¹ Henyi ama hikuhiku pa hikenakeni noliwa no matatekelo no viki, ko ku hiilaulile, Maliya Magadalena yopo ca ku hingo oku naya wananji ehingo hinayanjuluka. ² Yopo aituka kukeya kwa Simoni Pitolosi nakwa alutiwa akwae aya na hingiwanga yonene kwa Jesu, naku ka aambela, "Ana himbi mulena ku mutwala kwako kumutundihya muliteke, kame katu limukile oku ana ka mubumbeka." ³ Henyi Pitolosi naakwaye alutiwa aca, kuca ku hingo. ⁴ Oshe pamweya aituka,omweya no alutiwa kuhiya Pitolosi kuka kuma ku hingo. ⁵ Apa akengena, aka mona enyambi co ciunganinepo, kono hiwanji aingena mukaci. ⁶ Apa Simoni Pitolosi na kakuma mumanyima noyo mukwaye yopo kengena muliteke.Yopo mona nyambi co cinonganapo ⁷ na lwambi olu naa kununganga ku mutwi. Natukena twa bungeliwa pa mweya na mambi kono neli twa bungabungiwa na ku tu paka totuhoci. ⁸ Omulutiwa oya notangela kuka kuma ku hingo, naye yopo ingena muliteke kukamona na kuketana. ⁹ Napo nakena autwisisa aman'olo aa naamba nji kumamba ainguka kutunda kwaafu. ¹⁰ Ene alutiwa a huka ku mwanda kame. ¹¹ Kono Maliya kuma neemana panji no liteke yo lilile. Yo lilile, naye yopo oingena muliteke. ¹² Omu naa kamona mangeloi meli ana kumanga ikenu atongomanine, limweya ku mutwi limweya kumaulu omu na hyendeka olutu lwa Jesu. Yopo amuambela, "owe mukaci, kanti ike yo tondokile?" ¹³ Yopo alaba nji, kakuli ana himbi omu lena wange, kame ka nilimukile oku ana mupaka." ¹⁴ Apa aamba eyo, oyo mukaci apa akutemuna aha mona Jesu yoimanine pepi naye, kono nokena amulimuka nji yo Jesu. ¹⁵ Jesu yopo aamba okwaye, "owe mukaci, kanti ei otondokile ike? kandi oyu faile anyi?"kumana kengeela nji yo minya hyanda, yopo mualaba nji, "Tate, nji yonwi muna muhimbulula, muni monihye oku muna kamutula, name nika muhimbe ni ce naye." ¹⁶ Jesu ene oamba okwaye, "Maliya."Okutemuna naku mutambula muhi aramaiki," Rabbani(kuamba nji muluti). ¹⁷ Jesu yopo muambela nji,"kona nikwata, kakuli kale ahyele naca ku wilu kwa Tate, kono oce kwa honyiange okaambele nji nihica kwa Tate ku wilu oyi hwenu nanwi, kame yo Mulimu wange yo Mulimu wenu." ¹⁸ Maliya Magadalena oca ku kaambela alutiwa,"Hina ka mona Mulena," oyu naka niambela eyinu yoshe. ¹⁹ Kumangolwangolwa nolyo liyiwa, e liyiwa no matatekelo ku viki, emyelo coci na kiiwa omu naikala alutiwa kwiyapa ama Juda, Jesu yopo keya kuyaimana mukaci koo nakuambela nji, "kozo cikale nenu." ²⁰ Apa na mana kuambela ngeyo, yopo amonihya mu makaha naku maci caye. Alutiwa awapela amona Mulena. ²¹ Jesu yopo amba koo kame, "kozo cikale nenu. wenji omu ana nitumene Tate, henyi name namituma." ²² Jesu yomana kuamba ngeyo, yopo afucela moya na kwaambela nji, "Muamuhele moya ukenu. ²³ Yoshe oyu tenda sibi mumu swalele, ana swaleliwa; yoshe oyu mukana ku swalela, ina bulukiwa." ²⁴ Tomasi, waku hikwata noalutiwa ali kumi naaili, oyu noihyaniwanga Didimasi, nokena ekalapo apa Jesu naakeya. ²⁵ Akwaye alutiwa yopo aya muambelala, "Ene twa mona Mulena "yopo aalaba nji, "Ene apa mba ni mumona mu makaha muya na mu kokotela naipikili, na ku kwata muma n'iba no ipikili, na ku mukwata ku maci, eyo koniitanine." ²⁶ Mu manyima no maiwa mutanu na mahatu alutiwa kame akuwana munjiyo kame, Tomasi naye paneekala, Jesu yopo keya emyelo coci na kiiwa, na kwa kwiimana mukaci koo, nakuamba nji, "kozo cikale nenu." ²⁷ Yopo ambela Tomasi nji, "Wa ukwate ama kaha ange omone. Waukwate ku maci cange na likaha lyoye. Kona kanananga, kono oitanange." ²⁸ Tomasi yopo alaba nakuamba nji,"Mulena wange na Mulimu wange." ²⁹ Jesu yopo muambela nji, "kakuli ona nimono, onetana. ku nafuyauliwa ao anakana kunimona kono anetana." ³⁰ Jesu ku mana tenda imakazo ingi pa kaci no alutiwa, imakazo naikana ku n'oliwa mubuka omu, ³¹ kono eyi nai n'oliwa nji muitane nji Jesu yoye Kilesite, mwana Mulimu, na kulumela, nji mo kwata upilo mulicina Lyae.