¹ Mgole lachitatu la ufumu bwa Yehoiakimu mfumu ya Yuda, Nebukadinezara mfumu ya Babulo idabwera ku Yerusalemu ichizungulira muyiyo mkugwata njira zense zakupitira mwemo. ² Mbuya adapa Nebukadinezara chipambano pa Yehoiakimu mfumu ya Yuda, achimpa iye bzinthu bzinango bzakupambulika bza mnyumba ya Mulungu. Iye adabzibweresa mdziko la Babulo, ku nyumba ya mulungu wache, achiikha bzinthu bzakupambulikabzo mthungwa la mulungu wache. ³ Mfumu idasewera na Asipenazi, mkulu wa anyabasa wache, kubweresa mwemo wanthu wina wa Isaraeli, banja lachifumu na la akulu akulu-- ⁴ anyamata wakusaya mathangwe, wakudeka mmaonekedwe, wakuchenjera mu nzeru zense, wakudzala na kudziwa na kubvesesa, wakuthemera kutumikira ku nyumba ya mfumu. Kuti awapfunzise mabukhu na chiseweredwe cha Akasidi. ⁵ Mfumu idawalewengera kubodzi gawo la chakudya chache cha nsiku na nsiku na wina wa vinyu ndiyo ikhamwa. Anyamatawo kuti apfunzisiwe kwa magole matatu, apo kumala popo, adzatumikire bwino mfumu. ⁶ Pabodzi nawo pakhana Daniele, Hananiya, Misaeli, na Azariya, wina wa wanthu waku Yuda. ⁷ Mkulu wa anyabasayo adawasandula madzina: Daniele adamsandula Belitsazara, Hananiya adamsandula Shadreki, Misaeli adamsandula Misheki, na Azariya adamsandula Abidinego. ⁸ Soma Daniele adakhumba mu mtima mwache kuti nampodi abziipise yekha na bzakudya bza mfumuyo ayai na vinyu ndiyo ikhamwa. Ndiye adakumbira chibvumizo kuchoka kuna mkulu wa anyabasayo kuti iye nampodi abziipise yekha. ⁹ Tsapano Mulungi adapa Daniele udidi na nsisi kudzera mu ulemu ndibo mkulu wa anyabasa akhanabo kuna iye. ¹⁰ Mkulu wa anyabasa adati kuna Daniele, ''Ndina mantha na mbuyangu mfumu. Iye watonga chakudya na bzakumwa kuti mumbadye. Thangweranyi kuti iye akuoneni imwe kuoneka wakuipa kuposa anyamata wakulingana namwe? Mfumu ingandigwate msolo thangwera imwe. ¹¹ Ndiye Daniele adasewera na kapitawo omwe mkulu wa anyabasayo adamuikha kunyang'anira Daniele, Hananiya, Misaeli, na Azariya. ¹² Iye adati, ''Pirizi tiyezereni, anyabasa wanufe, kwa nsiku khumi. Tipeni bzakumera mmataka bzokhabzokha kuti tidye na madzi yakumwa. ¹³ Ndiye mundendemeze maonekedwe yathu na maonekedwe ya anyamata wakudya chakudya cha mfumu, apo mutichitire, akapolo wanufe, kutengera ndimo mwaonera.'' ¹⁴ Ndiye kapitawoyo adaphatizana naye kuchita ichi, achiwayezera iwo kwa nsiku khumi. ¹⁵ Pa kumala kwa nsiku khumi maonekedwe yawo yakhali yakunenepa kwene kwene, achikhala wa thanzi, kuposa anyamata omwe akhadya chakudya cha mfumu. ¹⁶ Ndiye kapitawo ule adachosa bzakudya bza mfumu bzire na vinyu wawo ule mkumbawapa bzakumera mmataka bzokhabzokha. ¹⁷ Angakhala anyamata anayiwa, Mulungu adawapa kudziwa na luntha la mmabukhu yaliyense na nzeru, apo Daniele akhakwanisa kubvesesa masomphenya yensene na atulo. ¹⁸ Pa mamaliziro kwa nthawe yakuikhiwa na mfumu yakuwapinza mkati, mkulu wa anyabasa ule adawapinza mwemo pamaso pa Nebukadinezara. ¹⁹ Mfumu idasewera nawo, apo pakati pa thimu lenselo pakhalibe wakuyezezera na Daniele. Hananiya, Misaeli, na Azariya. Iwo adayima pamaso pa mfumu, kukonzeka kuitumikira. ²⁰ Mu bvunzo lirilense la nzeru na kubvesesa ndilo mfumu idabvunza iwo, adagumana iye kupita kakhumi kuposa wamatsenga wense na wale omwe akhati ambasewera na wakufa, omwe akhali mu ufumu mwache mwensemo. ²¹ Daniele akhali mwemo kufikizana gole lakutoma la Mfumu Koresi.