¹ Abrahama yopo tuta okunaikala kumboela, naukekala mukaci ka Kadeshi na Shuli. Neli ñongwa mu Gerari. ² Abrahama manaamba mulibaka lya munuwae Sara, "nji manjange." Henyi Abimeleki mulena ku Gerari yopo kahimba Sara. ³ Kono Mulimu yopo keya mutulo kwa Abimeleki ouhiku, naku mwambela nji, "Mone wafa libaka lyoyu mukaci ona himbi, kakuli munu wamunu." ⁴ Kono Abimeleki hiwanji weli akwekela kwae, oamba nji , "owe mulena, watwehya kuipaa hiwanga litunga no kuluka? ⁵ Kananji yoye yohinda noni ambelanji manjange? Hiwanga oye mukaci yoñene monaamba nji, 'manjange.' Hina tende ei mukukena nomucima wange na kuluka ko makaha ange." ⁶ Henyi Mulimu yopo aamba kwae mutulo, "Eee, nalimukanji mona tende namucima ukenu, ngapa henyi hina kucikele inji kona tenda sibi okwange. Ngapa hina kana kukulesha nji omukwate. ⁷ Apa henyi ohuce munu wo munu kakuli mupolofita. Maakakulapelela, henyi mokayoya. Kono nji komuhucile, olimuke nji owe na anu oye oshe mamufa hemwa. ⁸ Abimeleki yopo inguka mahikuhiku na kuihyanena apika ae okwae. Nakuambela ei inu yoshe, nakuiyapa enene. ⁹ Abimeleki yopo ihyana Abrahama na kumuambela nji, "Ike yonatende kwetu? kapa hina kuipihyece kupi, apo tuletelile ome na mubuso wange mulandu ukulu ngeya? ¹⁰ Abimeleki yopo ambela Abrahama, "Ike yoina lete nji o tende ei inu?" ¹¹ Abrahama yopo ambanji, "kakuli mohinanahana nji, 'akuhyako aaiyapile Mulimu muno muhibaka, inji maanipaa libaka lya munu wange' ¹² Eco hemwa niti, hemwa manjage mwana tate wa mukaci, henyi yopo ikala munuwange. ¹³ Mulimu manaaleta nji nihiye njiyo ca tate, na kuni yembaanihya muhibaka na hibaka, niambo kwae, 'wa swanela kuni monihya nji omunu wange: Kuhibaka hyoshe tuca, "Onitoe nji, " manjange.'''' ¹⁴ Abimeleki yopo himba mangu na ngombe, naapika noa lume naapika noa kaci, nakuapa Abrahama. Henyi yopo huca Sara, munu wa Abrahama, okwae. ¹⁵ Abimeleki yopo amba nji, 'otaneke hibaka hyange hyaikala posho coe, oikale poshe apotabelile". ¹⁶ Kwa Sara yopo amba nji, "otaneke, hinapu manjoe hikiti noa silibela. Nji ni fuke ou fosi ina tende koe pa meño noa oshe aikile noe, na ku munu yoshe, ona kenihiwa hyemwa." ¹⁷ Abrahama yopo lapela kwa Mulimu, na Mulimu oyoihya Abimeleki, munu wae, apika ae noa kaci nji atwehye kueleka ana. ¹⁸ Kakuli ominya moyo monaa kwala olweleko loshe lwa njiyo ca Abimeleki libaka lya Sara, munu wa Abrahama.