¹ A masiku siku eli no sunda, ko kwi monala kwilaula, Maria Magdalena no wiya ku mbumbo na ku wiya ku wana ngao e liwe lina alumuniwa ku tunda ku mbumbo. ² Keo o ituka na kutha kwa Simoni Pitrosi na ku mulutiwa o mukwaye oyo Jesu na wapela yonene, na ku ka ambela ngao, ''Ana tundisa Mulena mu mbumbo, kame ko tu limuka omu ana ka mu paka kao.'' ³ Keo Pitrosi noyo mulutiwa o mu kwaye a yoyoka, na kutha ku mbumbo. ⁴ Mwana lupukela pa mweya mu wiili woo, mane oyo mulutiwa o mukwaye keo o teula Pitrosi na ku kalisa ku ka kuma wangu ku mbumbo. ⁵ Apa naka okelamo, noka mona a maina kuno ana lala pashi, kono no imwa kwingena mu kachi. ⁶ Simoni Pitrosi keo o wiya ku kuma yona sialele na kwingena mushi no mbumbo. No mona a maina kuno ana ku laele ambu ⁷ kupaka na taulo no thi pakiwa ku mutwi waye. E taulo etho no thimwa kwi kala pa mweya na maina oshe kono mono thi thingeliwa tho fochi kuno tho thili ku manyonga. ⁸ Keo oyo mulutiwa o mukwaye, noka kuma wangu ku mbumbo, naye kame keo o ingena mushi, keo oka ku mweena na kwitana. ⁹ Ka kuli ku leta na petho nako na imwa ku yubisisa e liñolo no lyamba ngao Jesu a swanela kwinguka kwafu. ¹⁰ Awo a lutiwa keo a ukela ku munthi. ¹¹ Kono Maria oye mwana imana panthi no mbumbo kuno yotha na ku lila. Kuno yotha na ku lila ngeyo, no okela mu kachi no mbumbo. ¹² No mona a mangeloi meli ana ku manga mu ito ikenu kuno a na tomana, limweya ku mutwi, na likwalyo ku maulu no apo pa sibaka na laleka e sithimbi sa Jesu. ¹³ A mangeloi na mwambela ngao, ''Woyu mukathi, ike apo lila ngeyo?'' Oye keo oa alaba ngao, ''Ka kuli ana shimbi Mwolyange, kame koni limuka oku ana ka mupaka kao.'' ¹⁴ Apa natha na kwamba ngeyo, no ku temuna na ku mona Jesu yonemana, kono no imwa ku limuka ngao neli Jesu. ¹⁵ Jesu keo o mwambela ngao, ''Woyu mukathi, ike apotha na ku lila ngeyo? Wa saela ani?'' Kakuli Maria mwana nana ngao mwendi neli o mulimi nomo mu silwa, keo o mwambela ngao, ''Mwolyange, aiba ndi owe ona mu shimbula muno, oni ambele oku naka mupaka, ngao ni ka mushimbe.'' ¹⁶ Jesu keo o mwambela ngao, ''Maria.'' Keo o ku temuna, na ku mwalaba mu siheberu ngao, ''Rabbuni'' kwamba ngao Muluti wange''. ¹⁷ Jesu keo o mwambela ngao, ''Kona ni kwata, ka kuli kona itha kale ku wilu kwa Tate kao, kono othe oka tonwele apange ngao nitha weli kwa Tate o Iwenu, mane o Mulimu wange na Mulimu wenu kame.'' ¹⁸ Maria Magdalena keo otha na ku kambela a lutiwa ngao, ''Mo ina ku mono na Mulena,''kame yonyiko ona ni laethe ngeyo. ¹⁹ E singola ngola nelyo liwa, no utangi mu biki no sunda, e yelo mono ipatiwa omo a lutiwa oshe ne kala kwi yapa a Majuda, Jesu keo o wiya na kwi mana mu kachi koo kwambela ngao, ''E kotho thi kale nenu.'' ²⁰ Apa na manisa kwamba ngeyo, no a monisa a makaa aye na lupachi lwaye. A lutiwa aye mwana wapela yonene apa na mona Mulena. ²¹ Jesu keo kame o ambela ngao, ''E kotho thi kale nenu. Wetini Tate omo ana ni tumene, name kame na mi tuma ngeyo.'' ²² Apa jesu na manisa kwamba ngeyo, no a futhela e mepo na kwambela ngao, ''Mu shimbe e Mepo e thi kenu. ²³ Ao oshe mu tamba ku swalela e ibi yoo, keo ana swaleliwa, kame nao mu kana ku swalela e ibi yoo, keo koya i saleliwa kao.'' ²⁴ Tomas, omweya no likumi na ili, no isaniwa Didyma, ka ikalipo kao apa Jesu na wiya. ²⁵ A lutiwa a kwaye keo a wiya ku mwambela ngao, ''Mo tuna mono Mulena.'' Oye keo o alaba ngao, ''Ku mona ni kana ku mona e ipwalonda omu no ingena e ipikili, mane na kwi ngenisamo e minwe thange, mane kame na ku kwata e likaa lyange ku machi thaye, keo koni twese kwitana kao.'' ²⁶ Apa no ku pita maiwa mutanu na matu a lutiwa aye mwana ku wanekela kame munthuwo, mane Tomasi naye mwane kala noo pamweya. Jesu keo o ingena kuno e yelo yo ina patiwa, na ku wiya kwemana mu kachi, na kwambela a lutiwa aye ngao, ''O kuyubisisa kwi kale nenu.'' ²⁷ Keo o ambela Tomasi kame ngao, ''O shenyisethe o munwe woye kuno o kwate a makaa ange. O shenyise kame na likaa lyoye o ni kwate ku machi. Kone kala wambula kwitana, kono o itane.'' ²⁸ Tomasi keo o alaba Jesu na kwamba ngao, ''Mwolyange owe o Mulimu wange.'' ²⁹ Jesu keo o mwalaba ngao, ''Ka kuli ana ni mono, keo o netana. A kwite fuyawethi oa ana kana kale ku mona, kono ana twese kwitana.'' ³⁰ Keyo ambu kao, kono Jesu mwana tenda isupo ingi pa meo no a lutiwa aye eyo no ikana ku ñoliwa mwethi buka, ³¹ kono eyi mono iñoliwa ngao ngo mwitane ngao Jesu kandi yonyiko o Kreste, o Mwana Mulimu, mane kame mu kwitana kwenu, ngo mu wane moyo mu lithina lyaye.