¹ Apa Jesu na manisa kwamba ngeyo, mwana yoyolela a meo aye ku wilu na kwamba ngao, ''Tate e nako thina kumu, o lumbeke Mwanoye ngao na mwanoye naye nga ku lumbeke---- ² wetini omo no mupela a maata peulu no inu yoshe no yumbiwa ngao nga twese kupa o moyo nombula kupwa ku munu yoshe oyo no mupa. ³ Ou wonyiko o moyo nombula kupwa: Ngao a ku limuke, owe o Mulimu o fochi no sikuma, noyo no tuma, oye Jesu Kreste. ⁴ Mono ni ku lumbeka mu kaye. Ina manisa o musebethi owo no nipa ngao niu tende. ⁵ Pano eni, owe Tate, oni lumbeke poso thoye na kanya etho no ni kwata o kwoye nje kale a kaye ka umbiwe. ⁶ Mono ni monalisa e lithina lyoye kwanu ao no nipa mu kaye. Neli anu oye, kono keo mono a nipa, mane kame ana buluka na lii lyoye. ⁷ Pano ana limuka ngao e inu yoshe no nipa ya panena o kwoye, ⁸ ka kuli mo inapu a mai ao no nipa. Na shimba mane ya sikuma emwa na limuka ngao mono ni pana o kwoye, mane na itana ngao owe kandi yonyiko no ni tuma. ⁹ Na lapeela. Koni lapeela ao no mu kaye kao kono na lapeela ao no nipa, ka kuli anu oye. ¹⁰ E inu yange yoshe yoye, mane na yoye kame yange, mane yonyiko ini letela ngao ni lumbekiwe. ¹¹ Ko niili mu kaye kao, kono ao anu e kala mu kaye, mane ome na wiya o kwoye. Owe Tate no ku kena, oa buluke na lithina lyoye ao na nipu ngao a piluke a mweya wetini omo tu lyele pa mweya. ¹² Mwetho nako o nili noo, mono ni a buluka na lithina lyoye, elyo no nipa. Mono ni a sileletha, mane ko kuli shiwa o mweya oyu na yongo kao, keti o mwana o ipaiwa, ngao a mañolo nga ku talelethe. ¹³ Pano na wiya o kwoye, kono nambela eyi yambo mu kaye ngao o ku wapela kwange ngo ku ku talelethe o kwoo. ¹⁴ Mo ina tonwele e lii lyoye, mane a kaye keo kana thimbi ka kuli seli kanu a kano kaye kao ¹⁵ Koni ku lapela ngao oa tundise mu kaye kao, kono ngao oa silelethe kwanu a nyangunyu. ¹⁶ Kali anu a muno mu kaye kao, weti kame name apa ni kana kuli wa muno mu kaye. ¹⁷ O ape oku ku kenisa kwoye no sikuma. Ka kuli e lii lyoye lyonyiko no sikuma. ¹⁸ Wetini omo no ni tumena mu kaye, name kame na tuma mu kaye. ¹⁹ Kabakala ao naku kenisetha, ngao nao fochi nga ku kenise ya sikuma. ²⁰ Koni lapeela ao o fochi kao, kono na lapeela nao a tamba kwitana o kwange kutha na lii lyoo ²¹ ngao anu oshe nga piluke a mweya, weti owe, Tate, apoli o kwange, mane name o kwoye. Nao ngeyo kame a piluke o mweya o kwetu ngao a kaye ngo ka itane ngao kandi owe yonyiko no ni tuma. ²² E kanya no nipa, ina thyapu, ngao nga piluke a mweya, weti omo tulyele pa mweya. ²³ Ome ni kale o kwoo, nawe kame o kale o kwange----ngao nga piluke aku konda mu umweya woo, ngao a kaye ngo ka limuke ngao mono ni tuma, mane kame o mukwa kwa wapela weti omo wa ni wapeela name. ²⁴ Tate, na saela anu no nipa ngao e kale nage omo nili ngao nga monange e kanya thange, etho no nipa ka kuli mono ni wapela nje kale a kaye ka umbiwe. ²⁵ Tate no ku luka, a kaye ko ka iku limuka kao, kono ome na ku limuka, mane nao a limuka ngao owe yono ni tuma. ²⁶ Mo nia limukisa e lithina lyoye, mane mo nitha na ku lia limukisa ngao oku wapela no ni wapela kwi kale noo, name ni kale o kwoo.