mukoña kakuli neli amona isupo na tenda no kukola. 3 Jesu opo akambama kulilundu na kuka tongomana na alutiwa ae. 4 (Henyi Paseka, o mukiti wa majuda, neli wa hyenyenena.) 5 Apa Jesu nataneka omona anu angi a keile o kwae, opo oamba kwa Filipi,"kuma tu ula kupi ihima inji aanu alye?" 6 (Kono Jesu kuma naamba kulika Filipi, kakuli oye hinda nolimuka ehi a kutenda.) 7 Filipi omulaba,"mianda ciili no denari kuciula ihima kaci kwanine hiwanga kanyonyo." 8 Omweya kuapositola, Andresi mina Simoni Pitolosi oamba kwa Jesu. 9 Kuno kwaikala mwanukana wa mulume oyu kwite imingwa mutanu no inkwa na shi ciili, henyi ei ike kwanu akumine apa?" 10 Jesu oamba,"mutende anu a tongomane pashi."Neli kwaikala muhonyi ungi omo muhibaka. Ao anu opo a tongomana pashi, neli mutanu no lule no anu. 11 Jesu ohimba oi nkwa mumanyima no kukutumela , opa ao na tongomana. Otendala mo na shi, kuca omu na faela. 12 Apa anu naikuta, opo oamba ku alutiwa ae,"Muwaneke uungululwa una hiyala, nji kuulwe ehi hisinyeha." 13 Henyi yopo a waneka uungulula na kuumba mayongo likumi na meli no imingwa mutanu no ingwa una hiwa kwa na lya. 14 Henyi, anu apa namona ehi hisupo ehi natenda, oamba,"oyu yahikuma mupolofita oyu wakukeya mu lifasi." 15 Apa Jesu na lemuha nji atamba kukeya na kuya mukwa na kumuhapeleza nji amutende mulena, oshuluka kame palwae kutunda pa lilundu. 16 Apa uhiku ukuma, alutiwa ae opo a hyetumukela ku liwate. 17 Opo aingena mu hisepe, a hupuka kuca ku kapenauma. Mweco nako neli kwa helaula, Jesu neli hiwanji kale akeya okwoo. 18 Neli kwa fuka moya ukulu, na liwate neli lya tateka kwipa. 19 Anamana kubua makumi meli na mutanu kapa makumi no ma mita, amona Jesu yo endile pa liwate kukeya kunyonga no hisepe, opo aiyapa. 20 Kono oambela, "yome ! komu neyepa." 21 Opo henyi akutakaleza kumuamuhela muhisepe, popo hisepe hopo hika kuma ku likamba oko naa ca. 22 Oliwa na litatama, hicaba no himana pahambwaliya no liwate mana himona nji hiwanjiko hisepe hikwahyo ene hyo, kame Jesu hiwanji a hingena na lutiwa ae kono alutiwa ae neli a funduka ohoci. 23 Kono, neli kwaikala isepe ikwayo naipana ku Tiberiya pepi na hibaka na lyela imingwa no inkwa mumanyima a mulena kupa tumbo. 24 Apa hicaba no hilimuka nji na Jesu na alutiwa ae hiwanji yu ikile, ao oñene aingena muhisepe na kuca ku kapenauma afaile Jesu. 25 Apa na muwana muhambwaliya no liwate, aamba kwae,"Rabbi, kamwaka yona keye kuno?" 26 Jesu oalaba kuamba, "muniti, niti, mwani faa, kanji neeli pakumona isupo, kono kakuli kuma na muli ingwa na kuikuta. 27 Kenanji kubelekela ilya ei ipwile, kono mubelekele oilya ei imitwala kumoyo no kuhapwa ou a kumipa mwana munu, kakuli mulimu Tate ona tulu oliswayo lyae opae." 28 Opo oamba, okwae, "Ike ei tu swaena kutenda, nji tutenda misebezi ca mulimu?" 29 Jesu oalaba na kuamba okoo,"ou wonyioko musebezi wa mulimu: Onwi mulumele kuyo na na tuma." 30 Opo oamba okwae,"Hisupo mbike ehi waku tenda, inji tumone naku lumela? Ike ei waku tenda? 31 Aka ihwetu nalya mana mu lihalaupa, wenji omu ku ñoleliwa, Neli apa hingwa no kutunda kuwilu nji alye." 32 Henyi Jesu oa alaba, "kaniti,niti, kenanji Mushe oyu no mipa hingwa kutunda kuwilu, kono Tate oyu mipile ohingwa no niti kutunda kuwilu. 33 Kakuli ohingwa hya mulimu nga hiya hikeile ku tunda kuwilu na kupa lifasi o upilo." 34 Henyi opo oamba okwae, "mulena, oyupe ehi hingwa nako cohye." 35 Jesu opo amba okwae,"yome hingwa no upilo; oyu keya kwange hiwanji kufa njala, nayu itana okwange ka kufa linyotwa. 36 Kono neli na miambela nji kaniti munani mono, kono hiwanji kuitana. 37 Yohye oyu anamipu Tate kuma a keya kwange, nayu okeya kwange kana kumuyumbela panji. 38 Kakuli hina keye pashi kutunda kuwilu, kenanji kuya tenda kuhinga kwange, kono kuhinga kwoyo noni tumu. 39 Oku kuhinga kwoyo noni tumu, nji kohina yawa hiwanga omweya kwao ananipu, kono nji nia ingule muliwa no mamaneno. 40 Kakuli oku kuhinga kwa Tate, nji yohye oyu mona mwana na kuitana okwae awane upilo nokuhapiwa kame kuma na kumuingula muliwa muliwa no mamaneno." 41 Opo majuda amuhonona kakuli noa ambela,"yome no hingwa hina keye pashi kutunda kuwilu." 42 Aamba,"kenanji yonyiko Jesu mwana Josefa, oyu ihwae na inawae tulimukile? kwakeya ngepi nji pano oamba nji, Hina keye pashi kutunda kuwilu' ?" 43 Jesu olaba na kuamba koo, "mulehye kuhonona mukaci kenu. 44 Hiwanji oyu twehya kukeya kwange ene kwa Tate oyu nani tumu yo muleta, kame kuma na kumwingula muliwa no mamaneno. 45 Kuna ñoliwa kwa apolofita," 'yohye munu kamamba lutiwa na Mulimu. ' Yohye oyu nayuba nakukututa kwa Tate kuma akeya kwange. 46 Mu limuke nji oyu mona Tate, ene oyu tundile kwa Mulimu- ona mono Tate. 47 Yahikuma,yahikuma, oyu oitana akwata moyo no kuhapwa. 48 Yome hingwa no upilo. 49 Aka ihwenu neli alya mana mu lihalaupa, ana kufa. 50 Ehi hyonyiko hingwa hina keye pashi kutunda kuwilu, nji munu a lyeko hiemba nji kuanafa. 51 Yome no hingwa hiyumi na hikeya pashi kutunda ku wilu. Inji munu alya kwehi hingwa, kuma mba, ayoyelela. Ehingwa ni muipa co nyama cange pa moya no litunga. 52 O majuda anyongonya mukaci koo na kutateka kuku kunanihya mukaci koo, oambile ,"oyu munu kuma akutapa ngepi nyama cae nji olye? 53 Henyi Jesu oamba okoo, "yahikuma, ene mulya kunyama ca mwana munu na kunwa unyinga wae, ka mwakukwata moyo mukaci kenu. 54 Yohye oyu llya nyame cange na kunwa ucinga wange okwata upilo wakuhapwa, kame kuma ni muingula pa liwa no mamaneno. 55 Kakuli nyama cange ilya ya hikuma, na unyinga wange hino hya hikuma. 56 Oyu lya nyama cange na kunwa unyinga wange ahiyala kwange, name okwae. 57 Omo Tate no kuyoyo anani tumene, apa name ni yoya mulibaka lya Tate, kona kuli oyu lyome, kama a yoya mulibaka lyange. 58 Ehi hyonyiko hingwa nahikeya pashi kuyunda kuwilu, kanji ana kulyela aka ihwetu na kufa. Oyu lya ehi hingwa kuma a yoyelela." 59 Kono Jesu no amba ei inu mu sinangonge yolutile mu Kapernauma. 60 Henyi oungi na alutiwa ae apa na yuba ei aamba,"ou muambelo ukalu kuamba;anyi oyu twehya kuuyuba?" 61 Jesu, kakuli kuma na limuka yohinda nji alutiwa ae neli anunganunga ei na amba, Oambela, ''Ei inu yaku foseza? 62 Henyi kuma kwikala ngepi nji mwana munu yo ca oku napana? 63 Moya wonyiko uletile kuyoya; onyama hiwanji ei ciletile. Omai ina amba kwenu a moya, na upilo. 64 Kono okwenu kwaikala a kanine kuitana."Kakuli Jesu neli alimuka kuma tatekelo ao okukuma kuitana nayu wa kumubeteka. 65 Opo oamba koo, Lyonyiko libaka nani miambela nji hiwanji ko oyu keya kwange ene oyo itanihiwa na Tate." 66 Mu libaka nei, oungi no alutiwa ae aca kumihya hiwanji kame aenda nae. 67 Henyi Jesu oamba kua likumi na ili,"onwi kamwa kuca nanwi, inji kuma muca?" 68 Simoni Pitolosi omualaba,"mulena, kwanyi nga okutuca" yowe okwite mai no moyo no kuhapwa, 69 Tuna itana na kulimuka nji yowe no kukena wa mulimu," 70 Jesu opo amba okoo, "Hiwanji na miketa, mua likumi naili, omweya okwenu?" 71 Henyi mana amba ya Judasi Isikariota, kakuli neli oye, omweya kwa likumi naili, oyu wa kusheleka Jesu.