¹ Thangwe lache ndiwe wakusaya chilungamo, munthu iwe, iwe wakuyeluza, poti bzinthu bzomwe iwe ukuyeruza munthu mwanzako, umbabzigaza wekha. Nakuti pomwe iwe ukuyeluza chitambo bzinthu bzomwebzo. ² Soma ife timbadziwa kuti chiyeruzo cha Mulungu mcha iwo wachilungamo pamene iwo ambagaza bzinthu bzomwe iwo ambachita. ³ Tsono kumbuka ibzi, munthu iwe, iwe omwe umbayeluza iwo wakuchita bzinthu bzomwebzi terepo iwe umbachitambo bzomwebzo. Iwepo udzapulumuka pa chiyeruzo cha Mulungu? ⁴ Ayai ukukumbuka bzakuchepa bza vida ya ubwino bzache, kugwesa mtima kwache, na kupilila kwache? Apa umbadziwa kuti kukoma mtima kwache kumbatitsogolera iwepo ku kulapa? ⁵ Tsono nakuuma mtima kwako na kusaya kulapa mtima ukumbabzigwezekera wekha ukali pa nsiku ya ukali, nakuti, pa nsiku ya bvumbuluso la chiyeruzo Mulungu. ⁶ Iye amdzapereka malipiro kuna aliyense maninga na bzakuchita bzache; ⁷ kuna iwo omwe malingana na chipiriro cha mabasa ya bwino na bzichito bzakuyang'ana ulemerelo, ulemu, nakusaya kudzongeka, iye amdzakupani moyo wakusaya kumala. ⁸ Tsono kuna iwo omwe ambanyang'ana bza iwo wenekechilo, na omwe anilamba bzachadidi mkumbatewera bzakuipisisa, mkukhala waukali na kugaka mtima kudzafikila. ⁹ Mulungu adzamubvesa kuwawa namazunzo munthu ali yense omwe amchita bzakuipisisa, chakutoma kuna Ayuda kinangoko kuna Aheleni. ¹⁰ Soma ulemelero, ulemu ,na mtendere kuna aliyense omwe anchita bzabwino, pakutoma kuna M'yuda kinangoko kuna M'heleni. ¹¹ Kuti Mulungu alibe tsankho. ¹² Wense omwe ambaphonya seye kudziwa bzitongi amdzadzongewa soma neye na malamulo, apo wense omwe ambaphonya achidziwa bzitongi amdzayeluziwa na bzitongi. ¹³ Ni omwe lini ambabva mulamuyo omwe ali anyakulungama pa nkhope ya Mulungu, soma na iwo omwe ambabvela malamulo, omwe amdzalewedwa anyakulungama. ¹⁴ Pomwe Wachikunja, omwe alibe malamulo, chibadwire ambachita bzinthu bza malamulo, ambafuna iwo ni bzakutonga kuna iwo okha, napo kuti iwo alibe bzitongi. ¹⁵ Na ibzi iwo ambabzionesera bzichito bza malamulo bzakunembiwa m'mitima mwao. Nachikumbumtima chawo chikuchitila pomwe umboni kuna iwo, Na malingalilo yawo yakugazana ayai kutawizana okha ¹⁶ pa nsiku yomwe Mulungu amdzayeruza bzinsinsi bza wanthu wense, malingana na uthenga bwangu bwa bwinobu, kudzera mwa Yesu Mkhirisitu. ¹⁷ Soma penu iwe umbzithusa wekha kuti ndiwe mu Yuda mkudalila bzitongi na kubzithusa mwa Mulungu, ¹⁸ uchidziwa bzakufuna bzache na kutawiliza bzinthu bzomwe bzakuposa thangwera kuti iwe udapfunzisiwa bza malamulo; ¹⁹ napo penu iwe umbabzitsimikiza kuti iwepo wekha umbatsogolera azimola, kubvunika kuna wale omwe ali mumdima, ²⁰ nyakulangiza anyakusaya nzeru, mpfunzisi wa tuwana tung'ono tung'ono, iwe uchikhala wamalamulo uchiyadziwa bza chadidi, ibzi bzingadzonge tani njira yako ya ku moyo? ²¹ Iwe omwe umbapfunzisa winango, tani umbabzipfunzisa lini wekha? Iwe omwe umbalalika nampodi kuba, umbaba? ²² Iwe omwe umbauza anzako nampodi kuchita uputa, umbachita uputa? Iwe omwe umbayipidwa na bzamafano, tani umbaba pomwe bza tchalitchi? ²³ Iwe omwe umbabzithemba na malamulo, umbanyazisa Mulungu na kusaya kubvera malamulo? ²⁴ Nakuti ''dzina la Mulungu likuchitisiwa manyazi pakati pa Wachikunja thangwela imwe'' malingana na momwe bzidanembelewa. ²⁵ Nakuti mgwatiwe umbakhala wadidi kuna iwe penu iwepo ukukoya malamulo, penu iwepo ndiwe wakubvera lini malamulo, iwepo mgwatiwe wako umkhala ninga ulibe mgwatiwe. ²⁶ Penu, munthu, wakusaya kugwatiwa akukoya malamulo, kusaya kugwatiwa kwacheko kungatengiwe lini ningati kugwatiwa? ²⁷ Iye ndiye alibe kugwatiwa chibadwire soma ambabvera malamulo iye amdzakugaza lini iwe, penu iye wakwanilisa lamulo? Ili ni thangwera kuti imwe muna chitongi chakuchita kunembiwa na mgwatiwe, chensecho ndimwe wakuphonyera chitongi! ²⁸ Myuda chayiyeyiye ni omwe lini angawoneke ninga Myuda pankhope za wanthu; apo mgwatiwe chayiyeyiye ni omwe lini ungachitike mthupi pa nkhope za wanthu. ²⁹ Soma munthu omwe ni Myuda penu iye ali telepai mu mtima apo mgwatiwe uli mgwatiwe wa mu mtima, mwa mzimu, sikuti wakunembewa. Kutenda kwa munthu umweyu kumbachokera lini kuna wanthu soma kuchokera kuna Mulungu.