¹ Mgole lachiwiri la kutonga kwa Nebukadinezara, iye akhana atulo. Mtimwa wache udabonera, apo akhagona lini. ² Ndiye mfumuyo idachemeresa wamatsenga na wale akhambabziti akhasewera na wakufa. Iye adachemeresa pomwe wa nyanga na wanthu wakupfunza. Iye akhafuna kuwauza atulo wachewo. Ndiye iwo adapita mwemo achiima pamaso pa mfumu. ³ Mfumuyo idati kuna iwo, ''Ndalota atulo, apo mtima wanguyu ukufunisisa kudziwa ndibzo atulowa akulewa.'' ⁴ Kinangoko wanthu wakupfunza adasewera kuna mfumuyo mchi Aramu, ''Mfumu, mukhale na moyo chikhalire! Tiuzeni atulo wanuwo, akapolo wanufe, apo timdzazimbula kuthumbudzula kwache.'' ⁵ Mfumu idawatawira wanthu wakupfunzawo, ''Nkhani imweyi yamala. Mungasaya kundizimbulira atulowa na kuthumbudzula kwache, matupi yanu yanikhadzuliwa pakati na nyumba zanu zimsandusiwa midwi ya ku mtaya. ⁶ Soma mungandiuza atulowa na kuthumbudzula kwache, mumtambira mpfupo kuchoka kuna ine, mpfupo, na ulemu bukulu. Ndiye mundiuze atulowa na kuthumbudzula kwache. ⁷ Iwo adatawira pomwe achiti, ''Mfumu tiuzeni, akapolo wanufe, atulowo apo timdzakuuzani kuthumbudzula kwache.'' ⁸ Mfumu idatawira, ''Ndikudziwa chadidi kuti imwepo mukufuna nthawe ikulu thangwe mukudziwa kuima njii kwangu pa chochi. ⁹ Soma mungasaya kundiuza atulowa, pana chilango chibodzi basi kuna imwepo. Mwakumbuka kundiuza bzakunama na mafala yachinyengo ndiyo mwapangana pabodzi kundiuza kufikizana ndichinje kukumbuka kwangu. Ndiye tsono, ndiuzeni atulowo, apo ndiye nimdziwa kuti mumkwanisa kundiuza kuthumbudzula kwache.'' ¹⁰ Wanthu wakupfunza wale adatawira mfumuyo, ''Palibe munthu pa dziko lapansi wakufikira chakufuna mfumu. Palibe mfumu ikulu ayai mtongi ndiye adafuna kale chinthu chocho kuna wamatsenga, ayai kuchoka kuna wina aliyense omwe ambabziti ambasewera na anyamuya, ayai kuna munthu wakupfunza. ¹¹ Ndibzo mfumu yafuna mpsakunesa, apo palibe aliyense omwe angalewe kuna mfumu kupambula milungu, apo iyo imbakhala lini pakati pa wanthu.'' ¹² Ibzi bzidakalipisa mfumu ichipsoma maninge, apo idapa lamulo kudzononga wanthu wense wa nzeru mu Banulo. ¹³ Ndiye gunyenye lidayenda kunja kukapha wanthu wa nzeru, iwo achituma kukapsaga Daniele na anzache kukawapha. ¹⁴ Ndiye Daniele adatawira na uphungu bwa nzeru kuna Arioki mkulu wa alindiri wa mfumu, omwe akhadabwera kudzapha wanthu wense wa nzeru mu Babulo. ¹⁵ Daniele adabvunza mkulu wa nkhondo wa mfumu, ''Thangweranyi chitongi cha mfumu chikukulumiza? Ndiye Arioki adauza Daniele ndicho chikhadachitika. ¹⁶ Ndiye Daniele adapita mkati achikumbira kugumana na mfumu kuti akapereke chithumbudzulo kuna mfumu. ¹⁷ Ndiye Daniele adayenda ku nyumba yache achikafokotoza kuna anzache Hananiya, Misaeli, na Azariya chomwe chidachitikacho. ¹⁸ Iye adawakumbira iwo kuchitiwa chifundo kuchoka kuna Mulungu wakudzaulu bza chinsinsichi pala kuti Daniele na anzache nampodi adzonongewe kubodzi na wina wa nzeru wa m'Babulo. ¹⁹ Usikubo chinsinsi chidazimbulika kuna Daniele mmasomphenya. Ndiye Daniele adalemekeza Mulungu wakudzaulu ²⁰ apo Daniele adati, ''Lemekezani dzina la Mulungu ku nthawe za nthawe, thangwe nzeru na mphamvu mzache. ²¹ Ambachinja nthawe na nyengo; ambabulisa mafumu achiikha mafumu pa makadera yawo. Ambapa nzeru kuna wanthu wa nzeru na kudziwa kuna iwo omwe ana kubvesesa. ²² Ambazimbula bzinthu bzakuzika na kubisika thangwe iye ambadziwa ndicho chiri mu m'dima, apo kutoya kuli mwa iye. ²³ Mulungu wa abereki wangu, ndikukutendani na kukulemekezani thangwera nzeru na mphamvu mudandipa. Tsapano mwandidziwisa ndibzo tidakumbira kuna imwe; mwatidziwisa ife mlandu wa mfumu.'' ²⁴ Ndiye Daniele adayenda kukaona Arioki (omwe mfumu adamsankhula kupha aliyense wa nzeru m'Babulo). Iye adayenda achikati kuna iye, ''Nampodi kudzononga wanthu wa nzeru m'Babulo. Nditendereni kuna mfumu apo nimkaonesa mfumu kuthumbudzula kwa atulo wache. ²⁵ Ndiye Arioki kamkulumize adabweresa Daniele pamaso pa mfumu achiti. ''Ndagumana pakati pa akaidi wa Yuda munthu omwe amdzazimbula kuthumbudzulira atulo wa mfumu.'' ²⁶ Mfumu idati kuna Daniele (omwe dzina lache likhali Belitsazara), ''Ungakwanise kundiuza atulo ndiwo ndidaona na kuthumbudzula kwache?'' ²⁷ Daniele adatawira mfumuyo achiti, ''Chinsinsi ndicho mfumu yakumbira chingazimbuliwe lini na wanthu wa nzeru, ayai na omwe ambati ambasewera na anyamuya, pinango na wamatsenga, neye na alauli. ²⁸ Soma, pana Mulungu wakukhala kudzaulu, omwe ambazimbula bzinsinsi, apo iye wakudziwisani imwe, Mfumu Nebukadinezara, ndibzo bzimdzachitika nsiku ziri mkudza. Awa ndiwo akhali atolo wanu na masomphenya ya mu mtima mwanu pa kama panu. ²⁹ Mungakhala imwe, mfumu, bzakukumbuka bzanu pakama panu bzikhali bza bzinthu bzakubwera mtsogolo, apo wakuzimbula bzinsinsi wakudziwisani imwepo ndibzo bzimfuna kuchtika. ³⁰ Ningakhala ine, chinsinsi chochi chiribe kuzimbulika kuna ine thangwera nzeru ndizo ndinazo kuposa munthu wina aliyense wa moyo. Chinsinsichi chidazimbulika kuna ine pala kuti imwe, mfumu, mubvesese kuthumbudzula, na kuti mudziwe bzakukumbuka bza mumtima mwanu. ³¹ Mfumu, mudanyang'ana mdzaulu muchiona fano likulu, ndilo likhali likulu na kuyetima kukulu, litayima kunyang'anizana namwe. Kuyetima kwache kukhali kwakupasa mantha. ³² Msolo wa fanolo ukhali wakukonzewa na oro wabwino. Pakadedema na manja yache ya siriva. Mimba yache na ntchafu zikhali za mkuwa, ³³ apo miyendo yache ikhali ya chitsulo. Nzayo zache zikhali za mwinango chitsulo mwinango dongo. ³⁴ Mudajiguma, apo mwala udabeduka, napo sikuti na manja ya munthu, uchigunsa fanolo ku nzayo zache za chitsulo na dongo, uchibzipeya. ³⁵ Ndiye chitsulo, dongo, mkuwa, siriva, na oroyo kabodzi na kabodzi bzidapseka mmapidaso bzichikhala ninga mankhunyete pa mbuto yakupunthira chirimo. Chonzi chidabzimbulusa apo pakhalibe chilatizo chakusala. Soma mwala ndiwo udamenya chifanoyo udasanduka phiri likulu lichidzala dziko lense lapansi. ³⁶ Awa akhali atulo. Tsapano timdzayiuza mfumu kuthumbudzula. ³⁷ Imwe, mfumu, ndimwe mfumu ya mafumu omwe Mulungu wakudzaulu wakupani ufumu, mphamvu, na ulemu. Wapereka mmanja mwanu mbuto yakukhala wanthu. ³⁸ Wapereka nyama zakuthengo na mbalame za mdzaulu mmanja mwanu, mkukupani utongi bzakubzinyang'anira. Ndimwe msolo wa fano la oro. ³⁹ Kuchoka imwe, mfumu ina imdzaphuka yakuchepa kuna imwe, apo ufumu bzachitatu bwa mkuwa bumdzatonga dziko lense lapansi. ⁴⁰ Pamdzakhala ufumu bzachinayi, bwa mphamvu ninga chitsulo, thangwe chitsulo chimbapsa bzinthu bzinzache mmapidaso mkupeya chirichense. Bumdzapeya bzinthu bzensebzi buchibzipwetedza. ⁴¹ Ninga ndimo mudaoneramo, nzayo na bzala bzikhali bzakukonzewa na dongo lakutenthiwa na kwina chitsulo, mtenepombo budzagawikire ufumu; bwina bwa mphamvu ya chitsulo bumdzakhala mwemo, ninga mudaonera chitsulo kusanganizika na dongo lakunyodoka. ⁴² Ninga bzala bza nzayo bzikhaliri bza chitsulo na kwina dongo, ndimo ufumu bumdzakhalira kwina kwa mphamvu ⁴³ kwina kwakugamphuka. Ninga mudaonera chitsulo chakusanganiza na dongo lakunyodoka, ndimombo wanthu amdzasanganizikira; amdzakhala lini pabodzi, ninga ndimo chitsulo chimbasanganizikirambo lini na dongo. ⁴⁴ Mu nsiku za mafumu yamweyo, Mulungu wakudzaulu amdzakhazikisa ufumu bomwe bumdzadzonongeka lini, ayai kugonjesewa na wanthu wina. Bumdzaswa maufumu inayo mmapidaso buchiyamalisa yenseyo, buchidzakhala ku nthawe za nthawe. ⁴⁵ Ninga mudaonera, mwala wakugemphuka kuchoka m'phiri, soma sikuti na manja ya munthu. Budaswa chitsulocho, mkuwa, dongo, siriva, na oro mmapidaso. Mulungu mkuluyo wakudziwisani imwepo, mfumu, ndicho chimdzachitika bzitamala bzobzi. Atulowa ngwa chadidi apo kuthumbudzula kwache mkwakukhazikika.'' ⁴⁶ Mfumu Nebukadinezara idagwesa nkhope yache pansi pamaso pa Daniele ichimpasa ulemu; iye adatonga kuti amthirire nsembe ya ufa na nsembe yakununtchira. ⁴⁷ Mfumu idati kuna Daniele, ''Chadidi Mulungu wako ni Mulungu wa milungu, Mbuya wa mafumu, na omwe ambazimbuladi bzinsinsi, thangwe wakwanisa kuzimbula chinsinsichi.'' ⁴⁸ Ndiye mfumu idasandusa Daniele mkulu kwene kwene achimpa iye mpfupo zikulu zizinji. Adamuyikha iye mkulu wa mphimpha yense ya Babulo. Daniele adasanduka mkulu wa akazembe wa wanthu wense wa nzeru m'Babulo. ⁴⁹ Daniele adakumbira mfumu, apo mfumu idayikha Shadreki, Misheki, na Abedenego kukhala wakunyang'anira mabasa ya mphimpha ya Babulo. Soma Daniele adasalira pa mbuto yakutongera milandu ya mfumu.