¹ Paulo, mtumiki wache wa Yesu Mkhilistu, wakuchemeriwa kukhala ntumwi na kupambuliwa thangwera mafala yadidi ya Mulungu, ² yomwe iye adayasewera kudzera mwa aneneri wache mmalemba ya Mulungu, ³ yakulewa bza Mwana wache omwe akhali wa mbewu ya Davite ninga kuthupi. ⁴ Kudzera mwa Mzimu wakuchena omwe adatsimikiziwa na mphamvu kuti adzakhala Mwana wa Mulungu pakumuka kwache kwa wa kufa, Yesu Khilisitu Mbuya wathu. ⁵ Kudzera kuna iye ife tidatambila mwayi na utumiki bwa kuchemera wanthu kuchoka pakati pa madzinza yense, kukabvera dzina lache. ⁶ Pakati pa madzinza yoya, imwe mwachemeriwambo kudzera mwa Yesu Mkhilisitu. ⁷ Kuna wense waku Roma omwe ndiwo ngwakukondewa na Mulungu na kuchemeliwa kukhala wanthu wache wakuchena: Chifundo na mtendere kuna imwe kuchokera kuna Mulungu Baba wathu na Mbuya Yesu Mkhilisitu. ⁸ Chakutoma, ine ndikutenda Mulungu wangu kudzera kuna Yesu Khilisitu pala imwe mwense, thangwe chikhulupiliro chanu chikusewerewa dziko lense lapansi. ⁹ Mulungu ni mboni yangu, omwe ine nimbamutumikila na mtima wangu pa kulalikila mafala ya Mwana wache, pa nthawe zense nimbakugumirani imwe. ¹⁰ Ine nthawe zense nimbakumbila m'mapembo yangu kuti mwa njira iriyense ndikapambane pakumaliza tsapano na chifuniro cha Mulungu. ¹¹ Nakuti ine ndikukhumbira kukuonani imwepo, kuti ndikupenimbo bzithu bzabwino bza uzimu, kuti bzikupaseni mphamvu imwepo. ¹² Ibzi ndibzo, ndikulewa kuna imwe kuti bzikulimbikiseni, kudzera mchikhulupililo cha winango na mwanzache, chaimwe na ine. ¹³ Tsono ine ndikufuna lini kuti mukhale neye kudziwa, abale wangu, ine nthawe zizinji ndikhafuna kuti ndibwere kuna imwepo (soma ndakhala ndikutazira ateye nsiku zino), pala kuti ndikhale pomwe na bzipaso pakati panu, ninga ndimo bzikhalili pakati pa wa Wachikunja winango. ¹⁴ Inepano ndine wakungingimiziwa kuna Ahereni pabodzi na wa kunja, pabodzi pomwe kuna wanzeru na wakupusa. ¹⁵ Tsono, ninga ine, ndine wakukonzeka kuti ndilalikile mafala kuna imwe naiwo omwe aliku Roma. ¹⁶ Thangwe ine nimbachita lini manyazi na mafala ya Mulungu, nakuti ni mphamvu ya Mulungu na chipulumuso kuna wense omwe ambakhulupilila, chakutoma kuna Ayuda pabodzi na Ahelene. ¹⁷ Nakuti mwa iyo chilungamo cha Mulungu chachikhulupililo chabzilatiza kuchoka ku chikhulupililo kuyenda ku chikhulupililo, ninga kudanembiwa, ''Anyakulungama adzakhala na moyo na chikhulupililo.'' ¹⁸ Thangwe ukali bwa Mulungu buli kuoneka kuchokera kudzaulu kugazana na wanthu wense wakusaya kunamata omwe kudzera mkusaya kulungama ambaletsa chikhulupililo. ¹⁹ Ili nithangwe lakuti ndicho chimbadziwika cha Mulungu chimbawoneka kuna iwo. Nakuti Mulungu waabvunikira iwo. ²⁰ Kuyambira chilengedwere cha dziko la pansi, bzinthu bzakusaya kuoneka, bzawoneka bwino na mphamvu yache ya chilengedwe chache, poti bzidadziwika kuchokera ku bzinthu bzomwe dzidakonziwa pamwepo. bzomwe iwo angakwanise lini kulamba. ²¹ Ili ni thangwe lache, napo kuti iwo ambadziwa bza Mulungu, alibe kumulemekeza Mulunguyo, ayai ku kumutendambo. M'malo mwache, iwo adamunyoza m'mitima mwawo, apo mitima yawo yapezpeiziyo idapsipiziwa. ²² Iwo akhabzitenga ninga wa nzeru, soma asanduka wakupusa. ²³ Iwo ambasinthanisa ulemelero bwa Mulungu wakusaya kufa na bzifanizo bzakukonziwa kuti bzioneke ninga munthu omwe ambafa, bza mbalame, na bzinyama bza minyendo minayi, na bzinthu bzakukwawa. ²⁴ Thanngwe lache Mulungu adawapeleka iwo kuna bzidyokodyoko bza bzakuipa bza mmitima mwawo, bzakunyansa bza chigololo kunyazisa mathupi yawo winango na mwayache. ²⁵ Ndiwowo adasinthanisa bza chadidi bza Mulungu na gunkha, kunamatira na kutumikila bzinthu bza kulengewa kusiya Mulengi, omwe ambatendiwa nthawe zense. Ameni. ²⁶ Thangwera ibzi , Mulungu adawapereka iwo kuna bzidyokodyoko bzakuchitisa manyazi, napo akazi wawo adasinthanisa kachitilo kachibaliwile kachikhala ninga machitilo inango yachikhalidwe. ²⁷ Chibodzibodzi pomwe , amuna adaleka machitiwe yachibaliwe ya chikwati na akazi ndipo ambafunana winango na mwayache. Awa akhali amuna ndiwo adachita bzakusaya manyazi na amuna kutambira mwa iwo okha chilango ndicho akhathemera kuphonya kwawo. ²⁸ Pomwepo iwowo alibe kuwona kuti mkwakufunika kukoya chidziwiso cha Mulungu, iye adawapeleka iwowo kumalingiliro yakugonyoka, kuti achite bzinthu bzomwe bzakubvumizika lini kuchitiwa. ²⁹ Iwo mbakudzaliwa na mtundu uliwense wa chikhalidwe chakuipa, bzakuipisisa, umbombo, na dumbo. Iwo mbakudzala na nsanje, kupha, ndeu, chinyengo na kukhumba bwakuipa. Iwo mbamagunkha, ³⁰ watsinjililo, wakuzondana na Mulungu, achipongwe, wakubzikuza na kubzithusa, iwo ambagumana njira yakuchitila bzakuipa; iwo ambabva lini bzakulewa abereki wawo. ³¹ Iwo mbakusaya nzeru, wakusaya chikhulupiro, wakusaya kukhudziwa mumoyo na wakusaya nsisi. ³² Iwo ambadziwa chiyeluzo chadidi cha Mulungu, kuti iwo wakuchita bzinthu bzimwebzo akuthemera kufa. Soma ambatondo kupitilila tenepoyo kuchita bzinthu bzimwebzi, napo pomwe ambatawiliza awo ndiwo ambachita bzimwebzi,